இந்தியாவில் கடந்த முப்பது வருடங்களில் 20 ஆயிரத்துக்கும் மேற்பட்ட சிங்கிள் - ஸ்கிரீன் திரையரங்குகள் மூடப்பட்டு விட்டன. ஐந்தாயிரத்துக்கும் மேலான சிங்கிள் - ஸ்கிரீன் திரையரங்குகள் தொடர்ந்து இயங்குவதற்காகப் போராடி வருகின்றன. 

ஒரு பக்கம் திரையரங்குகள் மூடப்பட்டாலும், இன்னொரு பக்கம் புதிது புதிதாக மல்டிபிளக்ஸ் திரையரங்குகளும், ஐமேக்ஸ் போன்ற பிரமாண்ட திரையரங்குகளும் உதயமாகிக்கொண்டே இருக்கின்றன.

அடுத்த இரண்டு வருடங்களில் ஐமேக்ஸ் திரையரங்குகளின் எண்ணிக்கை நாற்பத்தைந்தைத் தொட்டுவிடும் என்கின்றனர். 

இத்தனைக்கும் சிங்கிள் - ஸ்கிரீன் திரையரங்க நுழைவுச்சீட்டு விலையுடன் ஒப்பிடும்போது, ஐமேக்ஸில் மிகவும் அதிகம். இதுபோக ஏராளமான மல்டிபிளக்ஸ் திரையரங்குகளும் திறக்கப்பட்டுள்ளன.

உதாரணத்துக்கு, சமீபத்தில் ‘இண்டர்ஸ்டெல்லர்’ என்ற ஆங்கிலப்படம் மறு வெளியீடு செய்யப்பட்டது. இத்திரைப்படம் சாதாரண திரையரங்குகளிலும், ஐமேக்ஸ் திரையரங்குகளிலும் வெளியானது. 

பெரிய திரையைக் கொண்ட ஐமேக்ஸ் திரையரங்குகளை நோக்கித்தான் மக்கள் படையெடுத்தனர். பலருக்கு ஐமேக்ஸில் டிக்கெட் கிடைக்கவில்லை. காரணம், இந்தப் படத்தை  முன்பே பார்த்திருந்தாலும் கூட, ஐமேக்ஸ் திரையரங்க அனுபவம் எப்படியிருக்கும் என்பதற்காகவே அத்திரையரங்குக்குப் படையெடுத்தனர்.

மக்கள் திரையரங்க அனுபவத்தைத் தேடிச் செல்வதால், பழைய சாதாரண திரையரங்குகளை நோக்கிச் செல்வது குறைந்திருக்கிறது. அதே நேரத்தில் புது அனுபவங்களைத் தரும் திரையரங்குகளை நோக்கிச் செல்வதால், அந்த திரையரங்குகளுக்கான தேவையும் அதிகரித்திருக்கிறது. 

அதனால் ஐமேக்ஸ், 4டிஎக்ஸ், ஸ்கிரீன் எக்ஸ், ஐஸ் 3டி, எம்எக்ஸ்4டி, ரியல்டி 3டி, எபிக், ஐமேக்ஸ் வித் லேசர், டால்பி சினிமா போன்ற திரையரங்குகள் உலகம் முழுவதும் நல்ல வரவேற்பைப் பெற்று வருகின்றன. ரியல்டி 3டி, டால்பி சினிமா ஆகிய திரையரங்குகள் இந்தியாவில் இல்லை.

பொதுவாக ஐமேக்ஸ், 4 டிஎக்ஸ், டால்பி சினிமா மாதிரியான திரையரங்குகளில் ஹாலிவுட் படங்களைத்தான் வெளியிடுவார்கள். காரணம், அந்த திரையரங்குகளில் திரையிடுவதற்கான முறையில் ஹாலிவுட் படங்களைப் படமாக்கியிருக்கின்றனர். 

இன்று, தமிழ், இந்தி, தெலுங்கு, மலையாளப்படங்களைக் கூட ஐமேக்ஸ் அல்லது டால்பி சினிமா திரையரங்குகளில் வெளியிடும் வகையில் படமாக்குகின்றனர். இதிலிருந்தே ஐமேக்ஸ், டால்பி  சினிமா தான் திரையரங்க தொழில்நுட்பத்தின் எதிர்காலம் என்பது தெரிகிறது.

மட்டுமல்ல, இன்றைய தேதியில் உலகிலேயே மிகச்சிறந்த திரையரங்க அனுபவத்தைத் தருவது, ஐமேக்ஸ் 70எம்எம் திரையரங்கம்தான்.உலகில் முப்பது இடங்களில் மட்டுமே இந்த திரையரங்குகள் எஞ்சியிருக்கின்றன. 

இதற்குப் பிறகு ஐமேக்ஸ் வித் லேசர் திரையரங்குகள் நல்லனுபவத்தைத் தருவதாக சினிமா ரசிகர்கள் சொல்கின்றனர். இந்த ஐமேக்ஸ் வித் லேசர் உட்பட பெரிய திரைகளைக் கொண்ட திரையரங்குகளுக்குப் போட்டியாக ‘டால்பி’ நிறுவனத்தால் களமிறக்கப்பட்டதுதான், டால்பி சினிமா.

‘அவதார் 2’, ‘டியூன்’ போன்ற சிறந்த காட்சியனுபவங்களைத் தரும் திரைப்படங்களை டால்பி சினிமா திரையரங்குகளில் பார்த்தவர்கள், ‘‘ஐமேக்ஸ் லேசரைவிட, டால்பி சினிமாதான் சிறந்தது’’ என்கின்றனர்.

டால்பி விஷன் மற்றும் டால்பி அட்மோஸும் இணைந்த திரையரங்கம்தான், டால்பி சினிமா. ஹெச்டிஆர் தரத்தில் ப்ரொஜக்‌ஷன் பண்ணுவதற்காக இரண்டு கிறிஸ்டி 4கே லேசர் புரஜக்டர்களைப் பயன்படுத்துகின்றனர். இதை டால்பி விஷன் என்கின்றனர்.