ஆயுத வியாபாரத்தில் மட்டுமல்ல... விவசாய உற்பத்தியிலும் அமெரிக்கா இடம்பிடிக்கிறது என்றால் ஆச்சரியம்தானே!ஆமாம். விவசாயத்தில் எந்தெந்த நாடுகள் முன்னணி வகிக்கின்றன என்று புள்ளிவிபர வஸ்தாதுவைக் கேட்டால் அது சீனா, இந்தியா, அமெரிக்கா மற்றும் பிரேசிலைக் கைகாட்டுகிறது. 

விவசாயம் என்றால் அரிசி, சர்க்கரை, காய்கறிகள் மட்டுமல்ல... ரப்பர், பருத்தி மற்றும் புகையிலை எல்லாமும் சேரும் என்று மனதில் வைத்து இந்தக் கட்டுரையை படித்தால் உங்களுக்கு மோட்சம் நிச்சயம்.

முதலில் இந்த நான்கு நாடுகளின் சில பொதுத் தன்மைகளைப் பட்டியலிட்டால் அது ஏன் இந்த நாடுகள் விவசாயத்தில் முன்னணியில் இருக்கிறது என்று புரிபடும். மற்ற நாடுகளைவிட இந்த நாடுகளில் மக்கள்தொகை அதிகம். 

இத்தோடு விவசாயத்துக்கான நிலமும் அபரிமிதமாக இருக்கிறது. அத்தோடு இடத்துக்கு இடம் காலநிலையிலும் வித்தியாசம் இருப்பதால் விளைச்சலும் பரவலாக இருக்கிறது. இனி ஒவ்வொரு நாட்டிலும் விவசாயத்தின் வெற்றி தோல்விகளை அலசுவோம்.

உலகில் இரண்டாவது பெரிய விவசாய உற்பத்தியாளர் இந்தியாதான். இந்திய விவசாயம் பொதுவாக மானியத்தை நம்பி நடைபெறுவது. இதனால்தான் விவசாயம் மற்ற மூன்று நாடுகளைப்போல தீவிரமாக இல்லாமல் மந்தமாக இருக்கிறது. அதுவும் இந்திய விவசாயம் பெரிதும் மழை, நீர், காலநிலைக்கு ஏற்ப நடைபெறுவதால் பெரிய பாய்ச்சல் இல்லாமல் இருக்கிறது.