நவீன காலத்தில் ஓர் இஸ்லாமிய நாட்டில் முதல் புரட்சி நிகழ்ந்த நாடு என்றால் அது ஈரான்தான். 1979ல் அந்தப் புரட்சி நிகழ்ந்து ஈரானை புரட்டிப் போட்டது. 1941 முதல் 1979 வரை பரம்பரை பரம்பரையாக மன்னர் ஆட்சியே ஈரானில் நிலவியது. 

அந்த வகையில் மன்னர் பரம்பரையைச் சேர்ந்த மொகமது ரெஷா ஷா பஹ்லவி என்பவர் சுமார் 38 வருட ஆட்சிக்குப் பின் நாட்டை விட்டே ஓடினார். ஈரானில் நிகழ்ந்த இந்த வரலாற்று சிறப்புமிக்க புரட்சிக்குக் காரணமானவர் ஒரு மதகுரு. அவர் பெயர்தான் அயதுல்லா ருஹொல்லா கொமேனி.

இந்தக் கட்சியை உருவாக்கியவர்களில் கொமேனியும் ஒருவர் என்றாலும் இதில் பலரும் இருந்தார்கள். 

அவர்களில் முக்கியமானவர் அலி உசேனி கமேனி (Khamenei). ஆம். சூப்பர் பவர் என்ற பெயர் எடுத்த இஸ்ரேல் நாட்டுக்கும், அந்த இஸ்ரேல் நாட்டின் உதவிக்காக நேசக்கரம் நீட்டும் அமெரிக்க அதிபர் டொனால்ட் டிரம்புக்கும் சிம்ம சொப்பனமாக இருக்கும் இன்றைய ஈரானின் தன்னிகரில்லாத சுப்ரீம் லீடராக இருக்கும் அதே கமேனிதான்.

1979க்கு முன்பு வரை ஈரானை ஆட்சி செய்து கொண்டிருந்த மன்னர் ஷா, அமெரிக்கா மற்றும் இங்கிலாந்தின் கைப்பிடிக்குள் இருந்தவர். ஈரானின் எண்ணெய் வளங்கள் மீது கண் வைத்த இந்த இரண்டு நாடுகளுமே ஈரான் மக்கள் மீது கவலை கொள்ளாமல், அந்நாட்டில் அள்ள அள்ள குறையாமல் இருக்கும் எண்ணெயை வேண்டிய மட்டும் சுரண்டிக் கொழுத்து வந்தது.

இதை எதிர்த்து 1960ம் ஆண்டு முதலே ஈரானில் பல்வேறு புரட்சிகரக் குழுக்களும் தீவிரவாதக் குழுக்களும் இயங்கத் தொடங்கின. இந்தத் தருவாயில்தான் 1970களில் ‘இஸ்லாமியக் குடியரசுக் கட்சி’ ஆரம்பிக்கப்பட்டது. 

இதனை ஆரம்பித்தவர்கள் சில மதகுருக்கள். இதில் முதன்மையானவர் கொமேனி. இவரது வலது கரமாக நின்று செயல்பட்டவர் கமேனி. 1979ல் ஈரான் புரட்சி வெற்றியை நோக்கி நடைபயில... தலைமறைவாக இருந்த கொமேனி ஈரானுக்கு வருகை தந்தார். இதனைத் தொடர்ந்து பெரிய எழுச்சி ஈரானில் நிகழ்ந்தது. இது ஈரானை புதிய பாதைக்கு இட்டுச் சென்றது.

அத்துடன் அமெரிக்கா, பிரிட்டன் தவிர்த்த மற்ற நாடுகளுடன் முழுமூச்சாக எண்ணெய் வர்த்தகத்தில் ஈரான் ஈடுபடத் தொடங்கியது. இதனால் கொஞ்சம் கொஞ்சமாக பொருளாதார வளத்தில் ஈரான் முன்னேற ஆரம்பித்தது.

இது ஒரு பக்கம் என்றால்... கொமேனியின் மரபார்ந்த சில சட்டதிட்டங்கள் மீண்டும் ஈரான் மக்களை வாட்டத் தொடங்கியது மறுபக்கம்.உதாரணமாக பெண்கள் தொடர்பான சட்டங்கள், கருத்துச் சுதந்திரம், கலை கலாசாரங்களுக்கு எல்லாம் கொஞ்சம் கொஞ்சமாக கட்டுப்பாடுகள் அதிகரித்தன.

1989ல் கொமேனி இறக்கவே கமேனி சுப்ரீம் லீடராக, அயதுல்லாவாக பதவியேற்றார். 1979ல் புரட்சிக்குப் பின் ஈரான் ஓர் இஸ்லாமியக் குடியரசாக மாறியதை அடுத்து குடியரசின் குணங்கள் ஈரானில் பரவத் தொடங்கின. 

அவை பெரிய மாற்றத்தையும் ஏற்படுத்தின.நாடாளுமன்றம், நீதித் துறை, இராணுவம் உள்ளிட்டவை எல்லாம் மக்களால் தேர்வு செய்யப்பட்ட நபர்களால் வழிநடத்தப்பட ஆரம்பித்தன. ஆனாலும் ஈரானின் முக்கியமான கடைசி முடிவு என்பது அயதுல்லா எனும் சுப்ரீம் லீடரின் கைகளில்தான் இருக்கிறது. இதுதான் அன்று முதல் இன்று வரை ஈரானின் பிரச்சனை என விமர்சிப்பவர்கள் இருக்கிறார்கள்.

இத்தோடு கருத்துச் சுதந்திரத்துக்கு கட்டுப்பாடு, பெண் விடுதலையில் கண்டிஷன்ஸ் அப்ளை, அரசியல் எதிரிகளை ஒன்று கைது செய்து சிறையில் அடைப்பது அல்லது கொலை செய்வது என்றெல்லாம் கமேனி செயல்படுகிறார் என விமர்சனம் உலக நாடுகளில் மட்டுமல்ல, ஈரானிலும் இருக்கிறது.

இதற்கு வலுசேர்ப்பதுபோலவே கமேனி நடந்து கொண்டார்; நடந்து கொள்கிறார். உதாரணமாக ஈரானில் ஒருகாலத்தில் பிரதமர் பதவி இருந்தது. அதை கமேனி தூக்கிவிட்டார். அத்துடன் தன் காலத்தில் பதவி வகித்த பல அதிபர்களை ஓரங்கட்டினார் என்கிறார்கள்.

இப்படி கமேனிக்கு ஆதரவாகவும் எதிராகவும் கருத்துக்கள் நிலவி வருகின்றன. இதன் ஒரு பகுதியாக கமேனியின் சுப்ரீம் லீடர் பதவிக்கு ஆபத்து வரலாம் என மேற்குலகம் கணக்குப் போட்டது.