அதிக தனிநபர் பதுங்குக் குழிகள் கொண்ட நாடு!

சமீபத்தில் இஸ்ரேல் - ஈரான் போர் உலகையே உலுக்கியது. பனிரெண்டு நாட்கள் நீண்ட இந்தப் போரில் இஸ்ரேலுக்கு ஆதரவாகக் களமிறங்கிய அமெரிக்கா பி2 ரக போர் விமானங்கள் மூலம் பங்கர் பஸ்டர் குண்டுகளை ஈரானின் அணுசக்தி மையங்கள் மீது குறிவைத்துத் தாக்கியது. இந்நிலையில் பி2 விமானங்கள் பற்றியும், பங்கர் பஸ்டர் குண்டுகள் குறித்தும் பல்வேறு தகவல்கள் உலா வந்தன. ஆங்கிலத்தில் பங்கர் (Bunker) என்றால் பதுங்கு குழி என்று அர்த்தம்.

அதாவது பூமியின் அடியில் ஊடுருவி ராணுவ பதுங்கு குழிகளைத் தாக்கி அழிக்கும் வல்லமை கொண்டவை இந்த பங்கர் பஸ்டர் குண்டுகள். ஈரான் பூமிக்கு அடியில் அமைத்துள்ள அணுசக்தி மையங்களைத் தகர்க்கவே இந்தக் குண்டு தாக்குதல்கள் நடத்தப்பட்டன. இதற்கிடையே ஈரான், இஸ்ரேல் மீது சக்தி வாய்ந்த குண்டுகளை வீசியது. இதனால் இஸ்ரேல் அரசு மக்களை முன்கூட்டியே பதுங்கு குழிகளில் தஞ்சமடைய கேட்டுக் கொண்டது.

இந்நிலையில் பதுங்கு குழிகள் குறித்தான தகவல்கள் வைரலாகி உள்ளன. இஸ்ரேல், பாலஸ்தீனம் மற்றும் அண்டை நாடுகளுடனான பிரச்னையால் அது தொடர்ந்து பதுங்கு குழிகளை உருவாக்கிப் பராமரித்து வருகிறது.போரின்போது ஏதாவது குண்டுகள் தாக்குதல் தெரிந்தால் உடனடியாக இஸ்ரேல் சைரன் ஒலி எழுப்பி மக்களை பதுங்கு குழிகளுக்குச் செல்லும்படி கேட்டுக் கொள்ளும். அத்துடன் இஸ்ரேல் பதுங்கு குழிகளால் கட்டமைக்கப்பட்ட நாடு என்றெல்லாம் அந்தத் தகவல்கள் சொல்கின்றன.