பிக் வேர்ல்டு

‘நெட்பிளிக்ஸி’ல் பார்வைகளை அள்ளி வரும் சீன மொழிப்படம், ‘பிக் வேர்ல்டு’. பெருமூளை வாதத்தால் பாதிக்கப்பட்டிருக்கிறான் லியூ. மன, உடல் ரீதியான வலிகளைக் கடந்து, இந்த உலகத்தில் தனக்கான ஓர் இடத்தை அடைய வேண்டும் என்ற லட்சிய வேட்கையுடன் இருக்கிறான். 

லியூவின் பாட்டி சென், தனது பேரனை எந்தக் குறையும் இல்லாத ஒரு மனிதனாகவே பார்க்கிறாள். அதனால் லியூவை படிக்கச் சொல்லியும், வேலைக்குப் போகச் சொல்லியும் உற்சாகப் படுத்துகிறாள்.

அதனால் இயல்பான ஒரு மனிதனுக்குக் கிடைக்கும் எல்லாமே தனக்கும் கிடைக்கிறது என்று நம்புகிறான் லியூ. அத்துடன் லியூவை உணர்வுபூர்வமாக அவனது பாட்டியால் மட்டுமே புரிந்துகொள்ள முடிகிறது. ஆனால், மற்றவர்கள் லியூவை குறை உள்ள மனிதனாகவே பார்க்கிறார்கள். 

அது அவனை முடக்குகிறது. இவ்வளவு பெரிய உலகத்தில் தனக்கான ஓர் இடத்தை லியூ எப்படி பிடிக்கிறான் என்பதை நெகிழ்ச்சியாக சொல்கிறது மீதிக்கதை.மன ரீதியாகவும், உடல் ரீதியாகவும் எவ்வளவு குறைகள் இருந்தாலும் கூட, நம்மை உற்சாகப்படுத்த ஒருவர் இருந்தால் எதையும் சாதிக்கலாம் என்ற நம்பிக்கையூட்டுகிறது இந்தப் படம். இதன் இயக்குநர் யாங் லினா.

ஒரு வித்தியாசமான திரில்லர் படத்தைப் பார்க்க வேண்டுமா? உங்களுக்காகவே ‘அமேசான் ப்ரைமி’ல் வெளியாகியிருக்கிறது, ‘ஹாலந்து’ எனும் ஆங்கிலப்படம். தமிழ் டப்பிங்கிலும் காணக்கிடைக்கிறது. 

படத்தின் கதை 2000ல் நடக்கிறது. அமெரிக்காவின் மிச்சிகன் மாகாணத்தில் உள்ள ஹாலந்தில் ஆசிரியையாக வேலை செய்து வருகிறாள் நான்சி.நடுத்தரக் குடும்பத்தைச் சேர்ந்த நான்சிக்கு ஃபிரட் என்ற கணவனும், 13 வயதில் ஹாரி என்ற மகனும் இருக்கிறார்கள்.

ஃபிரட்டிடம் போலராய்டு கேமராவே இல்லை. ஆனால், அவரிடம் சில போலராய்டு புகைப்படங்கள் இருக்கின்றன. இதைக் கவனிக்கும் நான்சிக்கு ஃபிரட்டின் மீதான சந்தேகம் அதிகமாகிறது.