ஒவ்வொரு நாளும் தங்கைக்குப் புதுப்புது ஸ்டைலில் ஜடை பின்னி விட்டிருக்கிறான் அண்ணன். தினமும் ஒருமுறை ஜடை பின்ன அதிகபட்சம் 20 நிமிடங்களே எடுத்துக்கொள்கிறான். ஒரு நாள் பின்னியதைப் போலவே, அடுத்த நாளும் அவன் பின்னுவதில்லை. மட்டுமல்ல, இதற்கு முன்பு யாருமே அந்த மாதிரி ஸ்டைலில் ஜடை பின்னியதே இல்லை. 

இதுவரைக்கும் 300க்கும் மேலான தனித்துவமான ஸ்டைல்களில் ஜடை பின்னி விட்டிருக்கிறான். ஒவ்வொரு நாளும் தனது மகளுக்கு மகன் ஜடை பின்னும் அற்புத தருணங்களை வீடியோவாகப் பதிவு செய்து சமூக வலைத்தளங்களில் தட்டி விட்டிருக்கிறார் அம்மா. அந்த வீடியோக்கள் 1.5 கோடிக்கும் அதிகமான பார்வைகளை அள்ளி, வைரலாகிவிட்டன.

இந்த ஜடை பின்னலை அவன் எங்கேயும் கற்கவில்லை. மனதில் தோன்றும் கற்பனைப்படி செய்து பார்க்கிறான். 

‘‘எனது மகளுக்கு ஒரு வயதாக இருந்தபோதே மகன் ஜடை பின்ன ஆரம்பித்துவிட்டான். அவனுக்கு அது பிடித்திருக்கிறது. அதில் புதிதாக ஏதாவது செய்ய விரும்புகிறான். மகனின் திறமையைக் கேள்விப்பட்டு, பக்கத்து வீட்டிலிருக்கும் குழந்தைகள் எல்லாம் ஜடை பின்னுவதற்கு வருகின்றனர். அவர்களுக்கும் விதவிதமான ஜடை பின்னிவிடுகிறான்...’’ என்கிறார் அம்மா.