வீடு பற்றிய கிளாசிக் கமர்ஷியல் படம்... 3 BHK ரகசியம்

‘‘என்னுடைய முந்தைய படங்கள்ல இருந்து இந்த படம் முற்றிலும் வேறு ஒரு டோனா இருக்கும். திரில்லர், ஆக்ஷன் இதெல்லாம் இல்லாம ஒரு லைட் வெயிட்டான குடும்ப படம் இது...’’ நிதானமாகவும் அழுத்தமாகவும் சொல்கிறார் ‘3BHK’ இயக்குநரான  கணேஷ்.

‘8 தோட்டாக்கள்’, ‘குருதி ஆட்டம்’... இப்ப ‘3BHK’?

பொதுவா என்னுடைய படங்கள் திரில்லர், க்ரைம்னுதான் எதிர்பார்க்கிறார்கள். அந்த டெம்ப்ளேட்டை உடைக்க நினைக்கிறேன். ஓர் எழுத்தாளரா எல்லா கதையும் எல்லாருக்கும் சொல்லணும். எந்த எழுத்தாளரும் ஒரு க்ரைம் திரில்லர் கதைக்குள்ள பார்வையாளனை ஈஸியா கடத்திட முடியும். ஆனா, தினம் தினம் நடக்கிற குடும்பச் சூழல், சமூக சுற்றம் இதை மையமாக வைத்து ஒரு படம் எடுத்து அதில் பார்வையாளனை கடத்தறதுதான் பெரிய சவால்.

அந்த சவாலை அனுபவிக்கணும்னு நினைச்சேன். இங்கிலீஷ் தெரியாத மக்களுக்கு கூட இந்த ‘BHK’ அர்த்தம் புரியும். அந்த அளவுக்கு வீட்டுத் தேவையும் வீட்டின் முக்கியத்துவமும் நம்ம கிட்ட இருக்கு. அதனால்தான் ‘3BHK’னு ஆங்கிலத்திலேயே பெயரும் தேர்வு செய்தேன்.

ஏன் குறிப்பாக 3 பெட்ரூம் வீடு?

நமக்கென ஒரு சொந்த வீடு வாங்கணும் என்கிற எண்ணம் தினம் பத்து ரூபாய் சம்பாதிக்கிற மனுஷனுக்கு கூட கனவா இருக்கு. ஏதோ ஒரு கட்டத்தில் எல்லோருமே அதை நோக்கிதான் ஓடிக்கிட்டு இருப்போம். கைக்கு எட்டா தூரத்தில் இருந்தும் கூட அதற்கான ஓட்டம் நிற்காது.

ஒரு நான்கு வகையான பொருளாதார நிலை இருக்கு. ஏழை, மிடில் கிளாஸ், அப்பர் மிடில் கிளாஸ், பணக்காரன். இதில் ஏழை டூ மிடில் கிளாஸ் வருவது மிகக் கடினம். அதே சமயம் மிடில் கிளாஸ் டூ அப்பர் மிடில் கிளாஸ் தொடும்போதுதான் சமூக அரசியல் சிக்கலுக்குள்ள  மாட்ட ஆரம்பிப்போம். அதே சமயம் எனக்குன்னு ஒரு ரூம் வேணும்... நானும் என் மனைவியும் தனியா இருக்கணும்னு எப்ப யோசிக்க ஆரம்பிச்சானோ அன்னைக்கு அவன் அப்பர் மிடில் கிளாஸ்.