சமீபத்தில் அர்ஜென்டினா கால்பந்து கேப்டன் லியோனல் மெஸ்சி இந்தியா வந்திருந்தார். கொல்கத்தாவின் சால்ட் லேக் மைதானத்தில் அவரைக் காண ஆயிரக்கணக்கான ரசிகர்கள் திரண்டிருந்தனர். 

ஆனால், அவரை சரியாகக்கூட ரசிகர்களால் பார்க்கமுடியவில்லை. இதற்காக பலரும் 4 ஆயிரம் முதல் 12 ஆயிரம் ரூபாய் வரை பணம் கொடுத்து டிக்கெட் எடுத்திருந்தனர். இந்நிலையில் கோபமடைந்த ரசிகர்கள் அந்த மைதானத்தையே அடித்து நொறுக்கினர். 

இந்தச் சம்பவம் உலகம் முழுவதும் வைரலானது. இதேபோல் கடந்த ஜூன் மாதம் ஐபிஎல்லில் முதல்முறையாகக் கோப்பையை வென்ற பெங்களூரு அணிக்கு வெற்றி விழா கொண்டாட்டம் நடத்தப்பட்டது. அப்போதும் தங்கள் ஆதர்ச வீரர்களைப் பார்க்கக்கூடியபோது கூட்டநெரிசலில் சிக்கி 11 பேர் உயிரிழந்தனர். 

இதேபோல் தமிழகத்தில் கரூர் சம்பவம். பொதுவாக மக்கள் தங்கள் ஆதர்ச நடிகர், நடிகைகளையோ, வீரர்களையோ, ஆன்மீகத் தலைவர்களையோ பார்க்கும் ஆர்வத்தில் கூட்ட நெரிசலில் சிக்கிக் கொள்கின்றனர். அல்லது அவர்களைப் பார்க்க முடியவில்லை என்றால் வெறித்தனமான செயல்களில் ஈடுபடுகின்றனர். 

சமீபமாக இந்தப் போக்கு அதிகரித்துள்ளதாகக் குறிப்பிடுகின்றனர் உளவியல் நிபுணர்கள். இதனை அவர்கள் Mob psychology, அதாவது கும்பல் உளவியல் எனக் குறிப்பிடுகின்றனர். இந்த மாப் சைக்காலஜி குறித்து சென்னையைச் சேர்ந்த உளவியல் நிபுணர் சுனில்குமாரிடம் பேசினோம்.  

‘‘ஒரு தனி மனிதனுடைய நடத்தை என்பது ஒரு கும்பலுடன் சேரும்போது உருவாகும் மனநிலையைத்தான் கும்பல் உளவியல்னு சொல்வோம்.அதாவது ஒரு தனிப்பட்ட மனிதனுடைய நடத்தையை எடுத்து பார்த்தால் ஒருவிதமாக இருக்கும். அதே தனிப்பட்ட மனிதன் ஒரு கும்பல்ல இருக்கும்போது அவனோட நடத்தை அப்படியே மாறும்.

இதில் இன்னொரு விஷயம்- சமூக உளவியல் அடிப்படையில் பார்க்கும்போது எனக்கு தனிப்பட்ட ஒரு அடையாளம் இருக்கும். நான் தனியாக இருக்கும்போது என்னைத் தனிப்பட்ட அடையாளமே இயக்கும். 

இதுவே நீங்க ஒரு கும்பல்ல போயிட்டா அந்த கும்பலின் அடையாளத்திற்கு நீங்க மாறிடுவீங்க. உதாரணத்திற்கு இப்போ ஒரு கோயில்ல க்யூல நிக்கிறீங்க. அங்க எல்லாரும் கோவிந்தானோ அல்லது அரோகரானோ சொல்லும் போது நீங்க்களும் அப்படியே அதை அந்தக் கும்பல்ல சொல்றதுக்கான வாய்ப்பு அதிகம். 

அப்போ, அங்க தறிகெட்ட நடத்தைகள் உருவாவதற்கான வாய்ப்பு அதிகம். அதாவது அவர் கும்பல்ல சேரும்போது அந்தக் கும்பலின் தாக்கம் அவரை அதிகப்படியாக கோபப்படுத்துறதும், கும்பலின் அடையாளமாக அவருடைய அடையாளம் மாறிடுறதும், அவருக்கான பொறுப்பு கும்பலோட பொறுப்பாக மாறுவதும் அசம்பாவிதங்களை ஏற்படுத்தும். 

அதனால் ஒரு கும்பல் சேர்ந்தாலே அது ஆபத்துதான். இதை ஆபத்துனு சொல்றதவிட அங்க ஒரு கூட்டு சக்தி இயங்குது என்பதே பாயிண்ட்...’’ என்கிறவர் மேற்கொண்டு தொடர்ந்தார்.

சட்டத்தை மதிக்கிறவங்ககூட ஒரு குரூப்புக்குள்ள போயிட்டாங்கன்னா அவங்க வன்முறையில் இறங்குவதற்கான வாய்ப்புகள் அதிகம்.அப்புறம், அந்த குரூப்ல யாராவது ஒண்ணு சொன்னா போதும். அது அப்படியே வதந்தி மாதிரி சீக்கிரமாகவே பரவிடும். அது தாக்குதல் நடக்கும் அளவிற்குப் போயிடும். 

அடுத்து முக்கியமா, இந்த கும்பல் மனநிலை எப்போ சூப்பரா வேலை செய்யும்னா அதுக்கு வசீகரமான தலைவர் வேணும். அதாவது ஒரு கவர்ச்சிகரமான தலைவரால் மட்டும்தான் இந்த கும்பல் உளவியலை அணி திரட்ட முடியும். காரணம், இந்த வசீகரத் தலைவர்களை நார்மலாக நெருங்க முடியாது. தூரமாகத்தான் இருப்பாங்க. தொடமுடியாது.

என்ன தீர்வு? தனிப்பட்ட நபர்கள் எல்லோரும் தனிப்பட்ட முறையில் எவ்வளவு நல்லவர்களாக வேண்டுமானாலும் இருக்கலாம். 

பண்புடனும்,  கருணை உள்ளத்துடனும் இருக்கலாம். பகுத்தறிவுடன் வேலை செய்யலாம். அதேநேரம் அவர் ஒரு கும்பல்ல மாட்டிக்கிட்டார்னா இதெல்லாம் அங்க வேலை செய்யும்னு சொல்லமுடியாது. அது அவரின் குற்றமும் கிடையாது. அப்போ ஒரு கும்பலுக்குள்ள நாம் போகும்போது அங்க போகணுமா, வேண்டாமா என்பதை முதல்ல முடிவெடுக்கணும். 

ஒருவேளை போனால், அந்த கும்பல் ஒரு அளவுக்குமேல் தறிகெட்டுப் போகுதுனு ஆரம்பத்திலேயே உணர்ந்துட்டோம்னா அந்த கும்பல்ல இருந்து தூரமாக தள்ளி நிற்பது நல்லது. 

அந்த தகவலின் உண்மைத்தன்மையை அறிந்து வெளிப்படுத்தணும். கோபத்தையோ, பயத்தையோ கிளப்புகிற மாதிரியான விஷயங்களை நாம் ஷேர் பண்ணாமல் இருக்கணும். இல்லனா டிஜிட்டல் மாப் வேலை செய்யும். 

இப்போ, கும்பல் மனநிலை தாக்கத்துல இளம் தலைமுறையினர் ஈசியாக மாட்டிக்கிறாங்க. காரணம், அவங்களுக்கு இந்தக் காலக்கட்டத்துல உணர்ச்சிகள் அதிகமாக வேலை செய்யும். அதனால் அவர்கள் கவனமாக இருக்கணும்...’’ என எச்சரித்தபடி விடைகொடுத்தார் உளவியல் நிபுணர் சுனில்குமார். =