நடுச்சாமம். ஆயிரக்கணக்கில் பெருங்கூட்டம். மக்களின் ஆரவாரம். ஆங்காங்கே கண்களைப் பறிக்கிறது ஒளிரும் ட்யூப் லைட், எல்இடி, விளக்குகள் வெளிச்சம்.

ஒரு கட்டத்தில் உடுக்கடிக்காரர்கள் முன்னிலையில் இளம்பெண்கள், நடுத்தர வயது பெண்கள் முப்பது நாற்பது பேர் அணிவகுக்கிறார்கள். அவர்களுக்கு நடுவே வயதில் பெரியவர் ஒருவர். வரிசையாக இருக்கும் மலர் மாலைகளை எடுத்து ஒரு பெண்ணிடம் கொடுக்கிறார். அதை வாங்கிய அந்தப் பெண் வரிசையாக நின்ற மற்ற பெண்களின் கழுத்தில் அணிவிக்கிறார்.

உடுக்கடிப் பாட்டுப் படிப்பவர்கள் அவர்களுக்கு தீர்த்தம், திருநீறு தெளிக்கிறார்கள். அப்படியே ஓயாது உடுக்கடிப் பாடலைப் பாடிக்கொண்டே அந்த பரணின் மீது ஏறுகிறார்கள். உச்சியில் வீற்றிருக்கும் தெய்வச்சிற்பங்களுக்கு ஊதுபத்தி கற்பூரம் கொளுத்துகிறார்கள். ஆரத்தி எடுத்து தீபாராதனை காட்டுகிறார்கள். தொடர்ந்து அங்கேயே நின்று மறுபடி ஓங்காரமெடுத்துப் பாடுகிறார்கள்.

பிள்ளையில்லாத தாமரை நாச்சிக்கும், குன்னுடையார் கவுண்டருக்கும் பிள்ளை வரம் கொடுக்கிறார்கள் சிவ பார்வதி. அந்த வரம் வாங்கிய உடுக்கடி கதைப்பாடல் பாடியவர்கள் கீழே பிள்ளை வரம் ஏந்தி மடியேந்தி கண்ணீர் மல்க அமர்ந்திருந்த பெண்களுக்கும் பிள்ளை வரம் கொடுப்பதாகக் கருதி எலுமிச்சை கனியை மடியில் தபசு கம்பத்தின் உச்சியிலிருந்தே போடுகிறார்கள்.

பொன்னர் சங்கர், அருக்காணித் தங்கம் கருவுற்ற அடுத்தநாள் நிகழ்வில் நிஜமாகவே வளைகாப்பு வைபவம் பல்லாயிரக்கணக்கானோர் முன்னிலையில் நடக்கும். இதிலும் குழந்தையில்லாத பெண்கள் பங்கேற்பர்.

அதேபோல் குழந்தை பிறந்த பின்பு அசலாகவே தொட்டில்கள் கட்டி ஆட்டுவர். குழந்தையில்லாத பெண்களே இந்தத் தொட்டில்களை ஆட்டுவர். இப்படியே பொன்னர் சங்கர் திருமணம், அவர்கள் யுத்தத்தில் மாண்டு படுகளத்தில் கிடப்பது, தலையூர்க்காளி என்பவருடன் போர்தொடுப்பது, அறுபதடி கொம்பன் என்ற பன்றியை வீழ்த்துவது எல்லாமே அசலாக காட்சி ரூபமாகவே நடத்துவர்.

நம்பியாம்பாளையம் கிராமத்தில் இந்த தவசுக்கம்பம் நிகழ்ச்சியில் பங்கேற்றவர்கள் மட்டும் ஐயாயிரம் பேருக்கு மேல் இருக்கும். சுற்றுவட்டாரத்தில் இருபது முப்பது கிராமங்களும் திரண்டிருந்தன. இதேபோல் மற்ற நாள் நிகழ்ச்சிகளுக்கும் கூட கூட்டம் கட்டுக் கொள்ளாமல் வந்திருக்கிறது. இந்த நிகழ்ச்சியை நடத்தியவர்கள் திருமூர்த்தி தலைமையிலான குழு.