#boycott bollywood... என்ன நடக்கிறது இந்தித் திரையுலகில்..?

அலசுகிறார்கள் திரையுலக விமர்சகர்கள்

‘தடை செய்’ என்பதற்கும் ‘மறுத்துவிடு‘ என்பதற்கும் பெரிய வித்தியாசம் இல்லை. அதுதான் இப்போது இந்தி(ய) சினிமாவில் நடந்து வருகிறது. ‘பாய்காட் பாலிவுட்’ என்ற எதிர்பாராத தாக்குதலால் அமீர்கான், ஷாருக்கான், ஹிர்த்திக் ரோஷன், ரன்பீர் கபூர் போன்ற முன்னணி நடிகர்களின் படங்கள் பெரிய சவால்களையும், அச்சுறுத்தல்களையும் சந்தித்து் வருகின்றன.  

இந்த பாய்காட் கலாசாரம் இப்போதைய டிரெண்ட் என்று சொல்ல முடியாது. 2014ல் ராஜ்குமார் ஹிரானி இயக்கத்தில் அமீர்கான் நடித்த ‘பிகே’ படம் பாய்காட் பிரச்னையை சந்தித்தது. ‘வேற்று மதத்தைச் சேர்ந்த அமீர்கான் எப்படி சிவன் வேடத்தில் நடிக்கலாம்’ என்று சில இந்து அமைப்புகள் போர்க்கொடி தூக்கின. படக்குழு முறையான விளக்கம் அளித்த நிலையிலும் அந்தப் படத்தின் வசூல் பாய்காட் பிரச்னையால் பாதிக்கப்பட்டது. அந்த நிலையிலும் ‘பிகே’ உலகளவில் 4000 திரையரங்குகளில் வெளியாகி 100 கோடி வசூல் செய்தது.

சில வருடங்களுக்குப் பிறகு அமீர்கான், தன் மனைவி கிரண் ராவ் ‘இந்தியாவில் வசிப்பது பாதுகாப்புக்குரியது அல்ல’ என்று தன்னிடம் சொன்னதாக பொதுவெளியில் சொன்னது சர்ச்சைகளுக்கு வழிவகுத்தது. அதன்பிறகு வெளிவந்த அமீர்கானின் ‘டங்கல்’ நஷ்டத்திலிருந்து தப்பியது. ஆனால், சமீபத்தில் வெளிவந்த ‘லால்சிங் சத்தா’ பழைய சர்ச்சைகளால் பலத்த காயமடைந்தது. அதில் நாயகியாக நடித்த கரீனா கபூர் ஒரு பேட்டியில், ‘என்னுடைய படங்களைப் பார்ப்பதும், பார்க்காமல் இருப்பதும் ரசிகர்களின் சுதந்திரம். யாரையும் நான் வற்புறுத்தமாட்டேன்’ என்று கூறியிருந்தார்.