சமீபத்தில் ஆசிய குத்துச்சண்டை சாம்பியன்ஷிப் போட்டி ஜோர்டான் தலைநகர் அம்மானில் நடந்து முடிந்தது. இதில், 12 பதக்கங்களைத் தட்டி வாகைசூடியிருக்கிறது இந்தியா.

இருபத்திரெண்டு வயதே நிரம்பிய பர்வீன் அரியானா மாநிலத்தின் ரூர்க்கி என்ற சிறிய கிராமத்தைச் சேர்ந்தவர். அங்கு தனக்கு கிடைத்த வாய்ப்புகளைப் பயன்படுத்தி இன்று உலகளவில் முத்திரை பதித்திருக்கிறார். விவசாயத்தைத் தொழிலாகக் கொண்ட பர்வீனின் குடும்பம் வறுமையானது. இதனால், அவரின் பாக்ஸிங் கனவு கானல்நீர் என்றே நினைத்து வந்தார்.

ஆசிய சாம்பியன்ஷிப் போட்டியில் வென்ற முதல் மகாராஷ்டிரா பெண் என்கிற பெயரைப் பெற்றுள்ளார் அல்ஃபியா பதான். அதுவும் தங்கப் பதக்கம். நாக்பூரைச் சேர்ந்த பத்தொன்பது வயதே ஆன இவர் 81 ப்ளஸ் பிரிவில் இந்தச் சாதனையைச் செய்துள்ளார்.

2017ல்தான் குத்துச்சண்டை விளையாட்டிற்குள் நுழைந்தார் அல்ஃபியா. இவரின் தந்தை அக்ரம்கான் நாக்பூரில் காவல் உதவி ஆய்வாளராக இருக்கிறார். இரண்டு சகோதரர்களில் ஒருவர் எறிபந்திலும் மற்றொருவர் குத்துச்சண்டையிலும் தேசிய அளவில் விளையாடி பதக்கங்கள் வென்றவர்கள்.