காலநிலை மாற்றத்தால் இயற்கையைப் பாதுகாக்கவும், மரங்களை வளர்க்கவும் இன்று மக்களிடையே பரவலான விழிப்புணர்வு வந்துள்ளது. இத்தகைய விழிப்புணர்வு பணிகளை நல்லுள்ளம் கொண்ட தன்னார்வலர்கள் பலர் தொடர்ந்து முன்னெடுத்து வருகின்றனர்.

அவர்களில் ஒருவர்தான் இந்தக் கட்டுரையின் நாயகன், ‘பரணம்’ பழனிசாமி. 37 வயதான இந்த இளைஞர். சமீபத்தில் இயற்கையையும் பிரபஞ்சத்தையும் பாதுகாப்பதன் அவசியத்தை வலியுறுத்தி சென்னையிலிருந்து கன்னியாகுமரி வரை சுமார் 710 கிலோமீட்டர் தூரம் சாதாரண சைக்கிளில் பயணித்து நல்லதொரு விழிப்புணர்வை செய்துவிட்டு திரும்பியிருக்கிறார்.   

எனக்கு எப்பவுமே சப்போர்ட் பண்ணினது ஆசிரியர்கள்தான். அதனால்தான் நானும் ஆசிரியராக வரணும்னு ஆசைப்பட்டேன். ஆனா, அது நடக்கல. இதுக்கிடையில் கரஸ்ல பி.எஸ்சி மேத்ஸ் பண்ணி முடிச்சேன். 

பிறகு, 2015ல் பள்ளிகளில் ஆய்வக உதவியாளர் பணிக்குத் தேர்வெழுதினேன். இதற்கு 2017ம் ஆண்டு ரிசல்ட் வந்தது. இதுலயும் மாவட்ட அளவில் முதலாவதாக வந்தேன். அப்படியாக நான் படிச்ச எங்கக் கிராமத்து அரசு மேல்நிலைப் பள்ளியிலேயே ஆய்வக உதவியாளராக வேலை கிடைச்சது.

2017ம் ஆண்டு ஏப்ரல் மாசம் ஸ்கூல்ல வேலைக்குச் சேர்ந்ததுமே அடுத்தகட்ட சேவையைத் தொடங்கிட்டேன். அந்தாண்டு அக்டோபர் 15ம் தேதி அப்துல் கலாம் அய்யா பிறந்தநாளில் டிஎன்பிஎஸ்சி உள்ளிட்ட போட்டித் தேர்வுக்கான கோச்சிங் சென்டரை ஆரம்பிச்சேன்...’’ என்கிறவர், அதற்கான காரணத்தைத் தொடர்ந்தார்.

 ‘‘நான் போட்டித் தேர்வுக்குப் படிக்கும்போது மிகுந்த சிரமப்பட்டேன். குரூப் 1 தேர்வில் பாஸாகி ஒரு அதிகாரியாக வரணும்னு கனவுடன் சென்னைக்குப் போனேன். ஆனா, அங்கிருந்த கோச்சிங் சென்டர்கள்ல என்னால் பணம் கட்டமுடியல. அதனால் வந்த சில நாட்களிலேயே ஊருக்குக் கிளம்ப வேண்டியதாகிடுச்சு. 

அப்போ, பஸ்ல போகும்போது என்னை மாதிரி எவ்வளவோ ஏழை எளிய மாணவர்கள் இருப்பாங்களேனு தோணுச்சு. அவங்கெல்லாம் போட்டித் தேர்வுக்கு எப்படி படிப்பாங்கனு யோசிச்சேன். அதனால் முதல்ல கோச்சிங் சென்டரை ஆரம்பிக்கணும்னு ஊருக்கு வர்றதுக்கு முன்னாடியே முடிவெடுத்திட்டேன். 

பிறகு என் நண்பன் இளவரசனிடம் ஒரு கோச்சிங் சென்டர் ஆரம்பிச்சு இலவசமாகத் தேர்வுக்குப் பயிற்சி கொடுப்போம்னு சொன்னேன். அவரும் அரசுப் பணியில்தான் இருக்கார். என்னுடைய எண்ணத்திற்கு ஓகே சொன்னார். பிறகு இன்னும் சில நண்பர்கள் உதவினாங்க. எல்லோரும் சேர்ந்து இந்தக் கோச்சிங் சென்டரை ஆரம்பிச்சோம்.  

இதன்பிறகு இங்கே வந்து தங்கி படிக்க வசதி செய்யலாமேனு தோணுச்சு. 

இந்த ஐடியாவை நண்பர்களிடம் பகிர்ந்தேன். அப்படியாக என்னுடைய சொந்த நிலத்தை ஒதுக்கினேன். நண்பர்கள் சிமெண்ட், ஜல்லி, மணல்னு பொருட்களாக வாங்கிக் கொடுத்து உதவினாங்க. அப்படியாக இப்ப ஒரு கட்டடம் கட்டியிருக்கோம். இன்னும் சில வாரங்களில் இந்தக் கட்டடம் திறப்பு விழா காணவிருக்கு. 

இப்போ, ஆன்லைன் வழியே எல்லா மாவட்டத்துல இருந்தும் படிக்கிறாங்க. இவங்க கூகுள் மீட் மூலம் கலந்துக்கிறாங்க. இதுக்கு தினமும் பாஸ்வேர்டு சொல்லிடுவோம். ஆப்சென்ட் ஆகாமல் கலந்திருக்கிறவங்களுக்கு மட்டுமே பாஸ்வேர்டு கொடுப்போம். 

ஒருநாள் லீவு போட்டாலும் கொடுக்கமாட்டோம்’’ என்கிறவர், சைக்கிள் பயணம் பற்றிக் குறிப்பிட்டார். ‘‘இதுக்கிடையில் நான் காலநிலை மாற்றத்தால் ஏற்பட்டுள்ள பிரச்னையை சரிசெய்ய இயற்கையை பாதுகாக்கவும், மரம் வளர்க்கவும் நிறைய பிரச்சாரங்கள் செய்திட்டு வந்தேன். 43 மலைப்பயணங்களும் செய்திருக்கேன். 

அப்படியாக பிரபஞ்சத்தைப் பாதுகாக்கணும்னு வலியுறுத்தி சென்னை அண்ணா சமாதியில் இருந்து கன்னியாகுமரி விவேகானந்தர் மணிமண்டபம் வரை சைக்கிள் பயணம் மேற்கொண்டேன். இதுக்கு மொத்தம் எட்டு நாட்கள் எடுத்தது. 

போகும் வழியில் இயற்கையை பாதுகாக்கணும்னா மரங்களை நட்டு வளர்க்கணும்னு விழிப்புணர்வு செய்திட்டு போனேன். கடந்த 2021ல் என் அம்மா இறந்துட்டாங்க. இப்போ, என் மனைவியும் குழந்தைகளும்தான் என்னை ஊக்கப்படுத்துறாங்க.இயற்கையை பாதுகாத்தால்தான் நாம் எல்லோருமே நல்லாயிருப்போம்...’’ என ஆத்மார்த்தமாகச் சொன்னார் பழனிசாமி.