மத்திய அட்லாண்டிக் கடலில் இருக்கும் ஒரு சிறிய தீவுக்கூட்டம் கேப் வெர்டே. சுமார் ஆறு லட்சம் மக்கள்தொகையே கொண்டது. அப்படியான ஒரு தீவு நாடு முதல்முறையாக வரும் 2026ம் ஆண்டு அமெரிக்கா, கனடா, மெக்ஸிகோ இணைந்து நடத்தும் 23வது உலகக் கோப்பை கால்பந்து போட்டிக்குத் தகுதி பெற்றிருப்பது பலரையும் ஆச்சரியத்தில் ஆழ்த்தியிருக்கிறது.

மேற்கு ஆப்ரிக்காவிலுள்ள செனகல் நாட்டின் தலைநகர் டக்காரில் இருந்து வான்வழி பயணத்தில் 754 கிமீ தொலைவில் வருகிறது கேப் வெர்டே தீவுக்கூட்டம். மொத்தம் பத்து தீவுகள் கொண்டது இந்தத் தீவு நாடு. இது போர்ச்சுக்கல் நாட்டிலிருந்து கடந்த 1975ம் ஆண்டு சுதந்திரம் பெற்று தனித் தீவு நாடானது. இந்நாட்டு மக்களான கேப் வெர்டேயர்கள் கால்பந்தில் அதீத ஆர்வம் கொண்டவர்கள். இன்னும் சொல்வதென்றால் குட்டித் தீவு நாடான இதில் குறைந்தது 30 கால்பந்து மைதானங்களாவது இருக்கும். அந்தளவுக்குக் கால்பந்து காதலர்கள் இவர்கள்.

அப்படியாக ‘கேப் வெர்டே’ தேசிய அணி கட்டமைக்கப்பட்டது. தற்போதைய அணியில் உள்ள பல வீரர்கள் பிரான்ஸ், போர்ச்சுக்கல் உள்ளிட்ட நாடுகளில் பிறந்தவர்கள். இவர்கள் ஐரோப்பாவில் பயிற்சி பெறுவதால் இன்னும் சிறப்பாக திறனை வெளிப்படுத்துகின்றனர். 

இந்த நிலையில் கேப் வெர்டே நாட்டிற்கு ஆரம்பத்தில் இருந்தே எப்படியாவது உலகக் கோப்பையில் தகுதி பெற்றுவிட வேண்டும் என்ற தீராக்கனவு இருந்தது. இதனால் கடுமையாக உழைத்து கடந்த 2002ம் ஆண்டு உலகக் கோப்பைக்கான முதல்சுற்று தகுதிப் போட்டியில் கலந்துகொண்டது.