உலகளவில் பிரபலமான ரேஸிங் சாம்பியன்ஷிப் போட்டி, ‘வேர்ல்டு ராலி - ரெய்டு சாம்பியன்ஷிப்’. இதனைச் சுருக்கமாக ‘W2RC’ என்று அழைக்கின்றனர். ஒவ்வொரு வருடமும் உலகின் வெவ்வேறான நாடுகளில் ஐந்து முறை நடக்கிறது இந்தப் போட்டி. கார், பைக், டிரக் உள்ளிட்ட வாகனங்களுக்கு தனித்தனி பிரிவுகளில் போட்டிகள் நடக்கின்றன. 

சமீபத்தில் போர்ச்சுக்கலில் ‘W2RC’ நடந்தது. இதில் பெண்களுக்கான பைக் ரேஸில் கலந்துகொண்டு, வெற்றிபெற்றிருக்கிறார் ஐஸ்வர்யா பிஸே. ‘W2RC’யில் வெற்றி பெற்ற முதல் இந்திய மற்றும் ஆசியப் பெண்ணும் இவர்தான். மட்டுமல்ல, ‘W2RC’யில் கலந்துகொண்ட முதல் இந்தியப் பெண்ணும் இவரே.

கடந்த ஒரு வருடமாகத்தான் விளையாட்டு சம்பந்தமான பத்திரிகைகளிலும், ஆன்லைன் செய்தித் தளங்களிலும் ஐஸ்வர்யா பிஸேவின் பெயர் அடிக்கடி இடம் பிடிக்கிறது. 

இந்தியாவின் சர்க்யூட் அண்ட் ஆஃப் ரோடு மோட்டார் சைக்கிள் ரேஸராக வலம் வரும் முக்கியமான பெண் ரேஸர் இவர். சத்தமே இல்லாமல் பைக் ரேஸில் பல சாதனைகளைச் செய்து வருகிறார். இத்தனைக்கும் பெரிதாக இந்தியப் பெண்கள் ஈடுபடாத ஒரு விளையாட்டுத்துறை இது. 

மட்டுமல்ல, ஒரு வருடத்துக்கு முன்பு மோட்டார் ஸ்போர்ட்ஸில் மூன்று உலக சாம்பியன் பட்டங்களை வென்ற முதல் இந்தியர் என்ற பெருமையைத் தன்வசமாக்கியிருக்கிறார் ஐஸ்வர்யா. 

2018ல் நடந்த விபத்து அவரை முடக்கியது. ஐஸ்வர்யாவின் பைக் ரேஸ் வாழ்க்கை அவ்வளவுதான் என்று சுற்றியிருந்தவர்களும் அவரை முடக்கப் பார்த்தனர். ஆனால், புது பலத்துடன் திரும்பி வந்து, பல சாதனைகளைப் படைத்து வருகிறார். 

ஆம்; 2019ம் வருடம் நடந்த பெண்களுக்கான உலகளாவிய மோட்டார் சைக்கிள் பந்தயமான எஃப்ஐஎம் பஜாஸ் வேர்ல்டு கப்பில் பங்கேற்று வெற்றி பெற்றார். இதன் மூலம் உலகளவிலான மோட்டார் ஸ்போர்ட்ஸில் வெற்றிபெற்ற முதல் இந்தியப் பெண் என்ற பெருமையைப் பெற்றார். இதற்கு முன்பு இந்தியாவைச் சேர்ந்த எந்தப் பெண்ணும் உலகளவிலான பைக் ரேஸில் கலந்துகொண்டு, வெற்றி பெறவில்லை என்பது குறிப்பிடத்தக்கது. 

“நான் ரேஸிங்கில் ஈடுபட ஆரம்பித்தபோதுதான் ஒரு விஷயத்தை தெரிந்துகொண்டேன். பைக் ரேஸில் ஒரு தடகள வீரரின் திறமையும், நுட்பமும்தான் முக்கியம் என்பதுதான் அந்த விஷயம்.