சமீபத்தில்தான் இஸ்ரேல், காசா போர்நிறுத்தம் வந்திருக்கிறது. இருந்தும்கூட அங்கே இன்னும் பதற்றங்கள் தணியவில்லை. இதற்கிடையே ஆப்கானிஸ்தானும், பாகிஸ்தானும் தங்கள் எல்லையில் சண்டையிட்டு வருவது உலக நாடுகளைக் கவலையில் ஆழ்த்தியிருக்கிறது.

கடந்த வாரம் இருநாடுகளும் மோதிக்கொண்ட போது பாகிஸ்தான் வீரர்கள் 58 பேர் கொல்லப்பட்டதாகவும், தங்கள் தரப்பில் ஒன்பது பேர் இறந்ததாகவும் தலிபான் செய்தியில் சொல்லப்பட்டது. 

இதனைத் தொடர்ந்து பாகிஸ்தான் ராணுவம், வான்வழி மற்றும் தரைவழி தாக்குதல்களை வேகப்படுத்த அந்தப் பகுதியே பதற்றமானது. அடுத்ததாக ஆப்கானிஸ்தானின் 200 தலிபான்களை வீழ்த்தியதாக பாகிஸ்தான் தெரிவித்தது. இந்நிலையில் இருதரப்பிலும் சண்டை உக்கிரமாகி வருகிறது.    

தூரந்த் கோடுஆப்கானிஸ்தானையும் பாகிஸ்தானையும் பிரிக்கும் 2,640 கிலோமீட்டர் நீளமுள்ள சர்வதேச எல்லைக் கோடு இது. 

கடந்த 1893ம் ஆண்டு ஆப்கானிஸ்தான் ஆஃப் எமிரேட்ஸையும், பிரிட்டிஷ் இந்தியப் பேரரசையும் பிரிக்கும் சர்வதேச எல்லையாக இது நிர்ணயிக்கப்பட்டது. அப்போது ஆப்கானிஸ்தானின் அமீர் அப்துர் ரஹ்மான்கானும், அந்தப் பகுதி பிரிட்டிஷ் இந்திய சிவில் சர்வீஸ் அதிகாரியாக இருந்த சர் ஹென்றி மார்ட்டிமர் தூரந்தும் சேர்ந்து இந்த எல்லையை வரையறுத்தனர். அதனாலேயே இது தூரந்த் எல்லைக்கோடு என அழைக்கப்படுகிறது. 

ஆனால், அடுத்து வந்த ஆப்கானிஸ்தான் ஆட்சியாளர்கள் இந்த எல்லையை ஏற்கவில்லை. இந்த தூரந்த் கோடு பாகிஸ்தானில் உள்ள கைபர் பக்துன்க்வா, பலுச் சிஸ்தான் மற்றும் சர்ச்சைக்குரிய கில்கிட்-பால்டிஸ்தான் ஆகிய பகுதிகளை ஆப்கானிஸ்தானின் வடகிழக்கு மற்றும் தெற்கு மாகாணங்களிலிருந்து பிரிக்கிறது.  

இதில் வடகிழக்குப் பகுதியில் உள்ள பஷ்துன் பகுதிகளை ஆப்கானிஸ்தான் உரிமை கோருகிறது. ஏனெனில் ஆப்கானிஸ்தானின் மக்கள்தொகையில் நாற்பது சதவீதம் பஷ்துன்கள் உள்ளனர். பாகிஸ்தானில், இவர்களின் எண்ணிக்கை சுமார் 18 சதவீதம் வரை உள்ளது.

பாகிஸ்தான் ராணுவத்திற்கு எதிரான எதிர்ப்பை ஒன்றிணைக்க உருவாக்கப்பட்ட போராளிகளின் வலையமைப்புக் கூட்டணி இது எனச் சொல்லப்படுகிறது. இவர்கள் ஆப்கானிஸ்தான், பாகிஸ்தான் எல்லையில் பஷ்துன்களுக்கு தனி தேசம் கோரி போராடுகின்றனர். 

இதனால் பாகிஸ்தான் ராணுவத்திற்கு எதிராக சண்டையிட்டு வருகின்றனர்.இந்த அமைப்பினரும், ஆப்கானிஸ்தான் தலிபான்களும் ஒரே சித்தாந்தங்களைக் கொண்டவர்கள். 2001 முதல் 2021 வரை ஆப்கானிஸ்தானில் நடந்த போரின்போது ஆப்கான் தலிபான்களுக்கு ஆதரவாக நிறைய உதவி செய்தவர்கள் பாகிஸ்தானிய தலிபான்கள்.