உலகிலேயே அதிகமான அஞ்சலகங்கள் உள்ள நாடு, இந்தியாதான். நாடு முழுவதும் 1,64,999 அஞ்சலகங்கள் உள்ளன. இதில் 1,49,385 அஞ்சலகங்கள் கிராமப்புறங்களிலும், 15,614 அஞ்சலகங்கள் நகர்ப்புறங்களிலும் அமைந்துள்ளன. 

இ-மெயில், வாட்ஸ்அப், மெஸஞ்சர் காலத்திலும் கூட கடிதப் போக்குவரத்து நிலைத்திருக்க இந்த அஞ்சலகங்கள்தான் காரணம். இவ்வளவு அஞ்சலகங்கள் இருந்தாலும் ஹிர்போரா கிராமத்திலிருக்கும் அஞ்சலகத்துக்குத் தனி மவுசு. காரணம், அங்கே போஸ்ட்வுமனாக இருக்கும் உல்ஃபடா பனோ என்றால் அது மிகையாகாது.

காஷ்மீரின் ஷோபியன் மாவட்டத்தில் அமைந்திருக்கும் ஒரு கிராமம், ஹிர்போரா. ஸ்ரீநகரிலிருந்து 70 கிலோமீட்டர் தொலைவில் அமைந்திருக்கிறது இந்தக் கிராமம். இங்கே வசிப்பவர்கள் ஒவ்வொரு குளிர்காலத்தின்போதும் மிகப்பெரிய வாழ்க்கைப் போராட்டத்தைச் சந்திக்கின்றனர். 

குறிப்பாக நவம்பர் முதல் மார்ச் மாதம் வரையில் இக்கிராமத்தின் வெப்பநிலை -15 டிகிரி செல்சியஸுக்குச் சென்றுவிடும். நிலத்தின் மீது ஐந்து முதல் ஆறு அடி உயரத்துக்கு பனிக்கட்டிகள் சூழ்ந்திருக்கும். வீட்டிலிருந்து வெளியே செல்வதற்கான அனைத்துப் பாதைகளும் பனிக்கட்டிகளால் தடை செய்யப்பட்டிருக்கும். அதனால் பெரும்பாலான மக்கள் வீட்டைவிட்டுக் கூட வெளியில் வர மாட்டார்கள்.  

தவிர, ஹிர்போரா மக்களின் வாழ்வாதாரம் விவசாயத்தையும், தினசரி கூலி வேலைகளையும் நம்பித்தான் இருக்கிறது. கடுமையான குளிர்காலம் ஹிர்போரா மக்களின் வாழ்வாதாரத்தையும் வெகுவாகப் பாதிக்கிறது. மட்டுமல்ல, தண்ணீர் குழாய்களில் பனிக்கட்டிகள் சேர்ந்து, தண்ணீர் பாய்வதை தடுத்துவிடுவதால், தண்ணீர்ப் பற்றாக்குறையும் ஏற்படுகிறது. 

கடும் குளிரைத் தாங்குவதற்கான பிரத்யேகமான உல்லன் ஆடையை அணிந்துகொண்டு, பனிக்கட்டிகளின் மீது ஏறிச் சென்று, கடிதங்களைக் கொண்டு சேர்க்கும் உல்ஃபடாவின் பயணம் ஒரு திரைப்படமாக வேண்டிய கதை. ‘‘கடந்த 30 வருடங்களாக போஸ்ட்வுமன் வேலையைச் செய்து வருகிறேன். கடுமையான குளிர்காலத்தில் கூட நான் என் வேலையை நிறுத்துவதில்லை.