எங்கு தெரியுமா?

சதுரகிரியில்!

சதுரகிரி மலையில் ஓடுகின்ற தீர்த்தங்களும், மூலிகைகளும் பல நோய்களை தீர்க்க வல்லது. இந்த மலையை ஏறி இறங்கினால் உடலில் உள்ள வியர்வை வெளியேறி, மூலிகை கலந்த காற்று பட்டு பல நோய்கள் குணமாவதாகச் சொல்கிறார்கள். 

அதனாலேயே இன்றும் சித்த மருத்துவர்கள் பலர் குறிப்பிட்ட நட்சத்திரம், திதி கொண்ட சுபமுகூர்த்த நாளில் மூலிகைகளை இங்கிருந்து சேகரித்துச் செல்கின்றனர்.மதுரை மாவட்டத்தில் அமைந்துள்ள சதுரகிரி மலைக் கோயிலுக்கு விருதுநகர் வத்திராயிருப்பு பகுதியிலிருந்து செல்வது எளிமையான பாதை. இங்கு மலைக்கோயிலில் சுந்தர மகாலிங்கம் மற்றும் சந்தன மகாலிங்கம் என இரண்டு சுயம்பு லிங்கங்கள் உள்ளன. 

சுமார் 4500 அடி உயரத்தில் சதுரகிரி மலைக் கோயில் அமைந்துள்ளது. ‘தென் கயிலை’ என சிறப்பாகப் போற்றப்படும் சதுரகிரியில் மூலவர் சுந்தர மகாலிங்கம், அம்மன் பெயர் ஆனந்தவல்லி. 

திசைக்கு நான்கு மலைகள் வீதம் 16 மலைகள் சமமாக, சதுரமாக அமைந்துள்ள காரணத்தால் இம்மலை சதுரகிரி என்று பெயர் பெற்றது. இந்த மலை 64 ஆயிரம் ஏக்கர் பரப்பளவு கொண்டது. மலையே சிவமாக இருப்பதால் பக்தர்கள் காலில் செருப்பு அணியாமல் இம்மலை ஏறுவதை வழக்கமாகக் கொண்டுள்ளனர்.

பழனியில் உள்ள நவபாஷாண முருகன் சிலையை போகர் சதுரகிரி மலையில் தங்கியிருந்தபொழுது செய்ததாக நம்பிக்கை.இங்குள்ள. ஜோதிப்புல்லை பகலில் நீரில் நனைத்துவிட்டு இரவில் பார்த்தால் தீபம் ஏற்றியது போல் ஒளிரும். பழங்காலத்தில் சித்தர்கள் வெளிச்சத்திற்காக இந்தப் புல்லை உபயோகப்படுத்தியுள்ளனர். 

இங்கு அமாவாசை நாட்களில் தேனும் தினை மாவும் பிரசாதமாக தரப்படுகின்றன. மலையடிவாரத்தில் மலையேறும் முன்பு ஆசீர்வாத விநாயகரை வணங்கி யாத்திரையைத் தொடங்கவேண்டும். 

வழியில் ராஜயோக காளி, பேச்சியம்மன், கருப்பண்ணசாமி கோயில்கள் உள்ளன.அத்ரி மகரிஷி பூஜித்த லிங்கத்தை தரிசித்து மேலே செல்ல வழியில் கோரக்க சித்தர் தவம் செய்த குகையும், பதஞ்சலி முனிவரின் சீடர்கள் பூஜித்த லிங்கமும் காணப்படுகின்றன. 

பச்சரிப்பாறை, வனதுர்கை கோயில், பெரிய பசுக்கிடை பிலாவடி கருப்பு கோயிலை தரிசித்து விட்டு மகாலிங்கம் கோயிலை அடையலாம். இக்கோயில் தமிழக அரசு அறநிலையத் துறையின் கீழ் செயல்படுகிறது.

அகத்தியர் சதுரகிரி மலையில் தங்கி லிங்க வழிபாடு செய்து அவர் அமைத்த லிங்கமே சுந்தரமூர்த்தி லிங்கம். இங்கு அகத்தியர் தங்கி இருந்த குன்றை ‘கும்ப மலை’ என்று அழைக்கின்றனர். அகத்தியர் பூஜித்த லிங்கத்தை சுத்தரானந்த சித்தர் பூஜித்து வந்ததால் இந்த லிங்கம் சுந்தரமூர்த்தி லிங்கம் எனப்படுகிறது.

1950ம் ஆண்டுக்குப் பிறகு வனத்துறை கட்டுப்பாட்டில் இருந்துவரும் சுந்தர மகாலிங்கம் கோயிலில் இருந்து சற்று மேடான பகுதியில் ‘சந்தன மகாலிங்கம்’ கோயில் உள்ளது. இம்மலையில் மகாலிங்கம், சுந்தரமூர்த்தி லிங்கம், சந்தன மகாலிங்கம், இரட்டை லிங்கம், காட்டு லிங்கம் என ஐந்து கோயில்கள் உள்ளன.

சந்தன மாரியம்மன் சன்னிதி, சந்தன மகாலிங்கம், சந்தன விநாயகர், சந்தன முருகன் என இங்கு எல்லாமே சந்தன மயம்தான். இங்கு செண்பகப் பூவை காயவைத்து வாசனைக்காக விபூதியில் கலந்து கொடுக்கிறார்கள்.

சதுரகிரி மலையில் பல அற்புதமான மூலிகைகள் உள்ளன. பூமியில் எங்கும் காணக் கிடைக்காத ஜோதி விருட்சம், சாயா விருட்சம், கருநெல்லி போன்ற அற்புதமான மரங்களும், மூலிகை செடிகளும் இங்கு நிறைந்துள்ளன. கோரக்க முனிவரால் ‘உதகம்’ என்று குறிப்பிடப்படும் சுனையும் ஒன்றுள்ளது. மிகுந்த மருத்துவ குணம் நிறைந்த இந்நீர் குழம்பிய சேற்று நீர் போல் காணப்படும்.

மலையேறும் வழியில் சிவலிங்கம், விஷ்ணு லிங்கம் என இரட்டை லிங்கம் உள்ளது. இதற்கு எதிரே இரட்டை லிங்கத்தை பிரதிஷ்டை செய்து பூஜித்த ராமதேவ சித்தர் என்பவரின் குகை உள்ளது. 

சதுரகிரியிலிருந்து மூலிகை மற்றும் சரியான மந்திரங்களைப் பயன்படுத்தி சாதாரண உலோகத் துண்டுகளை தங்கமாக மாற்றும் அரிய திறனை காலங்கநாதர் என்ற சித்தர் பெற்றதாக புராணம் கூறுகிறது. 

அருகிலுள்ள கிராமத்தைச் சேர்ந்த ஒருவருக்கு தனது சொந்த ஊரில் ஒரு கோயில் கட்ட உதவுவதற்காக ஒரு முழு தங்கப் பையை உருவாக்கிய பிறகும், காலங்கநாதரிடம் இன்னும் சில தங்கம் தயாரிக்கும் சாரம், தங்கத் துண்டுகள் மற்றும் மூலிகைகள் இருந்தன. 

அவற்றை தன்னுடனேயே வைத்திருக்க அவர் விரும்பவில்லை. அவர் தைலக்கிணறு என்ற ஆழமான கிணற்றைத் தோண்டி, விலைமதிப்பற்ற பொருட்களை அதனுள் மறைத்து வைத்தார்.