‘ச்சீய் பக்கங்களு’க்கு வெல்கம்! ஏன், எதற்கு, எப்படி என்று நிறைய அறிவியல்பூர்வமான(?) செய்திகளையே சொல்லி எங்கள் ‘ப்ரா’ணனை எடுத்திருந்தாலும், பெண்களுக்கு உபயோகமான தகவல்களைச் சொன்னதால் எங்களுக்கும் நோ ‘ப்ரா’ப்ளம். இது ‘ப்ரா’மிஸ்... நம்புங்க!

வடக்கை கலக்கி வாகை சூடினாலும் தன்னை உருவாக்கிய தென்னிந்திய இயக்குனர்களை நடிகை ஸ்ரீதேவி மறக்காமல் நினைவு கூர்ந்தது வியக்க வைத்தது. இந்த மனதால்தான் இன்னமும் அவர் ‘பதினாறு வயது’ மயிலாகவே வலம் வருகிறார் போலும்!

உரிமம் ரத்து செய்யப்பட்ட பட்டாசு தொழிற்சாலை பல உயிர்களைப் பலிகொண்ட சிவகாசி சம்பவம், கண்களைக் குளமாக்கியது. இதுபோன்ற வெடிவிபத்துகள் இனி நேராமல் இருக்க அரசு கிடுக்கிப்பிடி போட வேண்டும்.

‘இப்போது எளிய, ஆடம்பரமில்லா திருமணங்கள் உயிரோடு இருப்பது... ஓடிப்போய் திருமணம் செய்து கொள்பவர்களிடம் மட்டுமே’ என்ற மனுஷ்ய புத்திரனின் வரிகள் சிரிக்க மட்டுமல்ல சிந்திக்கவும் வைத்து விட்டது.

‘போடா போடி’ படத்தில் சிம்பு, ‘லவ் பண்ணலாமா வேணாமா’ என்று யோசிப்பதற்கு பதில், ‘இனியும் விரல் வித்தை காட்டலாமா வேணாமா’ என்று யோசிப்பது நலம்!

விவசாயிகளுக்காக கவிதை எழுதிக் கொண்டிருப்பவர்களுக்கு மத்தியில் ஓர் விவசாயியாக கவிதை எழுதும் வேணுகோபால் மதிக்கப்பட வேண்டியவர்.

‘ஆட்டம் காண்கிறாரா சச்சின்?’- இதில் என்ன சந்தேகம்? சச்சின் ஒன்றும் ‘ரன் மெஷின்’ அல்ல. அவருக்கும் ஓய்வு தேவை. இளைஞர்களுக்கு அவர் வழிவிட்டால்தான், விராட் கோஹ்லி போல இன்னும் பலர் வீறு கொண்டு எழுவார்கள்.

மத்திய அரசு ஈழத்தமிழர் விவகாரத்தில் சேம் சைடு கோல் போடுவது உலகம் அறிந்ததே. இப்போது பாரதிய ஜனதாவும் ராஜபக்ஷேவுக்கு சிவப்புக் கம்பளம் விரித்திருப்பது கொடுமையிலும் கொடுமையடா சாமி!

‘நல்ல வதந்தி’ கிளப்ப ஐடியா ஒருபுறம், நாடாளுமன்றத்தை நடத்த காங்கிரஸுக்கு யோசனை மறுபுறம்... இந்த வாரம் ஆல்தோட்ட பூபதி கலக்கிட்டார் சார்!