வீட்டுக்கு வீடு வாசற்படி மாதிரி வீட்டுக்கு வீடு மாடித் தோட்டம் என்ற புதிய கலாச் சாரம் வேகமாக வளர்ந்து வருகிறது. இதற்காக லட்சக்கணக்கில் செலவு செய்கிறவர்களை  நாம் பார்க்க முடியும்.

தவிர, மாடித் தோட்டம் அமைத்துத் தருவதே ஒரு தொழிலாகவும் மாறிவிட்டது. இந்த நிலையில் கொல்கத்தாவைச் சேர்ந்த ஆட்டோ ஓட்டுநர் பிஜெய் பால் தன் ஆட்டோவின்  மேற்கூரையில்  தோட்டம் அமைத்து அனைவரையும் திரும்பிப் பார்க்க  வைத்துள்ளார். இவரது புதிய கண்டுபிடிப்புதான் கொல்கத்தாவில் ஹாட் டாக்.

இந்த ஆட்டோ தோட்டத்தைப் பார்த்த வழிப்போக்கர் ஒருவர் ஆட்டோவைப் புகைப்படமெடுத்து டுவிட்டரில் தட்டிவிட, பிஜெய்யிற்கு பிரபலங்களின் வாழ்த்துகள் குவிகின்றன. ஆட்டோ தோட்டத்தை புற்கள், சின்னச் சின்ன செடிகள் அலங்கரிக்கின்றன. தனது ஆட்டோவையும் அவர் பச்சை வண்ணத்தில் மாற்றிவிட்டார்.

அத்துடன் ‘மரங் களைக் காப்போம், மனிதர்களைக் காப்போம்’ என்று ஆட்டோவில் பெங்காலி மொழியில் எழுதியுள்ளார். நாள் தவறாமல் செடிகளுக்குத் தண்ணீர் ஊற்றுவதோடு, தான் சம்பாதிக்கும் சொற்ப வருமானத்தில் ஒரு பகுதியை ஆட்டோ தோட்டத்துக்காகச் செலவிடுகிறார்.