எல்லா காதல்லயும் கொஞ்சம் பைத்தியக்காரத்தனம் இருக்கு!

* ரஞ்சித் ஜெயக்கொடியின் காதலிசம்

‘‘எங்கேயோ ஒரு காட்டுக்குள் கிடக்கிற கல், திடீரென ஒரு  வீட்டுக்கு முதல் கல்லாவது போல, கோடி பூக்கள் கொட்டிக் கிடக்கிற வனத்தில் ஒரு பூவைத் தேர்ந்தெடுக்கிற  மனசு காதலுக்குத்தான் வாய்க்கும்! எந்த கணிதத்துக்கு உள்ளும் அடங்காத மனக்கணக்கு காதல். காதல் என்பது ஒன்றை அடைதல் அல்ல... ஒன்றை உணர்தல்! இப்படியெல்லாம் காதலைச் சொல்லலாம். ஆனால், காதல் என்பது அழகிய பித்து நிலை.

கலீல் கிப்ரானின் கவிதை ஒண்ணு, ‘நாங்கள் காதல் வயப்பட்டோம். நடுவே ஒரு திரை விழுந்தது’ என வருது. திரை விழுந்ததுன்னா உங்க குறையும், அவங்க குறையும் தெரியாது. காதல் இருவரின் குறைகளையும் சவுகரியமாக மறைத்து விடுகிறது. இப்படி காதலின் சில பக்கங்களைப் பேச வருகிறது‘இஸ்பேட் ராஜாவும் இதய ராணியும்’ படம்...’’ அழுத்தம் திருத்தமாகப் பேசுகிறார் இயக்குநர் ரஞ்சித் ஜெயக்கொடி. ‘புரியாத புதிரி’ல் பேசப்பட்டவர்.

தலைப்பே வித்தியாசமா இருக்கு!

ஜெயகாந்தன் சார் சிறுகதை தலைப்புகளில் ஒன்று. எனக்கு அவர்மேல் பெரும் ஈர்ப்பு உண்டு. இதில் இரண்டு குணாதிசயங்கள் பற்றி வருது. இஸ்பேட் ராஜாவை அட்டையில் பார்த்தால் கருப்பு பக்கத்திலிருக்கும். ஆதிக்க மனப்பான்மையில், மூர்க்கமான உருவத்தில் இருக்கும். இந்தப் பக்கம் இதயராணி எல்லோருக்கும் பிடிச்ச மாதிரி அழகில் கவர்வார். இந்தப் படம் முரட்டுத்தனமான, பிடிவாதமான காதல் கதை. ஹரிஷ் கல்யாணுக்கு சாக்லெட் பாய் இமேஜ் இருக்கு. இதில் அவரை வேறுமாதிரி ஆக்கியிருக்கோம்.

எல்லாக் காதலுமே கொஞ்சம் பைத்தியக்காரத்தனம் பின்பற்றியதுதான். அந்தப் பித்து நிலையின் உச்சத்தில் கேள்வி எழுப்பியதுதான் இந்தக்கதை. அன்பு எந்த இடத்தில் ஆதிக்கமாக மாறுது... ஆதிக்கம் செலுத்தினால் அது நிஜமாகவே அன்புதானா என்ற ஒரு கேள்வியையும் எழுப்பி நிற்கிறது. காதல் மீது எந்த அபிப்பிராயத்தையும் இங்கே வைக்கலை. கேள்விதான் எழுப்புகிறேன். காதல் சமத்துவம் இல்லையோன்னு சந்தேகத்தின் பேரில் எனக்கு சில எண்ணங்கள் வருது.  ஒன்று, அன்பின் பெயரால் ஆதிக்கம் செலுத்துகிறோம். அல்லது அன்பின் பெயரால் ஆதிக்கம் செலுத்த அனுமதிக்கிறோம். இதில் சமத்துவம் எங்கே இருக்கு?

அன்பு என்பது சமத்துவம் நிரம்பியது. எல்லா கற்பனைகளுக்கும் அப்பாற்பட்ட அற்புதங்களும் அபத்தங்களும் கொண்டதே காதல். இதுக்கு தெய்வத்தன்மை கொடுத்து பெரிசா எதையாவது சொல்றோமோ, காதலை ஓவரா பெரிது படுத்துறோமோ.... காதலின் ஆழம், அர்த்தம் எதுவும் புரியாமல் ‘நாங்களும் லவ் பண்றோம்ப்பா!’ எனத் திரிகிற இந்த ஹைடெக் வாழ்வின் அவஸ்தைகளையும் இதில் சொல்ல விரும்புகிறேன். அன்பே வன்முறையாக இடம் மாறுகிற பொழுதுகள்... இப்படிப்பட்ட கேள்விகளின் தேடலாகவும் இந்தப்படம் இருக்கும்.