நம்மூர் ஃப்ளேவரில் பிரெஞ்ச் & இத்தாலியன் டெசர்ட்ஸ்!

டெசர்ட் என்று சொன்னதும் என்னவெல்லாம் நினைவுக்கு வரும்?

ஜீராவில் மூழ்கியிருக்கும் குலாப் ஜாமூன், சின்னச் சின்ன முத்துக்களை இறுக்கிப் பிடித்திருக்கும் லட்டு, நெய் சொட்டும் ஜாங்கிரி, வெண்ணெய் போல் வழுவழுப்பாக இருக்கும் ஐஸ்கிரீம்... எல்லாம் நினைவுக்கு வரும். ஆனால், டெசர்ட்களில் மிக முக்கிய இடங்களைப் பிடித்திருப்பது என்றால் அது கேக், பேஸ்ட்ரி வகைகள்தான். இந்நிலையில் கேக்கை அதிக அளவு கிரீம் கொண்டு செய்தால் அது பேஸ்ட்ரி என நாம் நினைத்துக் கொண்டிருப்பதை தவிடுபொடியாக்கியுள்ளனர் ‘டெலிஷ் டெசர்ட்ஸ்’ உணவகத்தின் முதன்மை செஃப்களான உபமன்யுவும் கஸ்தூரியும்.

ஆம். பேஸ்ட்ரிக்கு மட்டுமே முக்கியத்துவம் கொடுத்து பலவிதமான பேஸ்ட்ரிகளை கண்களுக்கும் நாவுக்கும் இவர்கள் விருந்தாகப் படைத்து வருகிறார்கள்.சென்னை அண்ணாநகர் மற்றும் கோட்டூர்புரத்தில் இயங்கி வரும் இந்த உணவகத்தின் சிறப்பே ஃபிரெஞ்ச் மற்றும் இத்தாலியன் வகை பேஸ்ட்ரிதான். ‘‘பொதுவா கேக்கைத்தான் நாம இங்க பேஸ்ட்ரினு தப்பா புரிஞ்சு வைச்சிருக்கோம். ஆனா, வெளிநாடுகள்ல பேஸ்ட்ரி என்பது கிரீம்கள் கொண்டு செய்யப்படும் ரிச்சான இனிப்பு வகைகள். இதில் கேக்கின் பங்கு சிறிதளவுதான்...’’ என்று பேச ஆரம்பித்தார் செஃப் உபமன்யு.

‘‘நானும் கஸ்தூரியும் பெங்களூரில் ஒன்றாக வேலை பார்த்தோம். நான் ஹோட்டல் மேனேஜ்மென்ட் படிச்சிருக்கேன். அதன்பிறகு உணவகம் ஒன்றில் வேலை பார்த்து வந்தேன். அந்த சமயத்தில்தான் என்னுடைய கல்லூரி மாஸ்டர் பெங்களூரில் லவான் பேஸ்ட்ரி மற்றும் பேக்கரி பயிற்சி மையத்தை நடத்துவது பற்றி தெரிய வந்தது. அங்கு சேர்ந்தேன்.
அங்கு ஏற்கனவே கஸ்தூரி பயற்சியாளரா இருந்தாங்க. வெளிநாட்டுக்குப் போக நினைத்த நான் லவானில் நாலு வருஷங்கள் பயிற்சியாளரா இருந்தேன். அந்த சமயத்தில் கொரோனா பாதிப்பு ஏற்பட்டதால் லவானில் இருந்து விலகினேன்.