துல்கர் சல்மானின் ‘சீதா ராமம்’ பார்த்தவர்கள் இசையமைப்பாளர் விஷால் சந்திரசேகரின் புகழ் கீதம் பாடுகிறார்கள். ‘‘நான் சினிமாவுக்கு வந்து இருபது வருடங்கள் ஆகிவிட்டது. முப்பது படங்கள் பண்ணிவிட்டேன். இப்போதான் முதல் ஹிட் பார்க்கிறேன். ஒரு அறிமுக இசையமைப்பாளரா இருந்திருந்தா என்னோட சந்தோஷம் கொஞ்சம் அதிகமா இருந்திருக்கலாம்.

படங்கள் பண்ணிப் பண்ணி பழகியதால் இதை எந்தமாதிரி வெற்றியா பார்க்கணும்னு தெரியல. ஆனா, ஒரு விஷயம்... என் வாழ்க்கையில் இதுவரை வந்திராத வாழ்த்துச் செய்தி, பிரபலங்களின் பாராட்டு கிடைச்சது. மம்மூட்டி சார் படம் பார்த்துவிட்டு அழுததாகச் சொன்னார்கள்...’’ உணர்ச்சியுடன் பேச ஆரம்பித்தார் விஷால் சந்திரசேகர்.  

ஸ்வப்ன சினிமாஸ், வைஜெயந்தி மூவிஸ் ஆகிய இரண்டு நிறுவனங்கள் சேர்ந்து தயாரிச்ச படம் இது. தயாரிப்பாளர் அஸ்வினி தத் தெலுங்கு சினிமாவின் பெரிய தயாரிப்பாளர். இயக்குநர் ராஜமெளலியை அறிமுகம் செய்தவர். எழுபதுக்கும் மேற்பட்ட சூப்பர் ஹிட் படங்களைத் தயாரிச்சவர். கீர்த்தி சுரேஷ் நடிச்ச ‘நடிகையர் திலகம்’ கூட அவர் தயாரிச்ச படம்தான்.

இயக்குநர் அனுராகவபுடி எனக்கு பத்து வருஷ நண்பர். ஏற்கனவே அவருடன் ரெண்டு படம் பண்ணியிருக்கிறேன். ஒரு படத்துல நானியும், இன்னொரு படத்துல ஷர்வானந்த், சாய் பல்லவியும் நடிச்சிருந்தாங்க. அனுராக் படம் பண்ணுவதா இருந்தா நான்தான் மியூசிக் பண்ணுவேன். அந்தளவுக்கு எங்களிடையே வேவ்லெங்த் இருக்கும். அப்படிதான் இந்த வாய்ப்பு கிடைச்சது.

‘சீதா ராமம்’ 60களின் கதை என்பதால் எந்த மாதிரியான ஹோம் ஒர்க் தேவைப்பட்டது?

படம் ஆரம்பிக்கும்போது நேரடி தெலுங்கு படமாதான் இருந்துச்சு. மத்த மொழியில வெளியிடுவது பற்றி அப்ப ப்ளான் பண்ணல. தெலுங்கு படம் என்பதால் 60, 70 களின் தெலுங்கு பாடல்களை நிறைய கேட்டேன். அதுல மெயினா ‘இந்தோல’ ராகம் அதிகமா இருந்துச்சு. இந்த ராகத்தை அந்தக் காலத்துல வெளிவந்த மேக்ஸிமம் படங்களில் யூஸ் பண்ணியிருப்பாங்க. அந்த சமயத்துல இந்த ராகம் பொதுவான ராகமா இருந்துச்சு.

அப்படி ஒரே ராகத்துல பாடல்கள் வெளிவந்த சமயத்துல வேறு சில ராகங்களில் வெளிவந்த பாடல்களும் ஹிட்டாகியிருந்தது.அதனால அந்த ராகத்தை யூஸ் பண்ணணும்னு முடிவு செஞ்சேன். ஆனா, அது கண்டிப்பா இந்தோல ராகம் கிடையாது. ஏனெனில், ‘இந்தோல’ ராகம் யூஸ் பண்ணியிருந்தால் கேட்கும்போதே 60 களின் பாடல்கள் என்ற எண்ணம் வந்துவிடும்.

இது பீரியட் படம் என்பதால் எல்லாமே லைவ் இன்ஸ்ட்ரூமென்ட்ஸ் யூஸ் பண்ணினோம். எலக்ட்ரானிக்ஸ் இன்ஸ்ட்ரூமென்ட்ஸ் ஒண்ணுகூட பயன்படுத்தலை. மொத்தமா 140 இசைக் கலைஞர்கள் வேல செஞ்சாங்க. நானா புதுசா எந்த வாத்தியங்களையும் கண்டுபிடிச்சு யூஸ் பண்ணல. இப்ப புழக்கத்தில் இல்லாத வாத்தியக் கருவிகளைத் தேடிப் பிடிச்சு பயன்படுத்தினேன்.

மத்திய கிழக்கு ஆசியாவுடைய அவுத், ரூவான், சாஸ், பீப்பா போன்ற வாத்தியக் கருவிகளை யூஸ் பண்ணினேன். இந்த இன்ஸ்ட்ரூமென்ட்ஸ் ரொம்ப அரிதானது.‘ஹே சீத்தா ஹே ராமா...’ பாடல் நடபைரவி ராகத்தில் உருவானது. அந்த ராகம் பொதுவான ராகம். அந்தப் பாடலைக் கேட்கும்போது ‘அடி ஆத்தாடி இளமனசொண்ணுறெக்க கட்டிப் பறக்குது...’ ஞாபகத்துக்கு வரும். அத்தோடு ‘இது ஒரு நிலாக் காலம்...’ பாடலும் நினைவுக்கு வரும்.

இந்த டிரெண்டிங் என்ற வார்த்தையை நான் சத்தியமா நம்புவதில்லை. டிரெண்டிங் என்ற வார்த்தையைக் கேட்கும்போது விரக்தியடைகிறேன். டிரெண்டிங் என்ற வார்த்தையால் நல்ல விஷயங்கள் காணாமல் போய்விடுகிறது. டிரெண்டிங் ஆகணும் என்பதற்காகவே அடிச்சுத் துவைத்து காதுகள் பழுதடையும் வகையில் இசை உருவாக்கப்படுகிறது. அப்படி பண்ணக்கூடாது.