‘‘எப்படியும் வந்துடுவேன். நம்ம ஊரை கண்குளிரப் பார்ப்பேன். சொந்த பந்தங்களையெல்லாம் சந்திப்பேன்!’’ என்று தன்னைப் பார்க்க வருகிறவர்களிடம் எல்லாம் நம்பிக்கையுடன் சொல்லுபவர்.

இப்படி ஒரு நாள் இரண்டு நாள் அல்ல; 34 ஆண்டுகளாக சொல்லி வந்தவர், தன் நம்பிக்கை நிறைவேறாமலேயே இறந்து போனார். 34 ஆண்டுகள் சிறைவாசம் அனுபவித்தவர். மைசூர் சிறையில் இருந்த வீரப்பன் வழக்கின் கடைசி சிறைவாசி. மீசைக்கார மாதையன் இறப்பு குறித்து வீரப்பன் விசுவாசிகள் இப்படித்தான் பேசிக் கொள்கிறார்கள்.

‘‘எங்க குடும்பத்தில் மட்டும் வீரப்பன் வழக்குகளுக்காக அண்ணன் மாதையன் உட்பட நான்குபேரை இழந்துள்ளோம். அதில் மூன்று பேர் உடலை நாங்களே பார்க்கவில்லை. இப்போது அண்ணன் உடல் மட்டும் ஊர் சுடுகாட்டுக்கு வருகிறது..எங்க குடும்பத்தில் வீட்டில் இருந்த என்னைத்தான் போலீஸ் முதலில் பிடித்தது.

அதற்கு முன்பு என் அப்பா, அம்மாவை மாதக்கணக்கில் வைத்து டார்ச்சர் செய்திருக்கிறது. அதில் அப்பா சிறையில் இருந்தபோது நான்தான் ஜாமீன் எடுத்தேன். அதற்குப் பிறகே என்னைப் பிடித்தார்கள். என்னை அவர்கள் சித்ரவதை செய்ததை பொறுக்க முடியாமலே அண்ணன் போலீஸ் ஸ்டேஷனுக்கு வந்தார். அவரையும் என்னையும் ஏழு கொலை வழக்குகள் போட்டு சிறையில் அடைத்தார்கள்!’’

அதுவரை இவர்களுக்கு, தாம் செய்யும் தொழில் குற்றம் என்பது கூட தெரிந்திருக்கவில்லை. சிதம்பரம் ரேஞ்சருக்கும், வீரப்பனுக்கும் வாக்குவாதம் நடந்து அதில் வீரப்பன் சிதம்பரம் ரேஞ்சரைச்சுட்டுக் கொல்லவும்தான் விவகாரம் தீயாய் புறப்பட்டது. தமிழக வனத்துறையினர் அணி அணியாகச் சேர்ந்து வீரப்பன் தேடுதல் வேட்டையில் ஈடுபடலாயினர்.

இவர்கள் மீது பல்வேறு கொலை வழக்குகள் போடப்பட்டு சிறையில் அடைக்கப்பட்டனர். இரண்டு ஆண்டுகளில் தன் வழக்கில் ஜாமீன் பெற்று வெளியே வந்தார் மாதையன். அவர் தம்பி சாமிநாதன் ஒரே ஒரு வழக்குக்கு மட்டும் ஜாமீன் கிடைக்காத நிலையில் ஆறாண்டுகள் சிறையில் இருந்தார். 1993ல் முனியன், சுண்டா வெள்ளையன் இருவரும் போலீசாரிடம் சரணடைந்த நிலையில், சுட்டுக் கொல்லப்பட்டனர்.

1998ல் மீசைக்கார மாதையனின் மகன் மாதேஷ் சத்தியமங்கலம் காட்டில் உள்ள புளியங்கோம்பை என்ற ஊரில் தமிழ்நாடு அதிரடிப்படை இன்ஸ்பெக்டர் மோகன் நவாஷால் சுட்டுக் கொல்லப்பட்டார்.

ஆக மொத்தம், இவர் குடும்பத்தில் மட்டும் வீரப்பன் வழக்குகளுக்காக 3 பேர் உயிரிழக்க, மீசை மாதையன் மீது மேலும் பாலாறு குண்டு வெடிப்பு உட்பட பல்வேறு வழக்குகள் கர்நாடக போலீஸாரால் புனையப்பட்டு சிறையில் அடைக்கப்பட்டார். அவர் மீது தடா வழக்கும் பாய்ந்து, விசாரணை முடிவில் ஆயுள் தண்டனை விதிக்கப்பட்டது.

போலீஸார் மேல் முறையீட்டு மனு விசாரணைக்குப் பின்னர், உச்ச நீதிமன்றம், மீசை மாதையன், பிலவேந்திரன், சைமன், ஞானப்பிரகாசம் ஆகிய நால்வரின் ஆயுள் தண்டனையைத் தூக்குத் தண்டனையாக மாற்றியது. இதை எதிர்த்து ஜனாதிபதிக்குக் கருணை மனு அனுப்பப்பட்டது. அம்மனு தள்ளுபடி செய்யப்பட்டது. நால்வரும் தூக்கில் போட உத்திரவு பிறப்பிக்கப்பட்டது.