பாடம் புகட்டிய இந்தியா...அலறும் ஓடிடி தளம்!
யெஸ். சாட்சாத் நெட்ஃபிளிக்ஸ் தளம்தான் செய்வதறியாமல் கையைப் பிசைந்து நிற்கிறது.
என்ன விஷயம்?
2016ல் நெட்ஃப்ளிக்ஸ் இந்தியாவுக்குள் நுழைந்தது.நெட்ஃப்ளிக்ஸ் அமெரிக்காவைப் போல இந்தியாவையும் வளைத்துப் போடலாம் என களமிறங்கிய போது, அதன் சந்தா தொகை மற்ற ஓடிடி தளங்களுடன் ஒப்பிடும்போது 10 மடங்கு அதிகமாக இருந்தது. மற்ற ஓடிடிகள் வருடாந்திர சந்தா வாங்கிய நிலையில், நெட்ஃப்ளிக்ஸ் மாதாந்திர சந்தா வசூலித்தது. அதுமட்டுமில்லாமல் நெட்ஃப்ளிக்ஸ் நிகழ்ச்சிகளிலும், வெப் சீரிஸ்களிலும், ஒரிஜினல்களிலும் அமெரிக்க வாடையே தூக்கலாக இருந்தது.
இதனால், நெட்ஃப்ளிக்ஸினால் இந்திய ஓடிடி களத்தில் பெரிதாக ஆதிக்கம் செலுத்த முடியவில்லை.உலகின் மிகப்பெரிய கிரிக்கெட் மார்க்கெட்டான இந்தியாவை, டிஸ்னி ஹாட்ஸ்டார் ப்ளஸ், ஐபிஎல் ஒளிபரப்பு உரிமையை வைத்துக் கொண்டும், ஸ்டார் டிவியின் நிகழ்ச்சிகளை வைத்தும் பெரிய எண்ணிகையில் சந்தாதாரர்களை வளைத்துப் போட்டிருந்தது.
மறுபக்கம் அமேசான் ப்ரைம் வீடியோ, தனது அமேசான் ப்ரைம் மெம்பர்ஷிப்பைக் காட்டி இ-காமர்ஸ் ப்ரியர்களை கட்டுப்பாட்டுக்குள் கொண்டு வந்திருந்தது. 10 பிராந்திய மொழிகளில் நிகழ்ச்சிகளைக் கொடுத்தது. இந்திய மொழிகளில் ப்ளாக்பஸ்டர்களாக கொண்டாடப்பட்ட படங்களில் 40 சதவீத படங்களின் ஓடிடி உரிமை அமேசான் வசம் இருந்தது. இதனால் அமேசான் ப்ரைம் வீடியோவும் பலம் காட்டியது.
இந்த இரண்டும் இந்தியர்களூக்கான உள்ளூர் சமாசாரங்களை தங்களது கேட்லாக்கில் அதிகம் சேர்க்க ஆரம்பித்தன.ஆனால், நெட்ஃப்ளிக்ஸின் ரீட் ஹேஸ்டிங்ஸ், இந்தியாவில் தங்களது செயல்பாடுகளை விரிவாக்கம் செய்வதாலும், மிக மலிவான கட்டணத்தில் இன்டர்நெட் கிடைப்பதாலும் நெட்ஃப்ளிக்ஸ் பெரும் வரவேற்பைப் பெறும் என்று 2018ல் சொன்னார். இன்னும் 100 மில்லியன் சந்தாதாரர்கள் இந்தியாவிலிருந்து கிடைப்பார்கள் என்றும் வெளிப்படையாகச் சொன்னார்.
ஆனால், எதுவும் நடக்கவில்லை.அடுத்த வருடமே ரீட் ஹேஸ்டிங்ஸ் ரொம்பவே நொந்து போனார். ‘முக்கியமான ஒவ்வொரு சந்தையிலும் நெட்ஃப்ளிக்ஸ் கொடிகட்டிப் பறக்கிறோம். ஆனால், இந்தியாவில் மட்டும் ஏன் ஜெயிக்க முடியவில்லை என்று நினைத்தாலே அது எங்களை அப்செட்டாக்குகிறது.
நிச்சயம் இந்தியாவிடம் இருந்து நாங்கள் கற்றுக்கொள்ளவேண்டும்’ என்றார் அதே ரீட் ஹேஸ்டிங்ஸ்ஏறக்குறைய 5 மில்லியனுக்கும் அதிகமான கட்டணம் செலுத்தும் சந்தாதாரர்களை வைத்திருக்கும் உலகின் மிகப்பெரிய ஸ்ட்ரீமிங் நிறுவனம், இந்தியாவில் பாய்ச்சல் காட்டமுடியாமல் நொண்டியடித்தது. அதன் போட்டியாளர்களான ஹாட்ஸ்டார் 45 மில்லியனுக்கும் மேலும், அமேசான் 19 மில்லியனுக்கும் மேலும் சந்தாதாரர்களைப் பெற்றிருந்தன.
தவிர, 200 மில்லியனுக்கும் அதிகமான வீடுகளில் சொந்தமாக டிவியும், கட்டணம் கட்டிப் பார்க்கும் டிவி சேனல்களும் வெறும் 300 ரூபாய்க்குள் கிடைத்தன. ஒட்டுமொத்த குடும்பமும் ரசிக்கும் வகையில், சினிமா, விளையாட்டுச் செய்திகள், என அனைத்து நிகழ்ச்சிகளும் பொழுதுபோக்கிற்கு உத்தரவாதம் அளித்தன.
அப்படியானால் என்ன செய்வது என்று யோசித்த நெட்ஃப்ளிக்ஸ் தனது கட்டணத்தைக் குறைக்க திட்டமிட்டது.கட்டணத்தைக் குறைக்கும் போது, இன்னும் அதிக எண்ணிக்கையிலான சந்தாதாரர்களைப் பெறமுடியும். அப்படியானால்தான் மிகப்பெரும் இந்திய ஓடிடி சந்தையில் ஊடுருவ முடியும் என்பது கொஞ்சம் தாமதமாகத்தான் நெட்ஃப்ளிக்ஸுக்கு புரிந்தது.
அடுத்து அமெரிக்கர்கள், ஐரோப்பியர்களிடம் நெட்ஃப்ளிக்ஸ் காட்டிய ஹைடெஃபனிஷன் தரமெல்லாம் இங்கு இந்தியர்களிடம் எடுபடவில்லை. இங்கு நம்மூரில் டீ ப்ரேக்கில், பெட்டிக் கடைக்குச் செல்கையில், டாய்லெட் போகையில், பேருந்திலும் ஷேர் ஆட்டோவில் உட்கார்ந்திருக்கையிலும், தூங்கப் போகும்போதுகூட இந்தியர்கள் கையில் இருப்பது ஸ்மார்ட்ஃபோன்கள்.
அதில்தான் ஸ்ட்ரீமிங் தளங்களைப் பார்க்கிறார்கள் என்பதை ஒருவழியாகப் புரிந்து கொண்டது நெட்ஃப்ளிக்ஸ்இதனையடுத்து 2019ல் மொபைல் போனில் மட்டும் தனது நிகழ்ச்சிகளையும், படங்களையும், ஒரிஜினல்களையும் பார்க்கும் வகையில் மொபைல் ஒன்லி சப்ஸ்க்ரிப்ஷன் முறையில் கட்டணக்குறைப்பை அறிமுகப்படுத்தியது. 199 ரூபாய் கட்டணத்தில் மொபைல் போனில் பார்க்கும் வசதியை இந்தியர்கள் முன் வைத்தது.
இதற்கு ஓரளவிற்கு வரவேற்பு கிடைத்தது எனலாம்.2021 டிசம்பரில் தனது அனைத்து ப்ளான்களின் கட்டணத்தையும் குறைத்தது. நெட்ஃப்ளிக்ஸின் இந்த அதிரடி கட்டணக்குறைப்பால், சந்தாதாரர்கள் எண்ணிக்கையில் 30 சதவீதம் அதிகரித்து இருக்கிறது. அதேபோல் அதன் வருவாயும் 24 சதவீதம் அதிகமாகியிருக்கிறது.
இதையடுத்து நெட்ஃப்ளிக்ஸ் இந்தியாவில் கற்றுக்கொண்ட பாடத்தின் அடிப்படையில், தனது ஸ்ட்ரீமிங் செயல்பாடுகள் இருக்கும் உலகின் இதர 116 நாடுகளிலும் தனது கட்டணக் குறைப்பை அறிவித்திருக்கிறது. 2023 ஜனவரி - மார்ச் வரையிலான இந்த காலாண்டில் இந்த கட்டணக்குறைப்பு அமலுக்கு வருவதாகவும் நெட்ஃப்ளிக்ஸ் தெரிவித்திருக்கிறது.
இதனால் நாட்கள் செல்லச் செல்ல வருவாய் அதிகரிக்கும் என தனது பங்குதாரர்களிடம் நெட்ஃப்ளிக்ஸ் தெரிவித்திருக்கிறது.இப்பொழுது நெட்ஃப்ளிக்ஸ் 2023ம் ஆண்டின் முதல் காலாண்டில் மட்டும் 1.75 மில்லியன் சந்தாதாரர்களைப் பெற்றிருக்கிறது.இந்திய ஸ்ட்ரீமிங் மார்க்கெட், 2026ஆம் ஆண்டில் இருமடங்காக அதிகரிக்கும் என எதிர்பார்க்கப்படுகிறது.
இதனால் நெட்ஃப்ளிக்ஸின் இந்த கட்டணக்குறைப்பு சரியான நேரத்தில் எடுக்கப்பட்டிருக்கும் சரியான முடிவு என்கிறார்கள்.எவ்வளவு பெரிய கில்லாடியாக இருந்தாலும், எங்களிடம் கற்றுக்கொள்ள நிறைய பாடங்கள் இருக்கவே செய்கின்றன என்பதை நெட்ஃப்ளிக்ஸ் விஷயத்திலும் மீண்டும் நிரூபித்திருக்கிறார்கள் பெருமைக்குரிய இந்தியர்கள்!
என்.ஆனந்தி
|