கொடைக்கானல் பாதரசக் கழிவு பிரச்னைக்கு நியாயம் கிடைத்திருக்கிறதா..?

ஒரு புத்தகம் எழுப்பும் கேள்வி

சுமார் 22 வருடங்களுக்கு முன் கொடைக்கானல் வாசிகள் ஒரு பெரும் போராட்டத்தை முன்னெடுத்தனர். மலைகளின் இளவரசி என்று வர்ணிக்கப்படும் கொடைக்கானலில் 1984 முதல் இயங்கி வந்த யூனிலீவர் எனும் லண்டனைச் சேர்ந்த கம்பெனி தயாரித்த தெர்மாமீட்டர் தயாரிப்பில் பயன்படுத்தப்படும் பாதரசம் எனும் மெர்க்குரிக் கழிவுகள் இயற்கையின் ஒரு கொடையான கொடைக்கானலில் தாறுமாறாகக் கொட்டப்பட்டதால் நிலம், நீர், காற்று நஞ்சானதாகவும்; இதனால் இறப்பு, நோய், சுற்றுச்சூழலுக்குக் கேடு என்றும் அந்தப் போராட்டத்தில் குதித்த மக்கள் 2001களில் தெருவில் வந்து போராடத் தொடங்கினர்.

இந்தப் பிரச்னை தொடர்பாக வழக்கும் பதியப்பட்டு 2016ல் தீர்ப்பும் வந்தது. சிலருக்கு இழப்பீடு என்று கொடுக்கப்பட்டாலும் இந்தப் பிரச்னையின் ஆழம்
இன்றுவரை தொடரத்தான் செய்கிறது. இந்நிலையில் மெர்க்குரி நஞ்சு தொடர்பான பிரச்னையின் ஆரம்பம், ஆழம், குழப்பம் மற்றும் போதாமைகளை பல இடங்களில் போராடி ‘ஹெவி மெட்டல்’ (Heavy Metal) எனும் தலைப்பில் புத்தகமாக எழுதியிருக்கிறார் அமீர் ஷாகுல்.

ஐபிஎம், நிசான் நிறுவனங்களில் கைநிறைய ஊதியம், ராய்ட்டர் செய்தி நிறுவனத்தில் வேலை என்று இருந்தவர் புலனாய்வுப் பத்திரிகைத் துறையில் சவால்கள் அதிகம் என்று தெரிந்தும் உலகளாவிய பசுமை நிறுவனமான கிரீன்பீஸிலும் தன்னை இணைத்துக்கொண்டார் ஷாகுல். கர்நாடகாவைச் சேர்ந்த ஷாகுலின் இந்தப் புத்தகம் தமிழகத்திலும் பெரிய அதிர்
வலைகளை ஏற்படுத்தியிருக்கிறது. புத்தகத்துக்குள் இந்தப் பிரச்னை தொடர்பாகப் போவதற்கு முன்பாக சில விஷயங்களைப் பார்ப்போம்.