முதல் பாகத்திலேயே சிறுவயது நந்தினி பாத்திரத்தில் குட்டி தேவதையாக காட்சி தந்தார் சாரா அர்ஜுன். முதல் பாகத்தில் குட்டி குட்டிக் காட்சிகளாகக் கடந்து போனபோதும்கூட பலரின் கண்களில் இருந்து சாரா தப்பவில்லை. அட இது நம்ம ’தெய்வத்திருமகள்’ நிலா கிருஷ்ணாவாச்சே என இணையத்திலும் பதிவிட்டனர்.

 ‘பொன்னியின் செல்வன் 2’ ரிலீஸுக்கு முன் ‘சின்னஞ்சிறு நிலவே...’ பாடல் கிளிப்ஸ் வெளியானதும் சாராவுக்கு 2கே கிட்ஸ் ஹார்ட்டின் போடத் தொடங்கிவிட்டார்கள். பேபி சாரா அர்ஜுனை தமிழுக்குக் கொண்டு வந்தவர் இயக்குநர் ஏ.எல்.விஜய். ‘தெய்வத்திருமகள்’ படத்தில் மனநலம் பாதிக்கப்பட்ட நாயகன் விக்ரமுக்கு மகளாகவும், அவர் இயக்கிய அடுத்த படமான ‘சைவம்’ படத்தில் ஆசையாக வளர்த்த சேவலைக் காப்பாற்றப் போராடும் தமிழ்ச்செல்வியாகவும் நம்மைக் கவர்ந்திருப்பார்.

‘பொன்னியின் செல்வன் 2’ படத்தில் சிறுவயது ஆதித்த கரிகாலனாக நடித்து அனைவரது பாராட்டுகளையும் பெற்றுக் கொண்டிருக்கிறார் நடிகர் சந்தோஷ் ராம். இவரும் தமிழ் சினிமாவில் நடிக்க வாய்ப்பு தேடி பல வருடங்களாகக் காத்திருப்பவர்தான்.கடந்த 5 வருடங்களுக்கு முன்னரே ‘பொ செ’ ஆடிஷனில் பங்கேற்றார். பலகட்ட வடிகட்டலுக்குப் பிறகு இறுதியில் தேர்வானார்.