லவ் + ஆக்‌ஷன் + மியூசிக் = டக்கர்!

‘பாய்ஸ்’ படம் மூலம் மாஸ் நாயகனாக அப்போதைய இளம் பெண்களின் கனவுக் கண்ணனாக வலம் வந்தவர் சித்தார்த். தொடர்ந்து ‘ஆயுத எழுத்து’, ‘காதலில் சொதப்புவது எப்படி’, ‘உதயம் NH4’ உள்ளிட்ட மிகச்சில படங்களில் நடித்தாலும் சித்தார்த்தின் நேச்சுரல் நடிப்பிற்காகவே அவருக்கென ஒரு தனி ரசிகர் வட்டம் உண்டானது.

ஆனாலும் அடிக்கடி டுவிட்டர் உள்ளிட்ட சமூக வலைத்தளங்களில் சர்ச்சையான கருத்துகள், பதிவுகள் என மாட்டிக் கொள்வது அவரது பழக்கம்; வழக்கமாக மாறிப் போனது.
2019ம் ஆண்டு வெளியான ‘அருவம்’ படத்திற்குப் பிறகு தெலுங்கு, இந்திப் பக்கம் சென்றார். ஏராளமான படங்கள், ஓடிடி புராஜெக்ட்ஸ் என அவர் தனக்கென வேறு ஒரு மார்க்கெட்டை செட் செய்துகொண்டார். இதோ தமிழில் மீண்டும் இளமை ததும்ப ஒரு படம்... அதுதான் ‘டக்கர்’. இந்தப் படம் தனக்கு கம் பேக் ஆக அமையும் என சித்தார்த் நம்புகிறார்.

‘கப்பல்’ படம் மூலம் இயக்குநராக அறிமுகமானவர் கார்த்திக் ஜி கிரிஷ். இயக்குநர் ஷங்கரின் அசிஸ்டெண்ட். ‘டக்கர்’ படம் இவருக்கு இரண்டாவது படம். ஸோ, கிட்டத்தட்ட சித்தார்த், கார்த்திக் ஜி கிரிஷ் இருவருக்குமே ‘டக்கர்’ மிக முக்கியமான படம். ‘‘காதலிக்க ஆசைப்படும் நாயகன், காதல் என்றாலே வெறுக்கும் நாயகி... இருவரும் ஒன்றாகப் பயணிச்சா என்ன ஆகும்..? இதுதான் ‘டக்கர்’ பட ஒன்லைன்...’’ உற்சாகத்துடன் பேசத் தொடங்கினார் இயக்குநர் கார்த்திக் ஜி கிரிஷ்.

‘டக்கர்’..? இந்தியில் ‘மோதல்’ என அர்த்தம். ரெண்டு ஈகோ பிடிச்ச இளைஞர்கள் ஒரு கட்டத்தில் சந்திச்சு ஒண்ணாக பயணிக்க வேண்டிய தருணம் உண்டாகுது. தொடர்ந்து அவங்க பயணம் எப்படி இருக்கப் போகுது, என்னவெல்லாம் சுவாரஸ்யம் நடக்கப் போகுது என்பதுதான் கதை. முழுக்க முழுக்க லவ் + ஆக்‌ஷன் கலவைதான் இந்த ‘டக்கர்’. ரொம்ப நாளைக்கு அப்பறம் சித்தார்த்தை திரும்ப ஒரு சார்ம், துறுதுறு லவ்வர் பாய் கெட்டப்பில் பார்க்கலாம். ஆக்‌ஷனும் நல்லா செய்திருக்கார்.