இந்தியாவில் தினமும் சுமார் 100 விவாகரத்து மனுக்கள் தாக்கல் செய்யப்படுகின்றன. பெரும்பாலானவை மெட்ரோ நகரங்களில் இருந்து வருகின்றன. ஏற்கனவே குடும்ப நீதிமன்றங்களில் மொத்தமாக 11.4 லட்சம் வழக்குகள் நிலுவையில் உள்ளன என்பது பதற வைக்கும் நிஜம். 

இதில் கேரளாவில் கடந்த பத்து வருடங்களில் விவாகரத்து விகிதம் 350% அதிகரித்துள்ளதாக புள்ளிவிபரங்கள் தெரிவிக்கின்றன. 2022ம் ஆண்டு மட்டும் தினசரி சராசரியாக 75 விவாகரத்து மனுக்கள் தாக்கல் செய்யப்பட்டுள்ளன. ‘இந்தியாவின் விவாகரத்து மாநிலம்’ என கேரளா மாறி யிருக்கிறது.

ஒரே வீட்டில் அதிக நேரம் ஒருவரையொருவர் பார்த்துக் கொண்டிருந்தால் கூட சில நேரங்களில் சண்டைகள் அதிகமாகும். எதிர்பார்ப்புகள் கூடும். ஒருவரை மற்றொருவர் எல்லாவற்றிற்கும் சார்ந்து இருக்கும் நிலை உருவாகும். இதைத் தவிர்க்கவும் கூட இந்த ஸ்லீப்பிங் விவாகரத்து மிகப்பெரிய பலனாக மாறி இருக்கிறது. 

மேலும் குறைந்தபட்சம் தனக்கென ஒரு தனி அறை, பிரைவசியான நேரம்... இதெல்லாம் கிடைக்கும்போது, தானாகவே தூங்கி எழுந்தவுடன் தனது துணையை மனம் தேடும். இதுவே தம்பதிகளுக்குள் இன்னும் அந்நியோன்யத்தை அதிகரித்து உறவை பலப்படுத்தும்.

அதேபோல் ஒருவருக்கு சிறிது நேரம் விளையாடலாம் எனத் தோன்றும், ஒரு சிலருக்கு சிறிது நேரம் புத்தகம் படித்துவிட்டு தூங்கலாம் எனத் தோன்றும். நிச்சயம் சேர்ந்து இருக்கும் பொழுது இதெல்லாம் சாத்தியமல்ல. எல்லோரும் படுக்கும் பொழுது நிச்சயம் தூங்கியாக வேண்டிய ஒரு கட்டாயம் ஏற்படும். இதனாலேயே சிலருக்கு அதிகாலை மூன்று அல்லது நான்கு மணிக்கு கூட விழிப்பு வருவதும் நடக்கிறது. 

தனியாக தூங்கும் பழக்கத்தை உண்டாக்கும்போது இவையெல்லாம் சாத்தியப்பட்டு ‘மீ (மை) டைம்’ அதிகரிக்கும் பொழுது மற்றவர்கள் மேலும் ஆர்வமும் உணர்வும் அதிகரிக்கும்...’’ என்று சொல்லும் வந்தனா, இந்தியா போன்ற நாடுகளில் இது சாத்தியமா என்பதையும் விளக்கினார்.

எல்லாருக்குமே எல்லா வயதிலும் ‘RRR’ அவசியம். அதாவது Renew, Rejuvenate, Refresh - அதாவது புதுப்பித்தல், செல் புத்துயிர், புத்துணர்வு. உறவு, வேலை, படிப்பு... ஏன் வாழ்க்கையில் கூட இந்த RRR ரொம்ப முக்கியம். 

ஒரே மாதிரி போரிங் வேலையை அல்லது வாழ்க்கையைக் கடைப்பிடித்துக் கொண்டே இருந்தால் நிச்சயம் சலிப்பு உண்டாகும். உறவும் அப்படித்தான். ஒரே நபர் ஒரு எட்டு மணி நேரம் கழித்து எழுந்து பார்க்கும்போது அவர்களும் நமக்குப் புதிதாகத் தெரிவார். நமக்கும் அது புதிதாக இருக்கும். உறவும் பலப்படும்.

ஒருவேளை ஓர் அறைதான் அல்லது தனி படுக்கையறை கிடையாது என்றால் குறைந்தபட்சம் கதவிலேயே சாவி வைத்து பூட்டிக் கொள்ளும் முறையை பயன்படுத்துங்கள். 

போலவே ஒருநாள் ஒருவர் படுக்கையிலும் மற்றவர் தரையிலும் உறங்கலாம். முந்தைய நாள் படுக்கையில் படுத்தவர் மறுநாள் தரையில் படுக்கலாம். இப்படி மாற்றிக் கொள்வது உண்மையில் உறவை பலப்படுத்தவே செய்யும்...’’ என்ற வந்தனா, ஸ்லீப்பிங் விவாகரத்தால் என்னென்ன பலன்களை அடையலாம் என்பதையும் விளக்கினார்.

இதற்குப் பெயர்தான் எதிர்மறையாக ஸ்லீப்பிங் விவாகரத்து என நவீன உலகிற்கு ஏற்றபடி பெயரிடப்பட்டிருக்கிறது. ஆனால், இது எதிர்காலத்தில் நடக்கவிருக்கும் நிரந்தர பிரிவிலிருந்து பாதுகாக்கும் கவசமாக மேற்கத்திய நாடுகளில் அதிகம் கடைப்பிடிக்கப்பட்டு வருகிறது. உண்மையில் இது மிகவும் பழமையான ஒரு பழக்கவழக்கம். 

நம் மன்னர்கள் காலத்தில் அந்தப்புரம் என்ற பழக்கம் உண்டு. அங்கே ராணி மற்றும் அவருடன் சேர்ந்த தோழிகள் என தனியாக இருப்பர். தேவைப்பட்டால் மட்டும்தான் அரசனும் அரசியும் ஒன்றிணைவார்கள். இதனால்தான் அவர்களின் பந்தம் பலமாக இருந்தது.