பொதுவாக சிலருக்கு பழம் பொருட்களை சேகரிப்பது ரொம்பவே பிடிக்கும். அப்படியாக தபால்தலைகளில் தொடங்கி பழமையான நாணயங்கள், ரூபாய் நோட்டுகள், புத்தகங்கள், கைக்கடிகாரங்கள், கீ செயின்கள், பொம்மைகள், கார்கள், டூவீலர்கள், ரேடியோக்கள், சினிமா சார்ந்த விஷயங்கள் எனப் பல்வேறு பொருட்களைத் தேடித் தேடி சேகரிப்பார்கள்.

இதில் ஹைலைட் என்னவென்றால் சமீபத்தில் இவரின் சேகரிப்பில் இருந்து சிறுபகுதி, லண்டனில் உள்ள உலகின் தலைசிறந்த அருங்காட்சியகமான விக்டோரியா அண்ட் ஆல்பர்ட்டை அடைந்துள்ளதுதான். இதற்குக் காரணம் செலீம் கந்தகரின் உறவுக்கார பெண்ணான ஓஹிடா கந்தகர். 

செலீம் கந்தகரின் அருங்காட்சியகம் குறித்து ஓஹிடா எடுத்த, ‘ட்ரீம் யுவர் மியூசியம்’ என்ற குறும்படம் விக்டோரியா அண்ட் ஆல்பர்ட் அருங்காட்சியகத்தின் மதிப்புமிக்க ஜமீல் பரிசை வென்றுள்ளது. இதனாலேயே செலீம் கந்தகரின் சேகரிப்பு விக்டோரியா அண்ட் ஆல்பர்ட் அருங்காட்சியகத்திற்குச் சென்றதுடன் உலகம் முழுவதும் அவரைக் கவனிக்கச் செய்துள்ளது.  

மேற்கு வங்கத்தின் ஹூக்ளி மாவட்டத்திலுள்ள கெலேபரா என்ற சிறு கிராமத்தைச் சேர்ந்தவர் செலீம் கந்தகர். பிழைப்பிற்கு கொல்கத்தா வந்தவர், அங்கே ஒரு டாக்டரிடம் கம்பவுண்டராக பணியாற்றினார்.

1970ம் ஆண்டிலிருந்து அவரிடம் பழமைப் பொருட்கள் சேகரிப்பு பழக்கம் வந்துள்ளது. ஆரம்பத்தில் எல்லோரையும் போல தபால்தலைகள்தான் அவரின் பிரதான சேகரிப்பாக இருந்துள்ளது. பின்னர் கொல்கத்தாவில் ஓர் இடத்தில் நடந்த பாரம்பரிய கண்காட்சியைப் பார்த்து பிரமித்துள்ளார். இப்படியான பொருட்களைக்கூட சேகரிக்கலாம் போல என அப்போதுதான் அவருக்குத் தோன்றியுள்ளது.

இதுமட்டுமல்ல. அவரின் இந்தச் சேகரிப்பில் 70களில் இருந்த மெட்ரிகுலேஷன் விடைத்தாள்கள்கூட உள்ளன. தவிர, கிராமபோன்கள், குழந்தைகள் அணிந்த துணிமணிகள், விசிறிகள் என அடுக்கிக் கொண்டே போகலாம். ஓஹிடாவின் அம்மா வேண்டாமென தூக்கியெறிந்த பெர்ஃபியூம் பாட்டிலும் இதில் அடக்கம்.

செலீம் கந்தகர், மருத்துவரிடம் கம்பவுண்டராக பணிபுரிந்தபோது பல்வேறு நோயாளிகளும் முதலில் அவரைத்தான் பார்த்துள்ளனர். இரத்த அழுத்தம் பரிசோதிப்பது, ரத்த மாதிரிகளை எடுப்பது எனப் பல பணிகளின் மூலம் நோயாளிகளிடம் இவர் நெருங்கிப் பழகியுள்ளார். காலப்போக்கில் அவர்களும் இவருக்கு நெருக்கமானவர்களாக மாறியுள்ளனர்.

ஓஹிடாவின் இந்தப் படம் தனிப்பட்ட பொருட்களுக்கு அருங்காட்சியகங்களில் இடம் இல்லாதது குறித்தான கேள்வியை எழுப்புகிறது. செலீம் கந்தகர் இத்தனை பொருட்களை தன்னுடைய வீட்டில் சேகரித்து வைப்பதற்காகப் பட்ட கஷ்டங்களை வெளிப்படுத்துகிறது. 

தற்போது ஓஹிடாவின் இந்த குறும்படத்திற்கு முதல் பரிசான 25 ஆயிரம் பவுண்ட் கிடைத்துள்ளது. இது இந்திய மதிப்பில் சுமார் 28 லட்சம் ரூபாயாகும். இந்த நிதியின் மூலம் செலீம் கந்தகரின் பொருட்களுக்கான ஓர் அருமையான அருங்காட்சியகத்தை கெலேபரா கிராமத்திலேயே உருவாக்க நினைத்துள்ளார் ஓஹிடா.