ஒரு சதம். ஒரே ஒரு சதம்தான். உலகின் அத்தனை கிரிக்கெட் வீரர்களையும், ரசிகர்களையும் தன் பக்கம் ஈர்த்துவிட்டார் வைபவ் சூர்யவன்ஷி. 35 பந்துகளில் ஒரு சதம் அடிப்பது என்பது இன்றைய அதிரடி டி20 கிரிக்கெட் ஃபார்மெட்டில் சாத்தியமே. 

ஆனால், அந்தச் சாதனையை ஓர் அனுபவம் வாய்ந்த வீரர் செய்திருந்தால் பெரிதாக ஆச்சரியம் இருந்திருக்காது. வெறும் 14 வயதே நிரம்பிய சிறுவன் அடித்ததே பலரையும் புருவம் உயர்த்தச் செய்துள்ளது.

இந்த 18வது ஐபிஎல் சீசன் தொடங்குவதற்கு சில நாட்களுக்கு முன்பு போட்டி குறித்த விளம்பரம் ஒன்று வெளியானது. அதில் சென்னை சூப்பர் கிங்ஸின் தோனியும், ராஜஸ்தான் ராயல்ஸின் சஞ்சு சாம்சனும் ஜாலியாகப் பேசிக் கொள்வார்கள். அதில் தோனி, ‘சஞ்சு, 13 வயது குழந்தைப் பையனை உன் அணியில் எடுத்திருப்பதாகக் கேள்விப்பட்டேன்...’ என்பார்.

அதற்கு சஞ்சு, ‘இட்ஸ் ஓகே பிரதர். நீங்க ஐபிஎல்லில் இருந்து ஓய்வுபெறுவதற்குள் அவனும் கோப்பையை ஜெயிப்பான்...’ என்பார் நம்பிக்கை தொனியில். ஆனால், அப்போது தோனி குறிப்பிட்ட அந்த 13 வயது குழந்தைப் பையன் வைபவ் சூர்யவன்ஷிதான் என்பது பலருக்கும் தெரியாது. இப்போது சஞ்சுவின் நம்பிக்கை வார்த்தைகளை நிஜமாக்கும் வகையில் ஆடி வருகிறார் சூர்யவன்ஷி.

இந்நிலையிலேயே சூர்யவன்ஷியின் பின்புலம் பரவலாக வைரலாகிக் கொண்டிருக்கிறது. அவர் சதம் அடித்த அன்றே அவரின் தந்தை சஞ்சீவ், சிறுவயது சூர்யவன்ஷியை தூக்கியபடி ஐபிஎல் பார்க்கும் புகைப்படங்கள் டிரெண்டாகியது.  கடந்த 2011ம் ஆண்டு மார்ச் 27ம் தேதி பீகார் மாநிலம் சமஸ்திபூர் மாவட்டத்திலுள்ள மோதிபூர் கிராமத்தில் எளிய விவசாயக் குடும்பத்தில் பிறந்தவர் வைபவ் சூர்யவன்ஷி.

ஐந்து வயதில் இருந்தே கிரிக்கெட் மீது தீராக் காதல். அதற்குக் காரணம் கிரிக்கெட்டில் ஆர்வம் கொண்ட அவரின் தந்தை சஞ்சீவ். இவரும் கிரிக்கெட் வீரராக இருந்துள்ளார். ஆனால், அவரால் பெரிதாக வரமுடியவில்லை. இதனால், தன்னுடைய மகனை கிரிக்கெட்டில் ஜொலிக்க வைக்க நினைத்துள்ளார்.

அதனால், ஏழு வயதில் சமஸ்திபூரில் கிரிக்கெட் பயிற்சிக்குச் சேர்த்துள்ளார். பின்னர் தன்னுடைய விவசாய நிலத்தை விற்று, சமஸ்திபூரிலிருந்து நூறு கிமீ தொலைவில் உள்ள பாட்னாவிற்கு சூர்யவன்ஷியை அழைத்துச் சென்றுள்ளார். அப்போது சூர்யவன்ஷிக்கு 9 வயது. அங்கே மணிஷ் ஓஜா என்பவரின் அகடமியில் சேர்த்து பயிற்சி பெறச் செய்துள்ளார்.  

இதுகுறித்து பேசும் பயிற்சியாளர் மணிஷ் ஓஜா, ‘‘எனது பயிற்சி மையத்திற்கு ஒரு நாள்விட்டு ஒரு நாளென நூறு கிமீ தூரம் பயணித்து சூர்யவன்ஷி வருவார். காலையில் 7.30 மணிக்குத் தொடங்கி மாலை வரை தீவிரமாகப் பயிற்சி செய்வார். பிறகு மீண்டும் வீட்டிற்குச் செல்வார்.

இப்படி அவர் தொடர்ந்து நான்கு ஆண்டுகள் பயிற்சி எடுத்தார். இதற்காக சூர்யவன்ஷியின் தந்தையும் தாயும் தந்த ஒத்துழைப்பு அளப்பரியது.தந்தை சஞ்சீவ், மகனின் கனவை நிறைவேற்ற விவசாய நிலத்தை விற்றதுடன், பயிற்சிக்கும், போட்டிகளுக்கும் கூடவே வருவார். 

அவரின் தாய் காலையில் 4 மணிக்கே எழுந்து அவர்களுக்கான உணவைத் தயார் செய்து பயிற்சிக்கு அனுப்புவார். நாங்கள் பயிற்சியளித்தாலும் சூர்யவன்ஷியை இவ்வளவு தூரம் கொண்டு வந்தது பெற்றோர்தான்...’’ என்கிறார்.

அனுபவம் வாய்ந்த முகமது சிராஜ், இஷாந்த் ஷர்மா, பிரஷித் கிருஷ்ணா, ரஷித்கான், வாஷிங்டன் சுந்தர் என எவரையும் விட்டு வைக்கவில்லை. அனைவரின் பந்துகளையும் சிக்சர்களுக்கும், பவுண்ட்ரிகளுக்குமாக விரட்டினார். அவர் அடிக்க அடிக்க பின்னால் விக்கெட் கீப்பிங் செய்த, ஜாஸ் பட்லர் ஆச்சரியமாக பார்த்தபடியே இருந்தார். 

இதில் மொத்தம் 11 சிக்சர்கள், 7 பவுண்டரிகள் என 35 பந்துகளில் சதம் அடித்து அசத்தினார் சூர்யவன்ஷி. வெஸ்ட்இண்டீஸ் வீரர் கிறிஸ் கெயிலுக்குப் பிறகு ஐபிஎல்லில் குறைந்த பந்துகளில் சதம் அடித்த இரண்டாவது வீரர் என்ற பெருமைக்குச் சொந்தக்காரர் ஆனார்.

உண்மையில் நிலைத்து நின்று தொடர்ந்து அதிரடி ஆட்டத்தை வெளிப்படுத்த சூர்யவன்ஷிக்கு இன்னும் நிறைய அனுபவங்கள் தேவைப்படுகின்றன. 

எட்டாம் வகுப்பு படித்துக் கொண்டிருக்கும் சிறுவனான சூர்யவன்ஷியிடம் அதனை இப்போதே எதிர்பார்ப்பது தவறானது. ஆனால், விரைவில் அவரின் தீவிர பயிற்சியால் சிறந்த நுட்பங்களும், அனுபவங்களும் அவருக்குக் கிடைக்கக்கூடும். அப்போது ஐபிஎல்லில் மட்டுமல்ல, இந்திய கிரிக்கெட் அணியிலும் சூரியனைப் போல பிரகாசிப்பார் சூர்யவன்ஷி.