அம்மா யதேச்சையாக ஸ்ட்ராபெரி பிடிக்கும் எனச் சொல்ல, அபிக்கு அதிர்ச்சி. அடுத்து என்ன செய்கிறாள்- என்பதே ‘என் அம்மாவுக்குப் பிடிக்கும்’ கதை.

இதை எழுதியவர், அரசுப்பள்ளி மாணவியான அபிநயஸ்ரீ . இதுபோன்ற பல கதைகளை ‘வாசிப்பு இயக்கத்’தின் மூலம் புத்தகமாக்கி, வெளியிட்டு வருகிறது, தமிழ்நாடு பள்ளிக்கல்வித்துறை.

பொதுவாக பெரியவர்கள் சொல்கிற கதைகளைக் குழந்தைகள் கேட்பார்கள். இப்படி கேட்கும் இடத்திலிருந்து வாசிக்கும் இடத்துக்குக் குழந்தைகளை நகர்த்த வேண்டும். இதற்காகத்தான் வாசிப்பு இயக்கம் ஆரம்பிக்கப்பட்டது...’’ என்கிற முத்துக்குமாரியிடம், ‘‘என்ன மாதிரியான புத்தகங்களைக் குழந்தைகளுக்கு வாசிக்க கொடுக்கின்றனர்..?’’ என்றோம். 

‘‘பெரிய புத்தகங்களைக் கொடுத்தால் குழந்தைகள் பயந்துவிடுவார்கள். சிறிய புத்தகம் என்றால் குழந்தைகள் சுலபமாக வாசித்துவிடுவார்கள். அவர்களுக்கு ஒரு புத்தகத்தை வாசித்த மகிழ்ச்சி கிடைக்கும். அந்த உற்சாகத்தில் அடுத்தடுத்த புத்தகங்களுக்குச் செல்வார்கள்.

அந்தக் குழந்தைக்குப் பத்து வயதுக்கான புத்தகத்தை தர முடியாதல்லவா? நான்காவது படிக்கும் குழந்தை கொரோனா காலத்துக்குப் பிறகு ஆறாம் வகுப்பிற்குப் போய்விட்டது. அந்தக் குழந்தை ஆறாம் வகுப்பிற்குப் போனாலும் கூட அதன் கற்றல் நிலை நான்காம் வகுப்புதான். இப்போது ஆறாம் வகுப்பு படிக்கிறது என்பதற்காக அந்தக் குழந்தைக்கு ஆறாம் வகுப்புக்கான கதைப் புத்தகங்களைக் கொடுக்க முடியாதல்லவா?

இதையெல்லாம் அடிப்படையாக வைத்துத்தான் அரசுப் பள்ளிக் குழந்தைகளுக்காக பிரத்யேகமாக   புத்தகங்களை உருவாக்க வேண்டியிருந்தது. அரசுப் பள்ளியில் பயிலும்  மாணவர்களிடமும் அங்குள்ளஆசிரியர்களிடமும் கதைகேட்டு வாங்கினோம்...’’  என்றவரிடம், ‘‘வயது மற்றும் வகுப்புக்கு மாற்றாக எப்படி புத்தகங்களை உருவாக்கினீர்கள்..?’’ என்றோம்.

‘‘வகுப்பு மற்றும் வயதை ஒதுக்கி வைத்துவிட்டு, அரசுப் பள்ளி மாணவர்களிடம் வாசிப்பு நிலையை மையமாக வைத்து புத்தகங்களை உருவாக்கிக் கொடுத்தோம். ‘நுழை’, ‘நட’, ‘ஓடு’, ‘பற’ என நான்கு வகைகளாக வாசிப்பு நிலைகளைப் பிரித்தோம். கல்வியாளர் மாடசாமிதான் இந்நான்கு நிலைகளுக்குப் பெயர் வைத்தார். வாசிப்பு இயக்கத்தின் வழிகாட்டியும் அவர்தான்.

‘நுழை’ வகைப் புத்தகங்களைப் படித்த குழந்தைகள் அடுத்த நிலைக்குச் செல்வார்கள். இப்படி குழந்தைகளின் வாசிப்பு அடுத்தடுத்த நிலைக்குச் செல்லும்...’’ என்றவர், வாசிப்பு இயக்கத்தின் செயல்பாடு பற்றியும் பகிர்ந்தார்.‘‘2023ல் வாசிப்பு இயக்கம் முன்னோடித் திட்டமாகவே (Pilot study) பரிசோதனை செய்யப்பட்டது. 

சென்னை, திருவள்ளூர், விழுப்புரம், கடலூர், திருச்சி, தஞ்சை, மதுரை, திண்டுக்கல், தூத்துக்குடி, கோவை, ஈரோடு என 11 மாவட்டங்களில், மாவட்டத்திற்கு ஒரு ஒன்றியம் மட்டும் தேர்வு செய்து, மொத்தம் 11 ஒன்றியங்களில் உள்ள அரசுப்பள்ளிகளில் இவ்வாசிப்பு இயக்கம் செயல்படுத்தப்பட்டது...’’ என்கிற முத்துக்குமாரி, வாசிப்பு இயக்கம் வெளியிட்டிருக்கும் புத்தக எண்ணிக்கை பற்றியும் சொன்னார்.

தங்களுக்குக் கிடைக்கும் நேரத்தில் அல்லது நூலக நேரத்தில் இந்தப் புத்தகங்களைக் குழந்தைகள் வாசித்து வருகின்றனர். அடுத்து அரசு உதவி பெறும் பள்ளிகளுக்கும் இம்முறை வாசிப்பு இயக்கப் புத்தகங்கள் செல்ல கல்வித்துறை ஆவன செய்துள்ளது.நான்காவது கட்டத்தில் முழுக்க முழுக்க மாணவர் படைப்புகளைக் கொண்டு வர திட்டமிடப்பட்டுள்ளது.‌ 

அரசுப்பள்ளி ஆசிரியர்கள் மற்றும் அரசு உதவி பெறும்‌ பள்ளி ஆசிரியர்கள் தங்கள் மாணவர்களைக் கதைகளை எழுத வைக்க வேண்டும். இதற்கான முன்னெடுப்புகளை அவர்கள் எடுக்க வேண்டும். அதற்கு இந்த வாசிப்பு இயக்கம் உறுதுணையாக இருக்கும்; இயன்ற உதவிகளைச் செய்யும்.

இப்பொழுது வாசிப்பு இயக்கம் சார்பில் 250 புத்தகங்கள் முழுமையாக வெளிவர உள்ளன. இதுவரை 174 புத்தகங்கள் வெளிவந்துவிட்டன. இன்னமும்  76  புத்தகங்களுக்கான கதைகள் தேவை.