இந்துக்களின் இதிகாசங்களில் மிக முக்கியமானவை இராமாயணமும் மகாபாரதமும். இதில் ஒன்றை மையமாகக் கொண்டு உருவாக்கப்பட்டதே ‘கல்கி’ திரைப்படம். ரூ.600 கோடி ரூபாய் பட்ஜெட்டில் உருவாக்கப்பட்டு ரூ.1200 கோடி வருமானம் ஈட்டிய திரைப்படம் அது. 

இதன் இரண்டாம் பாகம் இப்பொழுது உருவாக்கத்தில் இருக்கும் நிலையில், இந்திய சினிமா இராமாயணக் கதையை ‘ராமாயணா’ என்னும் பெயரில் தயாரித்து வருகிறது.ரூ.850 கோடி பட்ஜெட்டில் மூன்று பாகங்களாக இப்படம் உருவாகிறது. இதன் நடிகர்கள் மற்றும் தொழில்நுட்பக் கலைஞர்களின் பட்டியல்தான் இந்திய சினிமா ரசிகர்களை ஆச்சர்யத்தில் நிமிர்ந்து உட்காரச் செய்திருக்கிறது.

இசையமைப்பாளர்களாக இரண்டு உலகத் தர இசைஞர்கள் - ஏ.ஆர். ரஹ்மான் மற்றும் ஹாலிவுட் புகழ் ஹான்ஸ் ஸிம்மர். ஹான்ஸ் ஸிம்மர், ‘இன்டர்ஸ்டெல்லர்’, ‘இன்செப்ஷன்’, ‘மிஷன் இம்பாசிபிள்’, ‘டாப் கன்’ உள்ளிட்ட மாஸ் ஹாலிவுட் படங்கள் பலவற்றுக்கு இசையமைத்தவர். ‘மேட் மேக்ஸ்’ புகழ் கை நோரிஸ் ஸ்டண்ட் காட்சிகளை உருவாக்குகிறார்.

 உலகத்தரம் வாய்ந்த motion capture, 3D facial tracking, volumetric lighting போன்ற தொழில்நுட்பங்களை இப்படத்தில் பயன்படுத்துகிறார்கள். அதாவது இந்தியப் படங்களில் இதுவரை இல்லாத அளவிற்கு நவீன VFX இந்தப் படத்தில் பயன்படுத்தப்படுகிறது.

இந்தி, தமிழ், தெலுங்கு, மலையாளம், கன்னடம் மற்றும் ஆங்கிலம் உள்ளிட்ட மொழிகளில் ஒரே நேரத்தில் வெளியாகும். ‘கிளாடியேட்டர்’, ‘லார்ட் ஆப் த ரிங்ஸ்’, ‘பைரேட்ஸ் ஆஃப் த கரீபியன்’, ‘ஹாரி பாட்டர்’ பாகங்கள், ‘கேம் ஆப் த்ரோன்ஸ்’ போன்ற உலகப் புகழ்பெற்ற படங்களில் காஸ்ட்யூம் டிசைனர்களாக - ஆர்ட் டைரக்டர்களாக பணியாற்றிய கலைஞர்களே இப்படத்துக்கும் ஒப்பந்தமாகியுள்ளனர். 

இந்தோனேஷியா, அமெரிக்கா, அந்தமான் நிக்கோபார் தீவுகளில் படப்பிடிப்பு நடத்த திட்டமிட்டுள்ளனர். வெறும் புராணக் கதையை படமாக எடுக்காமல், இந்திய கலாசாரத்தையும் அதன் பண்பாட்டையும் உலகுக்கு எடுத்துச்சொல்லும்வகையில் இந்த ‘ராமாயணா’ இருக்குமாம். பார்க்கலாம்!