இயல்பு வாழ்க்கையைப் புரட்டிப் போட்டிருக்கும் மின்தடை பற்றிய மக்களின் மனக் குமுறல்கள் இருட்டில் வரைந்த ஓவியம்தான். அது, 2017 வரை தீராது என்பது தமிழக மக்களுக்கு ஹை வோல்டேஜ் ஷாக்!

டெல்டா விவசாயிகளின் சோகம் நெஞ்சை வதைத்தது. விவசாயம் பொய்த்துப் போனால், நாடு சுடுகாடாகிவிடும் என்பது அனைவருக்கும் தெரிந்ததுதான். இது அரசாங்கத்துக்கு தெரியாமலா இருக்கும்!

‘ஒவ்வொருவரும் உயில் எழுதுகிறோமோ இல்லையோ... இனி நமது மரணம் தெரிவிக்கப்பட வேண்டியவர்களின் பட்டியல் ஒன்றை எழுதி வைக்க வேண்டும்’ என்று மனுஷ்ய புத்திரன் கூறியிருப்பது அனைவரையும் சிந்திக்க வைத்திருக்கும்!

கல்லீரலின் மகத்தான பணிகளை உணர்த்திய ‘உங்களுக்கு நீங்களே டாக்டர்’ பகுதி, மிக மிகப் பயன்மிக்கதாய் அமைந்திருந்தது. நன்றியும் மனமுவந்த பாராட்டுகளும்!

‘ஃப்ரெஞ்ச் கிஸ்’ - சும்மா சொல்லக் கூடாது... முத்தத்தைப் பற்றி மொத்தத் தகவல்களையும் திரட்டி அடிச்சு ஜூஸ் போட்டு ஆளுக்கொரு டம்ளர் கொடுத்துட்டீங்க.

விஜய் நடித்த ‘துப்பாக்கி’ படத்தைப் பற்றி எந்தத் தகவலையும் பாக்கி வைக்காமல் இயக்குனர் ஏ.ஆர்.முருகதாஸ் சரவெடியாக வெடித்து விட்டார். அந்த ‘மிலிட்டரி மீல்ஸ்’ஸுக்காக இப்பவே பசியெடுத்துடுச்சு போங்க!

‘கிசுகிசுவால திருஷ்டி போச்சு’ என்கிற டாப்ஸி, மென்மேலும் பல கிசுகிசுக்கள் கண்டு, ஏகப்பட்ட தகராறுகளில் சிக்கி, கண் திருஷ்டிகளைப் பூண்டோடு அழித்து பீடு நடை போடவேண்டும் என, வாழ்த்த வயதில்லை... வணங்குகிறேன்!

ஆளை அசத்தும் மதுரை மல்லி, இனி ‘புவிசார் காப்புரிமைக் குறியீடு’ பெற்று உலகம் முழுதும் உலா வரப் போவதை நினைத்தாலே பரவசம்தான். இனி நமது ‘மல்லிப்பூ, அல்வா டெக்னிக்’கும் உலகமெல்லாம் பரவி இல்லறத்தை இனிதாக்கும் என எதிர்பார்க்கலாம்!

தோனிக்கு பிராவோ எழுதிய கடிதத்தில், ‘கங்னம் டான்ஸ் கத்துக்கிட்டா கப்பு ஜெயிக்கலாம் என்றது செம கலகல! கிரிக்கெட், அரசியல் என்று எல்லா ஏரியாவிலும் பின்னி எடுப்பதால்தான் அவர் ‘ஆல்’தோட்ட பூபதியோ!