‘‘பவர்கட் நேரத்துலதான் ஆபரேஷன் செய்வேன்னு டாக்டர் அடம் பிடிக்கிறாரே... ஏன்?’’
‘‘இருட்டுல ரத்தம் அவர் கண்ணுக்கு தெரியாததனால மயக்கம் போட்டு விழ மாட்டாரே... அதான்!’’

நாட்டுக்கோழி நாட்டுக்குள்ளதான் வளரும்; ஒயிட் லகான் கோழியும் ஊருக்குள்ளதான் வளரும். வான்கோழி என்பதற்காக அது வானத்தில் வளராது... அதுவும் ஊருக்குள்ளதான் வளர்ந்தாகணும்!
- லெக்பீஸ் கடித்தபடி லெக்சர் அடிப்போர் சங்கம்

‘‘ஹீரோ சார்! க்ளை மாக்ஸ்ல காய்ச்சல் வந்து உயிருக்குப் போராடும்போதும் நீங்க பஞ்ச் டயலாக் பேசுறீங்க...’’
‘‘என்ன டயலாக் டைரக்டர்..?’’
‘‘எனக்கு இப்ப டெங்கு... நீ கொஞ்சம் அடங்கு!’’

தோசைன்னா சுடுறதுக்கு முன்னாடி தண்ணி தெளிப்பாங்க... இட்லின்னா சுட்டதுக்கு அப்புறம் தண்ணி தெளிப்பாங்க... இதுதாங்க வாழ்க்கை!
- வீட்டில் தண்ணி தெளித்துவிட்டதால், தெருவில் திரிவோர் சங்கம்

என்னதான் ‘அஜித்’தை ‘தலை’ன்னு சொன்னாலும், அவர் கையெழுத்தை ‘தலையெழுத்து’ன்னு சொல்ல முடியுமா?
- தலை கால் புரியாமல் தத்துவங்கள் சொல்வோர் சங்கம்

‘‘ஏங்க... உங்களை யாராவது கடன்காரன் தேடி வீட்டுக்கு வந்தா, நான் என்ன பதில் சொல்ல?’’
‘‘உட்கார வச்சு உன் கையால ஒரு காபி போட்டுக் கொடு... அதுக்கப்புறம் வரவே மாட்டான்!’’

‘‘சென்னையை சுத்திப் பார்க்க வந்த வெளிநாட்டுக்காரங்க கிட்ட தலைவர் மானத்தை வாங்கிட்டார்...’’
‘‘அப்படி என்ன செஞ்சுட்டார்..?’’
‘‘இந்த பில்டிங் எல்லாம் வெள்ளைக்காரங்க கட்டினதுன்னு சொல்லி மொபைல் போன் டவர காட்டறாரு!’’‘