பிளஸ் 2வில் சென்டம் வாங்க நீங்கள் தரும் டிப்ஸ் மாணவ, மாணவியருக்கு ஓர் அரிய வரப்பிரசாதம். எதையும் காலம் அறிந்து கச்சிதமாய் வழங்குவதில் உங்களுக்கு எப்போதுமே நூற்றுக்கு நூறுதான்!

உலகம் அழியப் போகுதோ இல்லையோ... அதுக்கு முன்னே தமன்னா, தன்ஷிகா, இனியா, அஞ்சலியைத் தேடி பிடிச்சு ஒரு வார்த்தை பேசிப்புடணும்னு நினைச்சுட்டீங்க. நடத்துங்க நடத்துங்க!

‘‘எனக்கு கல்யாணத்தில் இஷ்டமில்லை. லிவிங் டுகெதர் என்றால் ஓகே. அதுல என்ன தப்பு இருக்கு?’’ என்று இடுப்பழகி இலியானா சொன்னதைப் படித்ததும் ‘‘தப்பே இல்லை’’ என்று கோரஸாகக் கத்தத் தோன்றியது!

24 வயதில் கூகுள் நிறுவனத்தின் வேலையை உதறித் தள்ளி நம் ஊர் ஏரிகளை சுத்தம் செய்யக் கிளம்பியிருக்கும் அருண் கிருஷ்ணமூர்த்தி, ‘கூகுள் கூகுள்...’ பண்ணிப் பார்த்தாலும் கிடைக்காத பாரதப் பொக்கிஷம்!

சர்க்கரை நோய் இருப்பவர்கள் ரத்த தானம் செய்ய முடியும் என்ற டாக்டரின் விளக்கம், ஒவ்வொரு மருத்துவமனையிலும் எழுதி வைக்க வேண்டிய அத்தியாவசிய விளக்கம்!

இன் றைய ஆகப் பெரும் சமூகப் பிரச்னைகளில் காதல் தோல்வியும் முக்கிய பங்கெடுத்துவிட்டது. எதிலும் தோல்வியைத் தாங்கும் மனம் மட்டுமே நினைத்ததை சாதிக்கும் என்பதை இளைஞர்கள் புரிந்துகொள்ள வேண்டும்!

‘கடல்’ பட நாயகி துளசியின் முதல் பேட்டி கேரள ‘இளநீராக’ இனித்தது. சரி, மணி ஓசையாக பேட்டி முதலில் வந்து விட்டது. அடுத்து ‘யானை’ வருமா? அதாங்க,
துளசியின் துள்ளல் புகைப்படங்கள் அடுத்தடுத்த இதழ்களில் வருமா?

‘டிசம்பர் 21ல் உலகம் அழியப் போகிறது’ என்ற வதந்தி பற்றி மனுஷ்ய புத்திரனின் கருத்துகளை அறிந்த பின் கொஞ்சநஞ்சம் மனதில் ஒட்டியிருந்த சந்தேகத் திரையும் விலகிவிட்டது.
‘‘வாசிப்பு உள்ளே போகப் போக, ஏதோ ஒரு வழியில் அது வெளிவந்தே ஆகணும்’’ எனும் கவியோவியத்தமிழனின் ஆக்கபூர்வ சிந்தனைகள் அசர வைத்தன!
- ஆர்.கே.லிங்கேசன்,