மோடியின் ‘குர்தா ரகசியம்’ பற்றிய தகவல்கள் அவர் இமேஜை இன்னும் உயர்த்திவிட்டன. மோடி பிரதமரானால் நிச்சயம் குர்தா தயாரிப்பாளர்களுக்கு ‘செம ஜாக்பாட்’தாங்க!

பார்வையற்றவர்களைத் தாக்கிப் பந்தாடிய சம்பவம் நெஞ்சை உலுக்கியது. பார்வையற்றோர் என்ற கருணை கூட இல்லாத காவல்துறைக்குத்தான் பார்வை இல்லை என்று எண்ணத் தோன்றியது!

வட்டியில்லா தவணைக்கு தடை வரவேற்கத்தக்கது. ‘தவணை முறைதானே’ என்று சக்திக்கு மீறி வாங்கிக் குவிக்கும் மக்களுக்கு இது தற்காலிக ஏமாற்றம் தந்தாலும், நெடுங்கால நிம்மதியைத் தரும்!

கிரிக்கெட், நீச்சல் வீராங்கனையாகத் திகழ்ந்த பிரீத்தி ஸ்ரீநிவாசனை ஒரே நிமிடத்தில் முடக்கிப் போட்ட கடல் அலையைப் பார்த்து, ‘உனக்கு இரக்கமே இல்லையா?’ என்று கேட்கத் தோன்றுகிறது. அவர் கலங்காமல் தன்னைப் போல தண்டுவட பாதிப்பால் முடங்கியவர்களுக்கு சேவை செய்வது பிரமிப்பு.

அமலாபாலின் பேட்டி, பால் போல சுத்தம்! அதுவும், ‘கிராஸ் பண்ணும் காதல் எல்லாமே கல்யாணத்தில் முடிந்தும் விடாது...’ என்று அவர் சொன்னது... ஆகா! எந்தா வல்லிய தத்துவம்!

ஓவியா, ‘மொக்கை’, ‘சப்பை’ போன்ற ‘இலக்கியத்தரமான’ தமிழ் வார்த்தைகளைப் பேசுகிறாரா? ஓவி, எனக்கொரு டவுட்டு... உங்களைப் பார்த்து யாரும் இந்த வார்த்தைகளைப் பேசவே முடியாது. அதனால்தான் நீங்களே பேசிடறீங்களோ?

போட்டோ எடுத்த அந்த நொடியில் தான் கண் மூடியிருந்ததை எம்.ஜி.ஆர் சரியாகக் கணித்து இன்னொரு போட்டோ எடுக்கச் சொன்னது, வாத்தியாரின் தொழில்நுட்ப அறிவுக்கு இன்னொரு சான்று!

நம்ம இமான் அண்ணாச்சிகிட்ட மாட்டிக்கிட்டு, இங்கிலீஷ் பட்ட பாடு செம கலகலப்பு. என்ன... அவர் வரைஞ்ச கவுன் போட்ட ‘இங்கிலீஷ் தாய்’ படத்தையும் போட்டிருந்தீங்கன்னா, நாங்களும் பக்தியா கும்பிட்டிருப்போம்!

‘தமிழ் சினிமா பாட்டு ஆறு வகைப்படும்’ என்று கூறு போட்டு விளக்கிய ஆல்தோட்ட பூபதிக்கு ‘இலக்கிய வேந்தர்’ என்னும் பட்டமளித்து கௌரவிக்கிறோம்!

கவுண்டமணியோடு காமெடியில் கலக்க சத்யராஜ் துடிப்பது போல், துடித்துக் கொண்டுதான் இருக்கிறோம், அந்த காமெடிக் கூட்டணியைக் கண்டுகளிக்க!