யோசனை
அழகாக இருக்கும் தனக்கு
எதில் திருஷ்டி சுற்றிப்
போடப் போகிறார்கள்
என யோசிக்கிறது
செடியில் தொங்கும்
எலுமிச்சம்பழம்

தேடல்
குழந்தைகளை ராஜகுமாரனாக்கி
கதை சொன்ன பாட்டிகள்
முதியோர் இல்லத்துக்குப்
போய் விடவே,
குழந்தைகள்
தேடியெடுத்துப் படிக்கின்றன
பாட்டி கதைகளை
‘நெட்’டிலிருந்து...

அழுகை
பெற்றெடுத்தபோது
அழுத தாயை
அழுதே சிரிக்க வைத்தது
குழந்தை

நினைவு
பெருக்கப்படாத வீடு
துடைக்கப்படாத கண்ணாடி
துவைக்கப்படாத துணிகள்
திறக்கப்படாத அலமாரி
அறியப்படாத சீரியல் முடிவு
குழந்தைகளின் சீண்டல்
இல்லாத படுக்கை
முகத்தில் அறையும் வெறுமை...
யாவும் நினைவூட்டுகிறது
ஊருக்குப் போன மனைவியை!

வேண்டுதல்
குழந்தைகள் அழும்போது
பூஜை மணியின் ஒலிக்கு
செவி சாய்ப்பதேயில்லை
கடவுள்

சுமை
தண்டவாளங்கள் சந்தித்தால்
பகிர்ந்து கொள்ளக்கூடும்
தங்கள் பயணச் சுமைகளை!