கடந்த வருடம் ஜூலை மாதம் அசாமில் உள்ள ஒரு காவல்நிலையத்துக்கு சந்தேகத்துக்கு இடமான ஃபேஸ்புக் பக்கம் தொடர்பாக ஒரு புகார் வந்தது. ஒரு வணிக நோக்கமற்ற சமூக அமைப்பு இந்த முகநூல் பக்கத்தின் மீது குற்றம் சாட்டியது. குழந்தைகள் தொடர்பான பாலியல் வன்முறை, சித்ரவதை ஆகியவற்றை உள்ளடக்கமாகக்கொண்ட வீடியோக்கள், படங்கள் அத்தளத்தில் மிகுதியாகக் கொட்டிக்கிடக்கின்றன என்பது அந்த முகநூல் பக்கத்தின் மீதான புகார்.

இது தொடர்பாக கெளஹாத்தி காவல்துறை ஒரு மாதம் கழித்து சாவகாசமாக ஒரு கிராமத்து இளைஞரைக் கைது செய்திருக்கிறது. ஆனால், அந்த நபரின் செல்போனில் இருந்த வீடியோக்களைப் பார்த்து அதிர்ந்து போயிருக்கிறார்கள். குழந்தைகளை பாலியல் சித்ரவதை செய்யும் கொடூரங்கள் அதில் கொட்டிக்கிடந்திருக்கின்றன.

இந்தக் கொடூரனைக் கைது செய்த காவல் துறை ஆய்வாளர் கீதாஞ்சலி டூலே, ‘அவற்றைப் பார்த்தபிறகு பல இரவுகள் என்னால் தூங்க முடியவில்லை’ என்று வருத்தத்துடன் தெரிவித்திருக்கிறார்.

சிலர், இதன் விஷ வலையில் சிக்கிக்கொண்டு இதன் குரூர ரசிகர்களாகவும் மாறி குற்றங்களுக்கு உடந்தையாகிறார்கள் என்கிறார்கள் நிபுணர்கள். கேட்கவே விபரீதமாக இருக்கிறது.