ஜெட் வேகத்தில் பறக்கும் தமிழ்நாடு தொழில்துறை!

முதல்வர் வைத்த இலக்கு...கூடவே சில கண்டிஷன்ஸ்... ஜெட் வேகத்தில் பறக்கும் தமிழ்நாடு தொழில்துறை!விவரிக்கிறார் மாநில தொழில்துறை அமைச்சர் தங்கம் தென்னரசு

கோவை கொடிசியா தொழில் கண்காட்சி அரங்கில் ‘முதலீட்டாளர் முதல் முகவரி - தமிழ்நாடு’ என்ற பெயரில் முதலீட்டாளர்கள் மாநாடு சமீபத்தில் நடைபெற்றது. இதில் தமிழ்நாட்டின் 22 மாவட்டங்களில் 35,208 கோடி முதலீட்டில் 76,795 நபர்களுக்கு வேவைாய்ப்பு ஏற்படுத்தும் வகையில் 54 நிறுவனங்களுடன் அரசு புரிந்துணர்வு ஒப்பந்தம் கையெழுத்தானது. இந்த மாநாடு; தொழில் துறை வளர்ச்சியில் மேற்கொள்ளப்படும் நடவடிக்கைகள்; தமிழ்நாடு முழுவதும் தொழில்துறையை விரிவுபடுத்துவதற்கான திட்டங்கள்… என பல கேள்விகளோடு, தமிழ்நாடு தொழில் துறை அமைச்சர் தங்கம் தென்னரசு உடனான ஓர் உரையாடல்.

இந்த தொழில் ஒப்பந்தங்கள் மூலம் தமிழகத்திற்கு கிடைக்கக்கூடிய நன்மைகள் என்ன?  

முதற்கட்ட மிகப்பெரிய நன்மை ஆயிரக்கணக்கான இளைஞர்கள், படித்தவர்கள், வேலைவாய்ப்பு இன்றி இருப்பவர்களுக்கு வேலை வாய்ப்புகள் கிடைக்கும். குறிப்பிட்ட பகுதிகளுக்கு மட்டுமில்லாமல் பரவலாக மாநிலம் முழுவதும் தொழில் வளர்ச்சிக்கு ஒப்பந்தங்கள் வழிவகுக்கும். இதன் மூலமாக தமிழ்நாட்டின் பொருளாதாரம் மேம்படும். மாண்புமிகு முதலமைச்சர் அவர்கள் 2030ல் தமிழ்நாட்டின் பொருளாதாரம் ஒரு ட்ரில்லியன் அமெரிக்கன் டாலராக இருக்க வேண்டும் என்று இலக்கு நிர்ணயித்திருக்கிறார். அதற்கு இவை பெரிய அளவில் உதவி செய்யும்.

தமிழ்நாடு முழுவதும் தொழில்துறையை விரிவுபடுத்துவதற்கான திட்டங்கள் என்ன?

தொழில் வளர்ச்சி என்பது ஒரு குறிப்பிட்ட இடத்தில் மட்டும் மையம் கொண்டிருக்கிறது. ஒரகடம், இருங்காட்டுப்படை, பிள்ளைப்பாக்கம், திருவள்ளூர், பொன்னேரி, கும்மிடிப்பூண்டி என சென்னையைச் சுற்றியே இருந்துள்ளது. 90களின் இறுதியில் பெரிய அளவில் கார் தொழிற்சாலைகள், ஆட்டோமொபைல் நிறுவனங்கள், பெரும் கனரக தொழிற்சாலைகள் சென்னையை மையமாக வைத்து உருவாகின. அதற்கு முக்கிய காரணம் சென்னையின் சர்வதேச அளவிலான விமான நிலையம், பெரிய துறைமுகம். அதே போல் கிருஷ்ணகிரி, ஓசூர், கோவை மற்றும் திருச்சி குறிப்பிட்ட அளவில் சிறு, குறு தொழில்களுக்கான இடமாக இருக்கிறது.

ஆக இந்த தொழில் வளர்ச்சி சமச்சீர் வளர்ச்சி ஆகவேண்டும். எனவே, தமிழ்நாட்டில் வாய்ப்பு இருக்கக்கூடிய பிற இடங்களுக்கும் கொண்டு போக வேண்டும். தெற்கே எல்லாவிதமான வசதிகள் இருந்தாலும் கூட பெரிய அளவில் தொழில் வளர்ச்சி வரவில்லை. குறிப்பாக தூத்துக்குடி மாவட்டத்தில் துறைமுகம், ஏர்போர்ட் இருக்கிறது. ஆக, நெல்லை,தூத்துக்குடி, விருதுநகர், ராமநாதபுரம் போன்ற தென்மாவட்டங்களில் தொழில் வளர்ச்சியை பெரிதாகக் கொண்டு வர வேண்டும்.  

அதே நேரத்தில் விழுப்புரம், திருவண்ணாமலை, கடலூர் போன்ற வட மாவட்டங்களில் தொழில் வளர்ச்சி மற்ற மாவட்டங்களோடு ஒப்பிடும் போது மிகக் குறைவாகவே இருக்கிறது. அங்கேயும் அடிப்படையாக வேலை வாய்ப்புகளை உருவாக்க வேண்டும். தொழில் வளர்ச்சி வந்தால்தானே வேலைவாய்ப்பு வரும். இதையெல்லாம் உள்ளடக்கித்தான் பரவலாக தொழில் அமைப்பை உருவாக்க வேண்டும் என்கிற முனைப்பில் இருக்கிறோம்.

தமிழகத்தில் உள்ள மனித வளத்தை எப்படி பயன்படுத்தப் போகிறோம்?

இந்த விஷயத்தில் தமிழ்நாடு மிகச்சிறந்த மாநிலம். இந்தியாவில் இருக்கக் கூடிய மிக முன்னணி கல்வி நிறுவனங்கள் சென்னையில் இருக்கின்றன. திறமையானவர்கள் படித்து வருகிறார்கள். அந்தக்காலத்திலேயே தமிழ் நாடு முழுவதும் பெரிய அளவில் பொறியியல் கல்லூரிகள், தொழில்நுட்பக் கல்லூரிகள், பாலிடெக்னிக், ஐடிஐ என இருந்தன. இந்த மனித வளத்தை சரியான முறையில் பயன்படுத்தவில்லை. படித்துவிட்டு வருபவர்கள் பணியில்  இருக்கிறார்களா என்பது மிகப் பெரிய கேள்வி.