நாய் நகத்தால் லேசாகப் பிராண்டினாலும் என்ன செய்ய வேண்டும்?

மீண்டும் மீண்டும் எழும் சந்தேகம் இதுவாகத்தான் இருக்கிறது. 

நாய் நகத்தால் ரொம்ப லேசாகப் பிராண்டி விட்டது. இதற்கு என்ன செய்ய வேண்டும்? 

வளர்ப்பு நாய்க்கு முறையாக வருடாந்திர தடுப்பூசிகள் அப்டுடேட்  போட்டாச்சு. அந்த நாய் பிராண்டினாலோ லேசாக பல் பட்டாலோ கூட ரேபிஸ் தடுப்பூசி போட வேண்டுமா? 

எனது பதில்: நாயோ, பூனையோ; அது வளர்ப்பு விலங்கோ, தெரு விலங்கோ; உங்களைக் கடித்தாலோ, பிராண்டினாலோ நீங்கள் கவனிக்க வேண்டியது இதுதான்:
கடித்த / பிராண்டிய இடத்தில் லேசான அளவு ரத்தம் (ஒரு சொட்டு இல்லை. அதைவிடக் குறைவாக இருந்தாலும் சரிதான்) வெளியே கண்ணுக்குத் தெரிந்தாலும் அது ‘மூன்றாம் நிலை’ ரேபிஸ் தொற்றுப் பரவலுக்கான காயமாக கணக்கில் கொள்ளப்பட்டு காயம் பட்ட இடத்தைச் சுற்றி ரேபிஸ் இம்யூனோகுளோபுளின் மற்றும் ரேபிஸ் தடுப்பூசிகள் அட்டவணைப்படி பெற்றுக் கொள்ள வேண்டும். 

சிலர் கேட்கிறார்கள்... ‘ரொம்ப ரொம்ப லேசான காயம்தான் டாக்டர்...  ரொம்ப சின்ன அளவுதான் ரத்தம் வந்தது... இதுக்குக் கூடவா தடுப்பூசியும் இம்யூனோகுளோபுளினும் போடணும்’ என்று? 

ரேபிஸ் உண்டாக்குகின்ற வைரஸின் சைஸ் - 180 நானோமீட்டர் நீளம், 60 நானோமீட்டர் அகலம்.

இந்த நானோமீட்டர் என்றால் எவ்வளவு தெரியுமா? 

ஒரு சென்டிமீட்டரில் பத்து மில்லிமீட்டர் என்பது நம் அனைவருக்கும் தெரியும். ஒரு மில்லிமீட்டரில் மட்டும் எவ்வளவு நானோமீட்டர் இருக்கிறது என்று கணிக்க முடியுமா? 
1 மில்லி மீட்டர் = 1000000 நானோமீட்டர்கள். 1 மில்லிமீட்டருக்குள் பத்து லட்சம் நானோமீட்டர்கள் அடக்கம் என்றால் 180 நானோமீட்டர் நீளம் கொண்ட இந்த வைரஸ்கள் ஒரு மில்லிமீட்டர் காயத்துக்குள் 5000 - 6000க்கும் மேல் இருக்கும் என்பதை நினைவில் கொள்ள வேண்டும்.