தமிழ்நாட்டில் சுமார் 1168 திரையரங்குகள் இருக்கின்றன. இவை வருடம் முழுக்க திறந்திருக்க வேண்டும். ஒவ்வொரு வாரமும் நான்கைந்து படங்கள், சில நேரங்களில் பத்து படங்கள் கூட வெளியாகின்றன.

ஆனால், அவை வெளியாகிற நாளில் அரங்கம் நிறையவேண்டும் என்றுகூட யாரும் எதிர்பார்ப்பதில்லை. சுமார் இருபது முதல் முப்பது பேர் வந்தால் படம் போடலாம் என்று எதிர்பார்க்கிறார்கள். அப்படியிருந்தும் அவ்வளவு பேர் கூட வராமல் காட்சிகள் ரத்தாகும் அவலம்தான் நடந்துகொண்டிருக்கிறது.

இதனால் திரையரங்குகளுக்குக் கூட்டம் வரவைக்க என்னென்ன செய்யலாம் என்று யோசித்துக்கொண்டிருந்தவர்களுக்கு ஹாலிவுட்டில் நடைமுறைப்படுத்தப்பட்டிருக்கும் ரீ-ரிலீஸ் எனும் பழைய படங்களின் மறு வெளியீட்டை தமிழிலும் அறிமுகப்படுத்தினார்கள்.

சிவாஜி, எம்ஜிஆர் படங்கள் முதலில் மறுவெளியீடு செய்யப்பட்டன. அவற்றிற்கு குறிப்பிட்ட அளவு வரவேற்பு கிடைத்தது. அதன்பின், பெரும் ரசிகர் பட்டாளத்தைக் கொண்ட நடிகர்களின் படங்களை மறு வெளியீடு செய்யத் தொடங்கினார்கள்.

தனுஷின் ‘3’ படம் உட்பட சில படங்களை எவ்வித விளம்பரமும் செய்யாமல் திரையரங்குகளில் திரையிட்டனர். அதற்கு அவர்கள் எதிர்பார்த்ததைக் காட்டிலும் கூடுதல் வரவேற்பு கிடைத்தது.

‘‘ரீ-ரிலீஸ் படங்களுக்கு வரவேற்பு நல்லாயிருக்கு. குறிப்பாக யூத் ஆடியன்ஸ் மத்தியில் நல்ல ரெஸ்பான்ஸ். ஏனெனில், அவர்கள் பிறப்பதற்கு முன் வந்த படம் அல்லது மிஸ் பண்ணிய படமாக இருப்பதால் அதைக் காண திரையரங்கம் வருகிறார்கள். 

அதனால் கல்ட், கிளாசிக் படங்களை மீண்டும் திரையில் எக்ஸ்பீரியன்ஸ் செய்ய ஆர்வமாக இருக்கிறார்கள்...’’ என்று சொல்லும் ‘கமலா’ திரையரங்க உரிமையாளரான கமல், ‘‘எங்கள் திரையரங்கத்தைப் பொறுத்தவரை ரீ-ரிலீஸ் படங்களுக்கு நல்ல வரவேற்பு கிடைத்துள்ளது. ரீ-ரிலீஸ் படங்கள் வரும்போது ரசிகர்கள் ஹிட் பாடல்களை ஒன்ஸ்மோர் கேட்கிறார்கள். இது எங்களுக்கு உற்சாகத்தைக் கொடுக்கிறது...’’ என்கிறார்.

‘‘தமிழ்நாட்டில் 1168 திரையரங்குகள் உள்ளன. இந்த தியேட்டர்களுக்கு கன்டென்ட் வேண்டும். சமீப காலமாக பான் இந்தியா என்று சொல்லக்கூடிய மற்ற மொழி படங்கள்தான் ஓடுகிறது.  

‘‘ரீ-ரிலீஸ் படம் என்றால் அது கிளாசிக்கல் படமாக அல்லது பேசப்பட்ட படமாக இருந்தால் அதற்கு இளைஞர்கள் மத்தியில் வரவேற்பு இருக்கும்...’’ என்கிறார் தயாரிப்பாளரான முக்தா சுந்தர்.

சமீபத்தில் ‘நாயகன்’ படம் வெளியிடும்போது சிலர் ‘அப்போது எனக்கு பத்து வயது. இப்போது படம் பார்க்க ஆர்வமாக இருந்தது’ என்றார்கள். ரீ-ரிலீஸ் படங்களில் வருமானம் முதல் முறை போல் இல்லையென்றாலும், குறைந்தபட்ச லாபம் உண்டு.அப்போது ‘நாயகன்’ சுமார் 5 கோடி ரூபாயில் தயாரிக்கப்பட்டு 40 தியேட்டர்களில் வெளியானது. 

இப்போது அமெரிக்கா, ஐரோப்பா உட்பட 200க்கு மேற்பட்ட தியேட்டர்களில் ரீ-ரிலீஸ் செய்யப்பட்டுள்ளது.  ஏனெனில், உலகளவில் ‘டாப் 100’ பட வரிசையில் ‘நாயகன்‘ உள்ளது. அந்தவகையில் ரீ-ரிலீஸ் பண்ணுவதற்கு தமிழில் பல படங்கள் உள்ளன...’’ என அழுத்தமாகச் சொல்கிறார் முக்தா சுந்தர். 

‘‘எனது ‘ஆட்டோகிராஃப்’ திரைப்படம், 21 வருஷத்துக்குப் பிறகு ரீ-ரிலீஸ் என்ற செய்தி மகிழ்ச்சியைக் கொடுக்கிறது...’’ என்கிறார் இயக்குநர் சேரன்.‘‘நான் எப்போதும் வியாபார நோக்கில் படம் எடுப்பதில்லை. 

அப்படி எடுத்திருந்தால் ஐந்து ஹீரோவை வெச்சு பெரிய ஹிட் கொடுத்து ஐந்து வருஷத்துல காணாமல் போயிருப்பேன். இன்னும் என் படங்கள் தமிழ் நாட்டில் யாரோ ஒருவருக்கு தன்னம்பிக்கை கொடுக்கும் படைப்புகளாக இருக்கிறது. அப்படி துவண்டுபோய் உள்ள ஒருவரை என் படங்கள் கரை சேர்க்கிறது என்றால் அதையே பெரிய வெற்றியாகப் பார்க்கிறேன். 

எந்தத் தோல்வியாக இருந்தாலும் கடந்துபோகும் மனநிலை வேண்டும் என்பதுதான் ‘ஆட்டோகிராஃப்’ படத்தின் மையம். அப்பொழுது மட்டுமல்ல... இப்பொழுதும் பொருந்தக்கூடிய சப்ஜெக்ட் இது. 

அப்படியிருக்கும் படங்கள் எப்பொழுது ரீ-ரிலீஸானாலும் ஓடும்.அதேநேரம் ரீ-ரிலீஸ் என்பது பெரிய சாதனை இல்லை. இதை தெளிவாக புரிந்துவைத்திருக்கிறேன். வருங்கால சந்ததிக்கு நல்ல கருத்துகளை விதைக்க இந்த மறுவெளியீடு என்பதும் ஒரு நல்ல உத்தி. இதைப் பயன்படுத்துவதில் தவறில்லை...’’ அழுத்தமாகச் சொல்கிறார் சேரன்.