ஜில்லிட வைக்கும் டூ-இன்-ஒன் ஐஸ்க்ரீம் போல தீபாவளிக்கு இரட்டை சிறப்பிதழ் தந்து எங்களை திக்குமுக்காடச் செய்து விட்டீர்கள்... நன்றி!

நெல்லை, வரதராஜபுரம் கிராமம் காலியான சோகம் மனதைப் பிசைந்தது. மீண்டும் பழைய கிராமத்தை உருவாக்கியே தீருவோம் என்று அவர்களுக்கு வந்திருக்கும் வேகம், ‘முன்னாள் கிராமவாசிகள்’ எல்லோருக்கும் வந்தால் நன்றாக இருக்கும்!

அவமானங்களையும் சரியான வார்த்தைகள் மூலம் அழகாக மாற்றியமைக்கலாம் என்பதை ‘சுட்ட கதை சுடாத நீதி’ எளிமையாகச் சொல்லிவிட்டது.

என்ன விஜய்... இந்தியில் நடிக்கப்போறீங்களா? வாயில் கொஞ்சம் சர்க்கரை அள்ளிப் போட்டுக்கங்க. கமல், ரஜினி போல நீங்களும் இந்தியாவை ஒரு கலக்கு கலக்குங்க!

‘ஓப்பன் டாக்’கில் இந்தி நடிகை பிபாஷா பாசு, ‘நிலையான ஒரு உறவுக்காக ஏங்கிக்கிட்டு இருக்கேன்’ என்று சொல்லியிருக்கும் வார்த்தைகளிலேயே பல ‘நிலையில்லாத உறவுகள்’ நிழலாடுகின்றன. சீக்கிரம் நிம்மதியான ஒரு ‘நிலை’யை அவர் எட்ட, ஆல் தி பெஸ்ட்!

‘வடகிழக்கு வசந்தம்’ படிக்கும்போதே மலைகளின் பேரரசியான மிசோரம் மாநிலம் சென்று வந்த
எஃபெக்ட் கிடைத்தது. நன்றி!

தீபாவளி கொடுமைகளிலிருந்து தப்பிக்க டாப் பத்து வழிகள் படு சூப்பர். பர்ச்சேஸில் மனைவியருக்கு பேக் தூக்கி ‘பேக்கு’ மாதிரி அலையப் போகும் கணவன்களுக்கு இது ஒரு டைமிங் அலர்ட்!

‘சோரியாசிஸ்’ நோயைச் சொல்லக்கூட கூச்சப்படுபவர்களுக்கு தனக்குத்தானே செய்துகொள்ளக் கூடிய அக்கு மருத்துவக் குறிப்புகளை டாக்டர் எம்.என்.சங்கர் வழங்கிய விதம், அருமை!

‘ச்சீய்’ பக்கங்களில் இந்த வாரம் ‘போர்னோகிராஃபி’ வரலாற்றைத் துவைத்துக் காயப்போட்டு விட்டீர்கள். பேசாப் பொருளை இத்தனை விளக்கமாகப் பேசும் உங்கள் முயற்சி, வாழ்க, வளர்க!