கெமிஸ்ட்ரி டீச்சர்!
கலாம் ஐயா போலவே உருவ ஒற்றுமை கொண்ட ‘உடுமலை கலாம்’ அவர்களுக்கும் எங்கள் சலாம். கலாம் கண்ட கனவை நிறைவேற்றும் தெம்பும் உறுதியும் இவர் பெற வாழ்த்துவோம்! - எஸ்.சிநேகா, சென்னை.
அடடா... நயன்தாரா எல்லா ஆங்கிளிலும் அசத்துறாரே! ஜெயம் ரவியுடன் என்ன... யாருடனுமே அவருக்கு கெமிஸ்ட்ரி வொர்க் அவுட் ஆகும். தமிழ் சினிமாவின் கெமிஸ்ட்ரி டீச்சரே அவர்தானய்யா! - எம்.மிக்கேல்ராஜ், சாத்தூர்.
சமூக வலைத்தளங்கள் சமூகப் பிரச்னைகளை அலசும் தளங்களாக மாறி வருவது அருமை. பாதரசம் சூழ்ந்த கொடைக்கானல் மீண்டும் சுத்தமாகி, பனி சூழ்ந்த பிரதேசமாக மாறட்டும்! - ஜி.சின்னகண்ணு, வேலூர்.
சத்யராஜ் சாதாரணமாகவே எல்லாப் படங்களிலும் பின்னியெடுப்பார். இப்போ ஃபேன்டஸி பேயா வந்து லொள்ளு பண்ணப் போறாரா! ஏனுங்... காத்திருக்கோம்ங்..! - மு.மதிவாணன், அரூர்.
‘மாணவனை தொழிலதிபராக்கிய ஃபேஸ்புக்’ கட்டுரை அபாரம். சவுக்கு உற்பத்தியில் சத்தமின்றி ஒரு சாதனை புரிந்துகொண்டிருக்கும் சக்திவேலுக்கு எங்கள் லைக்ஸ் பல! - இரா.வளையாபதி, கரூர்.
‘லிங்கா’ பட விஷயத்தில் ரஜினிக்கு நேர்ந்தது எல்லா நடிகர்களுக்குமே பாடம் என இயக்குநர் விக்ரமன் கூறியுள்ளது நூற்றுக்கு நூறு சரியான வார்த்தை! - ஏ.எஸ்.நடராஜன், சிதம்பரம்.
‘குப்பை மலைகளில் புதையும் நகரங்கள்’ நிதர்சன உண்மையின் வெளிப்பாடு. நகரங்களின் குப்பைகளை சரியாக நிர்வகிக்க அரசுதான் தொலைநோக்குத் திட்டமிட வேண்டும்! - எம்.பர்வீன் பாத்திமா, திண்டுக்கல்.
சுந்தர் பிச்சைக்கு முன்பே உலக நிறுவனங்களை ஆளும் இந்திய சி.இ.ஓ.க்கள் பற்றிய விபரமும் அதற்கான காரணங்களும் மலைக்க வைத்தன. சிந்திக்கவும்தான்! - எஸ்.இளங்கோவன், தஞ்சாவூர்.
‘அப்பா சுட்ட தோசை’... பெயரே பசியைத் தூண்டுகிறதே! பசி.com மெனுவே ‘சப்பு’ கொட்ட வைக்கிறதே! எங்கே விரட்டிப் பிடிக்கிறீர்கள்... இப்படி வெரைட்டி ஹோட்டல்களை? - ஜானகி ரங்கநாதன், சென்னை-4.
வாரா வாரம் நாஞ்சில் நாடனின் ‘கைம்மண் அளவு’ சமுதாய அவலங்களை இயல்பாய் தோலுரித்துக் காட்டுகிறது. பாராட்டுகள்! - பாபு கிருஷ்ணராஜ், கோவை-2.
என்னதான் ‘விநோத ரஸ மஞ்சரி’யாக இருந்தாலும் நாயை மணக்கும் பெண்ணா? டோமினிக் பற்றிப் படித்து தலையில் அடித்துக்கொள்ளத்தான் தோன்றியது! - ‘மீசை’ எஸ்.மூர்த்தி, மஞ்சக்குப்பம்.
|