குறுங்காடாக மாறிய குப்பைமேடு!

பொதுவாக, ஒரு ஊரில் குப்பைமேடாக மாறிப்போன ஓர் இடம் பழைய நிலைக்கு திரும்புவது அத்தனை சாத்தியமில்லாத காரியம். ஆனால், நினைத்தால் எதையும் சாதிக்கமுடியும் என நிரூபித்திருக்கிறார்கள் நீடாமங்கலத்தைச் சேர்ந்த கிரீன்நீடா அமைப்பினர். தங்கள் ஊரின் குப்பைமேட்டை சிறந்ததொரு குறுங்காடாக மாற்றியுள்ளனர்.   

தஞ்சாவூரிலிருந்து நாகப்பட்டினம் செல்லும் நெடுஞ்சாலையில் இருக்கிறது நீடாமங்கலம் பேரூராட்சி. இங்கே தென்னக ரயில்வேக்கும், இந்து அறநிலையத்துறைக்கும் சொந்தமான இடத்தில் பொதுமக்கள் நீண்டநாளாக குப்பையைக் கொட்டி வந்தனர். இதனால் துர்நாற்றம் ஏற்பட, அதனருகில் உள்ள பகுதியினர் வசிக்க முடியாமல் பலமுறை போராட்டங்களும் கோரிக்கை மனுக்களும் அளித்திருக்கின்றனர். இந்நிலையில்தான், அந்த இடம் இப்போது குறுங்காடாக மாறி வருகிறது.   

‘‘கடந்த 25 ஆண்டுகளாக மக்கள் அங்க குப்பை கொட்டிட்டு இருந்தாங்க. பேரூராட்சி சேகரிக்கும் குப்பைகள் தவிர, திருமண மண்டபங்கள் மற்றும் ஹோட்டல்கள்ல உள்ள எச்சில் இலைகளும், வீடுகள் இடிக்கும்போது வரும் கழிவுகளும் அங்கேதான் கொட்டப்படும். இதனால, அந்த இடமே பெரிய குப்பைக்காடா மாறிடுச்சு. மொத்தம் ரெண்டு ஏக்கர் நிலம். அதை மாத்தணும்னு நிறைய பேர் சொன்னாங்க. அதனால, களத்தில் இறங்கி வேலையைச் செய்தோம்...’’ என யதார்த்தமாகப் பேசுகிறார் கிரீன்நீடா அமைப்பின் ஒருங்கிணைப்பாளர் ராஜவேலு.   

‘‘ஆரம்பத்துல அந்த இடம் விவசாய நிலமா இருந்துச்சு. இந்து அறநிலையத்துறைக்கான இடத்தை குத்தகைக்கு எடுத்து விவசாயம் பண்ணிட்டு இருந்தாங்க. இதையொட்டி தென்னக ரயில்வே இடம் வரும். பக்கத்திலுள்ள விவசாய நிலங்களை தனியார்கள் பிளாட் போட்டதால் இந்த இடமும் விவசாயம் செய்யப்படாம அப்படியே கிடந்தது.

இதனால, மக்கள் கொஞ்சம் கொஞ்சமா அங்க குப்பைகளைக் கொட்ட ஆரம்பிச்சாங்க. இதுக்குக் காரணம் பேரூராட்சியின் குப்பைகளுக்கான திடக்கழிவு மேலாண்மை பகுதி பக்கத்துல இருந்ததுதான். ஆனா, அந்த இடம் 2 ஆயிரம் சதுரஅடிதான் இருக்கும். அந்தச் சின்ன இடத்துல பேரூராட்சி திடக்கழிவு மேலாண்மை மூலம் உரம் தயாரிக்கிறாங்க. மக்களும் பக்கத்துல குப்பைகள் கொட்ட, ஒருகட்டத்துல குப்பைமேடாகி துர்நாற்றம் வீச ஆரம்பிச்சது.