Coal இந்தியாவுக்கு நோ... இறக்குமதி நிலக்கரிக்கு ஜே!

ஒன்றிய அரசு உருவாக்கும் மின்தட்டுப்பாட்டின் ரகசியம்

கொளுத்தும் கோடையில் இரண்டு ஃபேன் இருந்தால்தான் உறக்கமே வருகிறது. கொஞ்சம் வசதியானவர்கள் பாடு பரவாயில்லை, சில்லென்ற ஏசி காற்றில் சுகமாக உறங்குவார்கள்.
நள்ளிரவில் மின்தடையால் பட்டென இரவு விளக்கும், மின்விசிறியும் கண் மூடும்போது உருவாகும் கடுப்பு இருக்கிறதே... அது சொல்ல முடியாத சோகம். நாளெல்லாம் பாடுபட்டுவிட்டு இரவில் நிம்மதியாய் உறங்கலாம் என்று அலுத்து சலித்து படுத்தால் உடனே பீஸைப் பிடுங்கிவிடுகிறார்கள். இப்படிப் புலம்பாத பொதுஜனமே இல்லை.

காரணம் கேட்டால் நிலக்கரித் தட்டுப்பாட்டால் மின் உற்பத்தி குறைவு என்கிறது மத்திய அரசு. ‘இன்னமும் மூன்று நாட்களுக்குத்தான் நிலக்கரி கையிருப்பு இருக்கிறது... ஒரு வாரத்துக்குத்தான் இருக்கிறது...’ என வாட்ஸ் அப் பார்வேடுகள் கதிகலங்க வைக்கின்றன. மின்சாரத்தால் சுவாசிக்கப் பழகிவிட்ட நவீன காலத்தில் அதைத் தயாரிக்கத் தேவையான நிலக்கரி இல்லை என்றால் என்ன செய்ய? பொருளாதாரமே ஸ்தம்பித்துவிடாதா, புழுக்கத்துக்கு தெருவில் படுக்க வந்தவர்கள் வாழ்க்கை முழுக்கவும் தெருவுக்கு வந்துவிட்டதா என்று எண்ணற்ற கேள்விகள் நம் மனதைக் குடைந்துகொண்டிருக்கின்றன.

நாம் இப்படிப் புலம்பிக்கொண்டிருக்க மறுபுறம் நிலக்கரியைத் தயாரிக்கும் கோல் இந்தியா நிறுவனம், ‘இந்த வருடம் நாங்கள் போன வருடத்தைவிட அதிகமான நிலக்கரியைத்தான் உற்பத்தி செய்திருக்கிறோம்’ என்று சொல்லியிருக்கிறார்கள். அப்படியானால் உற்பத்தியான நிலக்கரியை வாங்கவில்லையா? வாங்குகிறார்களாம். ஆனால், அவை மின் உற்பத்தி நிலையங்களுக்குச் செல்ல தாமதமாகிறதாம். ரயில்வே துறையால் இந்தத் தாமதம் என்று சப்பைக்கட்டு கட்டுகிறார்கள்.

அனைத்திந்திய ஆற்றல் பொறியியலாளர்கள் அமைப்பு (All India Power Engineers Federation - AIPEF) தலைவர் சைலேந்திர துபே இது தொடர்பாக காட்டமான கேள்விகளை மத்திய அரசின் எரிசக்தித்துறை அமைச்சகத்திடம் எழுப்பியிருக்கிறார். ‘‘நாங்கள் எங்கள் நிலக்கரிகளை மின் உற்பத்தி நிலையங்களுக்குக் கொண்டு செல்ல போதுமான ஏற்பாடுகளை செய்திருக்கிறோம். ஆனால், அவை தாமதமாகின்றன. ஆனால், தனியார் நிறுவனங்களிடம் உள்ள இறக்குமதி செய்யப்பட்ட நிலக்கரி மட்டும் எப்படி சரியான நேரத்துக்கு மின் உற்பத்தி நிலையங்களை அடைகின்றன?’’ என்று கேட்டிருக்கிறார்.

கடந்த மாத இறுதியில் மத்திய அரசின் எரிசக்தித் துறை அமைச்சகத்திடமிருந்து ஒரு கடிதம் வந்திருக்கிறதாம். இரண்டு கோடியே இருபது லட்சத்து நாலாயிரத்து தொள்ளாயிரம் டன் நிலக்கரி அரசின் அனல் மின் நிலையங்களுக்காகவும்; ஒரு கோடியே ஐம்பத்தொன்பது லட்சத்து முப்பத்தாறாயிரம் டன் நிலக்கரி தனியார் மின் தயாரிப்பு நிலையங்களுக்கும் இறக்குமதி செய்யவேண்டுமென அதில் குறிப்பிடப்பட்டிருக்கிறதாம்.

நன்கு கவனியுங்கள்... இறக்குமதி செய்யுங்கள் என குறிப்பிடப்பட்டிருக்கிறது. கோல் இந்தியாவிலிருந்து வாங்குங்கள் என்று சொல்லப்படவில்லை.ஒருபுறம் ஒன்றிய அரசு தனியார் நிறுவனங்களிடமிருந்து இறக்குமதி நிலக்கரியை வாங்குங்கள் என்று மாநில அரசின் அனல்மின் நிலையங்களிடம் சொல்லியிருக்கிறது. ஆனால், தனியார் அனல்மின் நிலையங்களுக்கு இப்படியான நிபந்தனையை விதிக்கவில்லை. ஆனால் அவர்கள்தான் வழக்கமாக இறக்குமதி நிலக்கரியை வாங்குகிறார்கள்.