பயோடேட்டா - ஹெல்மெட்

பெயர் : தலைக்கவசம். மக்களின் வழக்கத்தில் ஹெல்மெட்.
பிறந்த இடம் : இந்த இடத்தில்தான் என்று துல்லியமான தகவல் இல்லை.
பிறந்த தேதி : கி.மு.2500ம் வருடத்துக்கு முன்பு.

வரலாறு : போரின் போது தலையில் அடிபடாமல் இருப்பதற்காக கி.மு.2,500களில் உலோகத்தால் ஆன ஹெல்மெட்டுகள் தயாரிக்கப்பட்டன. இதை படைத்தளபதிகள் உட்பட உயர்ந்த பொறுப்பில் இருந்தவர்கள் மட்டுமே அணிந்தனர். போர் வீரர்கள் அணியவில்லை. கி.மு.900களில் அசிரியன் போர்வீரர்கள் முதன் முதலாக வெண்கலத்தால் ஆன ஹெல்மெட்டுகளை அணிந்து போரிட்டனர். எதிரிகளின் வாள்வீச்சு மற்றும் அம்பிலிருந்து தலைகளைக் காத்துக் கொள்வதற்காக அசிரியன் போர்வீரர்கள் ஹெல்மெட் அணிந்ததாக வரலாறு சொல்கிறது.

இதைத் தொடர்ந்து ஹெல்மெட்டின் அவசியம் உலகம் முழுவதுமான போர்வீரர்களின் மத்தியில் பிரபலமானது. பிறகு 18ம் நூற்றாண்டில் சுரங்கத் தொழிலில் ஈடுபட்டவர்கள் சுரங்கத்தில் எதிர்பாராமல் நிகழும் அசம்பாவிதங்களில் இருந்து தலைகளைப் பாதுகாக்க உலோகத்தால் ஆன ஹெல்மெட்டுகளை அணிய ஆரம்பித்தனர். இந்த ஹெல்மெட்டுகள் உருண்டையாக தொப்பி வடிவில் வடிவமைக்கப்பட்டிருந்தன.

அடுத்து அணை, கப்பல் கட்டுதல் போன்ற கட்டுமானப்பணிகளில் ஈடுபடுபவர்களுக்கான ஹெல்மெட்டுகள் உருவாயின. இருபதாம் நூற்றாண்டின் ஆரம்பங்களில் தோலினால் ஆன ஹெல்மெட்டுகள் பிரபலமாயின. குறிப்பாக இரண்டாம் உலகப்போரின்போது அமெரிக்கா, பிரான்ஸ், ரஷ்யா, ஜெர்மனி, இத்தாலியைச் சேர்ந்த விமானிகள் தோலினால் ஆன ஹெல்மெட்டுகளைத்தான் அணிந்திருந்தனர்.

முதல் மற்றும் இரண்டாம் உலகப்போரின்போது உலோகத்தால் ஆன ஹெல்மெட்டுகளும் பயன்பாட்டில் இருந்தமை குறிப்பிடத்தக்கது. பிறகு வாகனம் ஓட்டுபவர்கள் மற்றும் விளையாட்டு வீரர்களுக்கான பிரத்யேகமான ஹெல்மெட்டுகள் வந்தன. ஒரு காலத்தில் போர் வீரர்கள் மட்டுமே பயன்படுத்திவந்த ஹெல்மெட்டுகளை, இன்று தலைக்கு ஆபத்துள்ள செயலைச் செய்பவர்கள் முன்னெச்சரிக்கை நடவடிக்கையாக அணிவது கட்டாயமாகிவிட்டது. அவர்களின் செயல்பாட்டுக்குத் தகுந்த மாதிரி ஹெல்மெட்டுகளின் வடிவமும் மாறிவிட்டன. வெண்கலம், தோலிலிருந்து கார்பன் ஃபைபரில் எடை குறைவான, பாதுகாப்பான ஹெல்மெட்டுகள் தயாரிக்கும் அளவுக்கு வளர்ந்துவிட்டது.

மோட்டார் சைக்கிள் ஹெல்மெட்: இரண்டு சக்கர வாகனங்களைப் பயன்படுத்துபவர்களுக்கான பிரத்யேகமான ஹெல்மெட் இது. இருபதாம் நூற்றாண்டின் ஆரம்ப வருடங்களில் பலருக்கு புகைப்படங்களில் மட்டுமே இரண்டு சக்கர வாகனங்களைப் பார்க்கக்கூடிய வாய்ப்பு இருந்தது. அதனால் பெரிய அளவில் விபத்துகள் நிகழவில்லை. வாகனங்கள் ஓடும் வேகமும் குறைவு என்பதால் விபத்து நிகழ்ந்தாலும் பெரிதாக அடிபடவில்லை.  

இரண்டு சக்கர வாகனங்களின் உற்பத்தி, அதன் வேகம் மற்றும் விற்பனை அதிகரிக்க, பந்தயங்களும் நடந்தன. அப்படி பந்தயங்களில் ஈடுபட்டவர்கள் கீழே விழுந்து அடிபடும் அசம்பாவிதங்களும் நிகழ்ந்தன. இந்தப் பந்தயங்கள்தான் மோட்டார் சைக்கிள் ஹெல்மெட் உருவாக மூலகாரணம். ஆம்; 1914ல் இங்கிலாந்தைச் சேர்ந்த மருத்துவர் எரிக் கார்டினரிடம் வாரத்துக்கு இரண்டு பேராவது பந்தயத்தில் ஈடுபடும்போது அடிபட்டு சிகிச்சைக்காக வந்தனர். அவர்களில் எல்லோருக்குமே தலையில் காயங்கள் இருந்தன.

மோட்டார் சைக்கிளை ஓட்டும்போது தலையைக் காப்பது அவசியம் என்பதை அறிந்தார் எரிக். அந்த வருடத்திலேயே எரிக்கின் ஆலோசனைப்படி தோலினால் ஆன மோட்டார் சைக்கிள் ஹெல்மெட் உருவானது. ஆனால், இந்த ஹெல்மெட் பந்தயங்களில் ஈடுபடும் வீரர்களில் ஒருசிலரைத் தாண்டி மற்றவர்களை ஈர்க்கவில்லை. குறிப்பாக மோட்டார் சைக்கிளைப் பயன்படுத்தும் சாதாரண மக்களைச் சென்றடையவே இல்லை. இருந்தாலும் ஹெல்மெட்டின் அவசியத்தை வலியுறுத்திக்கொண்டே இருந்தார் எரிக்.