பிரபல பின்னணிப் பாடகர் கேகே என அழைக்கப்படும் கிருஷ்ணகுமார் குன்னத், கொல்கத்தாவில் நடைபெற்ற ஒரு இசை நிகழ்ச்சிக்குப் பிறகு திடீரென உடல்நிலை சரியில்லாமல் மயங்கி விழுந்தார். உடனடியாக அருகிலுள்ள தனியார் மருத்துவமனைக்கு அவர் அழைத்துச் செல்லப்பட்டார். இந்நிலையில் அவரை பரிசோதனை செய்த மருத்துவர்கள் அவர் மாரடைப்பு காரணமாக இறந்துவிட்டதாக தெரிவித்தனர்.

இந்தியத் திரையுலகின் பல்துறைப் பாடகர்களில் ஒருவரான கேகே, இந்தி, தமிழ், தெலுங்கு, கன்னடம் மற்றும் பெங்காலி உள்ளிட்ட பல மொழிகளில் பாடல்களைப் பதிவு செய்துள்ளார். குறிப்பாக தமிழ் சினிமாவில் 66க்கும் மேற்பட்ட பாடல்களை கேகே பாடியுள்ளார்.

அதில் ‘காதல் வளர்த்தேன்...’ (மன்மதன்), ‘அப்படிப் போடு...’ (கில்லி), ‘காதலிக்கும் ஆசை...’ (செல்லமே), ‘நினைத்து நினைத்து...’ (7ஜி ரெயின்போ காலனி), ‘உயிரின் உயிரே...’ (காக்க காக்க), ‘ஸ்ட்ராபெர்ரி கண்ணே...’ (மின்சாரக் கனவு), ‘ஒல்லிக்குச்சி உடம்புக்காரி...’ ( ரெட்) உள்ளிட்ட பாடல்கள் அடங்கும்.

53 வயதான பாடகர் கேகே திரைத்துறையில் அறிமுகமாவதற்கு முன்னர் 3,500 விளம்பரங்களுக்கு பாடல்கள் பாடியுள்ளார். கேரளத்து தம்பதிக்கு மகனாகப் பிறந்த இவர் தமிழில் இளையராஜா, ஏ.ஆர்.ரகுமான், யுவன் சங்கர் ராஜா, தேவா, வித்யாசாகர், மணிசர்மா மற்றும் ஹாரிஸ் ஜெயராஜ் ஆகியோர் இசையிலும் பாடியுள்ளார். இவை எல்லாம் அவரைக் குறித்த குறிப்புகள்.

ஏனெனில், இறப்பதற்கு சிலமணி நேரங்களுக்கு முன்புவரை, தான் பங்கேற்ற நிகழ்ச்சி பற்றிய புகைப்படங்களை தனது சமூக வலைத்தளங்களில் பதிவிட்டிருந்தார்.

கொல்கத்தாவின் வெப்பநிலையை கருத்தில்கொள்ளுங்கள். அவ்வளவு கூட்டநெரிசலுக்கு மத்தியில் ஏசியும் வேலைசெய்யவில்லை; அதன் நடுவே குரலை உயர்த்திப் பாடினால் நிலைமை என்னவாகும்? அந்த மாரடைப்பு சாதாரணமாக நடந்தது அல்ல; நான் அதிர்ச்சிக்கு மேல் அதிர்ச்சியாக உள்ளேன். என்ன சொல்வதென்று தெரியவில்லை...’’ இப்படி ஒரு ரசிகர் தனது சமூகவலைத்தள பக்கத்தில் குறிப்பிட்டுள்ளார்.

இப்போது மொத்த நாடே வெப்ப அலைகளால் பாதிக்கப்பட்டு வருகிறது. அதீத வெப்பம் ரத்த அழுத்தத்தைக் குறைப்பதுடன், இதயத்துடிப்பின் வேகத்தையும் அதிகரிக்கும். இது ஒருவருக்கு மாரடைப்பு ஏற்பட வழிவகுக்கும். இதனால்தான் பகல் நேரங்களில் மிகவும் பாதுகாப்பாக இருக்கச்சொல்லி நிபுணர்கள் வலியுறுத்தி வருகின்றனர் என்பது குறிப்பிடத்தக்கது.