‘கார்கி’ படத்தில் முதல் திருநங்கை நீதிபதி என்னும் கேரக்டரில் நடித்தவர் திருநங்கை சுதா என்பது தெரியும்; ஆனால், தமிழகத்திலேயே முதன் முறையாக  திருநங்கைகளுக்காக அமைப்பு தொடங்கி அதன் மூலம் கடந்த பத்து வருடங்களாக எங்கு, எப்போது திருநங்கைகளுக்கு உதவி வேண்டுமானாலும் ஓடி வரும் சுதாவை பலருக்கும் தெரிய வாய்ப்பில்லை.

 ‘‘நான் பட்ட கஷ்டங்களையும், சிரமங்களையும் இனியும் ஒரு திருநங்கை அனுபவிக்கக்கூடாது. அந்த எண்ணம்தான் இன்னைக்கு என்னை இங்கே பயணிக்க வெச்சிருக்கு...’’ கண்களில் அவ்வளவு வலிமையும், நம்பிக்கையும் ஒருசேர பேசுகிறார் திருநங்கை சுதா.‘‘நடிப்பிலே ஆர்வம் எல்லாம் கிடையாது. ‘கார்கி’ டீம்கிட்ட முழுமையா கதை கேட்டுட்டுதான் ஓகே சொன்னேன். எங்கயும் திருநங்கைகளுக்கு களங்கம் ஏற்படுத்துற சீன் கூடாதுன்னு சொன்னேன். ஆனா, ரொம்ப நல்ல கேரக்டர் கொடுத்தார் இயக்குநர் கௌதம் ராம்சந்திரன்.

என் அண்ணன் என்னை விட பதினோரு வருஷங்கள் மூத்தவர். அவருக்கெல்லாம் தெரிஞ்சா நிச்சயம் பிரச்னைதான்னு பயந்தேன். ஆனாலும் ஒரு கட்டத்துக்கு மேலே என்னால என் உணர்வுகளை வெளிக்காட்டாம இருக்க முடியல. நான் நானாக இருக்க ஏன் பயப்படணும்னு வீட்டிலே சொன்னேன். வழக்கமான அதே பிரச்னைகள்தான்.

ஏத்துக்கவே இல்லை. என்னைக் கட்டுப்படுத்தினாங்க. அங்க இருந்த நண்பர்கள் கூட என்னை ஏத்துக்கலை...’’ என்னும் சுதா, படிப்பையும் தொடர முடியாமல், நண்பர்களும் ஏற்றுக்கொள்ளாமல் போகவே பல இன்னல்களைச் சந்தித்திருக்கிறார். ‘‘என்னை கவுன்சிலிங்க்கு கூட்டிட்டுப் போனாங்க. அதிர்ஷ்டவசமா அந்த டாக்டர் எனக்கு சப்போர்ட் செய்தார். இது இயற்கை... இதை நாம கட்டுப்படுத்த முடியாது, கூடாது... அவங்களை அப்படியே விடுங்கன்னு சொன்னார்.