‘இந்தி நடிகர் ராஜேஷ் கன்னா மறைந்தார்’ என்ற செய்தியோடு அவரின் வயோதிகப் புகைப்படத்தை செய்தித்தாள்களில் பார்த்து அதிர்ந்துவிட்டேன். எப்படி இருந்த மனுஷன்..! அவரின் பெருமைகளை நீங்கள் நினைவு கூர்ந்திருந்தது, ஒரு நல்ல இறுதி ‘ஆராதனை’யாக அமைந்தது.

விண்வெளி நிலையத்தை இதற்கு மேல் இன்ச் இன்ச்சாக விவரிக்க சான்சே இல்லை. படிக்கப் படிக்க எங்களுக்கே எடை குறைந்து, மிதப்பது போல் ஆகிவிட்டது. பி.பி.சியில் கூடக் கிடைக்காத விஞ்ஞானத் தகவல்களை எளிய தமிழில் எடுத்துச் சொன்ன விஞ்ஞானி நெல்லை முத்துவுக்கு நன்றி!

தன்னம்பிக்கையும் விடாமுயற்சியும் இணைந்தால் வாழ்க்கையில் வெளிச்சத்தையும், வெற்றியையும் ஒருசேர அடையலாம் என்பதை உணர்த்திய தேனி சீருடையானின் வாழ்க்கைக் கதை நெகிழ்ச்சி தந்தது.

‘கண்ணதாசனின் கட்டில் சென்டிமென்ட்’ படித்து நெஞ்சம் நெகிழ்ந்தது. அவரோடு அந்தக் கட்டிலையும் எரித்தார்கள் என்ற செய்தி மனசை கனக்க வைத்தது. ‘நேற்றைய பொழுதில்’, இன்றைய நெஞ்சங்களில் நீங்கா இடம் பிடிக்கும்!

என்னது? உதட்டை வைத்து குற்றவாளிகளைக் கண்டுபிடிச்சிடலாமா? அப்போ இனிமே போலீஸார், ‘விரைவில் குற்றவாளிகளைப் பிடிச்சிடுவோம்’னு வெறும் உதட்டளவில் சொல்லமாட்டாங்க!

லண்டன் ஒலிம்பிக் போட்டிகளில் நம் பாரதத்தைச் சேர்ந்த 81 பேர் களம் இறங்குவதையும் அவர்கள் மீதுள்ள எதிர்பார்ப்புகளையும் படித்தேன். ஒலிம்பிக்கில் கலந்து கொள்வதே பெருமைதான். நம் எதிர்பார்ப்புகளை இறக்கி வைத்தால், அவர்கள் சுலபமாகப் போட்டியிட்டு தங்கம் வெல்வார்கள் என்பது என் கருத்து!

ஆமைகளுக்குள் சண்டை வந்து விவாகரத்தாகி விட்டது பெரும் வினோதம்தான். சின்னக் காரணங்களுக்காக விவாகரத்து வரை போகும் நம் தம்பதிகளின் முன்னேற்றம் ஆமை வேகத்தில்தான் நகரும் என்ற நீதியை நான் அதிலிருந்து எடுத்துக் கொண்டேன்!

‘ரத்தசரித்ர’த்தில் அறிமுகமான ‘ராதிகா ஆப்தே’வின் கேஷுவல் அழகு, கொல்கிறது. பல மொழிகள் தெரிந்து வைத்திருக்கும் யதார்த்தவாதியான அவரின் சினிமா கரியர், எப்போதும் ‘சுத்தசரித்திரம்’தான்!

‘அந்நியன்’ பட ஸ்டைலில் கருட புராண தண்டனைகளை ரீமிக்ஸ் செய்து ஆல்தோட்ட பூபதி தந்திருந்த ‘புரூடா புராணம்’ செம கலக்கல்!