தன் சொகுசுக்காக இயற்கையை சிதைத்த மனித குலம் இன்று அதன் அபாய விளைவுகளை அனுபவிக்க ஆரம்பித்து விட்டது என்பதை ‘குறையும் பருவமழை’ கட்டுரை உணர்த்தியது.

மணிரத்னத்தின் ‘கடல்’ பட ஜோடி கௌதம் - துளசி செம க்யூட்! சும்மா சொல்லக் கூடாது, இந்த காக்டெயில் பேட்டி டீட்டெய்லான ‘இனிப்புக் கடல்’தாங்க!

என்னது, அழகு ஏஞ்சல் அஞ்சலி தெலுங்கில்தான் கவனம் செலுத்துகிறாரா? அதுவும் கிளாமரில் பிச்சு உதறுகிறாரா? டப்பும் டபுள் மடங்கா? ஆந்திரா மண்ணுக்கு எங்கள் ஆழ்ந்த பொறாமைகள்!

காலம் அறிந்து செய்யும் மனக்கட்டுப்பாடே போதும் கருத்தடைக்கு. இதை விடுத்து முதலைச் சாணம் முதற்கொண்டு பாதரசக் கலவை வரை என்னவெல்லாம் செய்து பார்த்திருக்கிறான் மனிதன்! எல்லா சோதனைகளுமே பெண்(எலி?)களின் மேல்தான்!

விளையாட்டு வீரர்களை மாய உலகில் தள்ளிய ஊக்க மருந்தை இப்போது இளைஞர்களும் பயன்படுத்துவது அதிர்ச்சித் தகவல். இதயத்தையே நிறுத்திவிடும் இந்த மருந்தைப் பற்றி தக்க சமயத்தில் இளைஞர்களுக்கு எச்சரிக்கை விடுத்த உங்களை எவ்வளவு பாராட்டினாலும் தகும்.

சர்க்கஸ் கலைஞர்களின் இன்றைய நிலை மனதைத் தொட்டது. அன்று கோலோச்சிய சாகசக் கலைஞர்களின் வாழ்க்கை இன்று சங்கடத்தில். நாம் புதுமையை வரவேற்கின்ற அதே நேரத்தில், பழைய நல்ல விஷயங்களையும் தக்க வைத்துக் கொள்வோமாக.

‘லேண்ட்ஸ்கேப்’ புகைப்படக் கலைஞர் ரமணனின் மலைக்காட்சி புகைப்படங்கள் சூப்பர்ப். குங்குமத்தில் வழிந்த அழகாக அவை எங்களைக் குளிர வைத்தன.

மூன்று பட விமர்சனங்களும் முக்கனிகளுக்கு சவால் விட்டன. படங்களை அக்குவேறு ஆணிவேறாகப் பிரித்து, ‘இதுதாண்டா விமர்சனம்’ என்று சொன்ன தாங்கள் ஒரு ‘விமர்சனத் திலகம்’தான்!

பீட்ஸா, ப்ரூட் சாலட், பப்பாளி எனப் பல அடைமொழிகளுக்கு சொந்தக்காரரான த்ரிஷாவை, ‘கொத்து பரோட்டா’ என அட்டையில் எழுதிய உம்ம ஏரியாவில், 24 மணிநேரம் பவர்கட்டாகக் கடவது!

ஒரு பெயருக்காக பெரிய போரையே சுப்ரீம் கோர்ட் சென்று நடத்த வேண்டிய கட்டாயத்தை ஏற்படுத்தியிருக்கும் ஐஸ்லாந்து நாட்டுச் சட்டம் சரியான அக்கப்போராக இருக்கிறதே!